Gérmaniyediki Uyghurlar namayish qilip xitaydin ilham toxtini qoyuwétishni telep qildi

Muxbirimiz irade
2014-09-26
Élxet
Pikir
Share
Print
Uyghur ziyaliysi ilham toxti xitay soti teripidin "Döletni parchilash" jinayiti bilen muddetsiz qamaq jazasigha höküm qilin'ghan. 2014-Yili 23-séntebir, ürümchi.
Uyghur ziyaliysi ilham toxti xitay soti teripidin "Döletni parchilash" jinayiti bilen muddetsiz qamaq jazasigha höküm qilin'ghan. 2014-Yili 23-séntebir, ürümchi.
CCTV

Uyghur ziyaliysi ilham toxti qolgha élinip aridin 8 ay ötkendin kéyin échilghan sotta, u "Bölgünchilik" jinayiti bilen ömürlük qamaq jazasigha höküm qilin'ghandin kéyin, dunyadiki Uyghur jama'iti arisida küchlük naraziliq peyda qildi.

Bu sewebtin bügün, yawropa sherqiy türkistan birliki we dunya Uyghur qurultiyining birlikte orunlashturushi bilen gérmaniyening myunxén shehiridiki Uyghurlar xitay konsulxanisi aldigha yighilip, naraziliq namayishi ötküzdi. Dunya Uyghur qurultiyining mu'awin re'isliridin biri ümid agahi ependi radi'omizgha bu namayish ehwalini tonushturup ötti.

Ilham toxtining bölgünchilik bilen eyiblinishi démokrat xitaylar, kishilik hoquq aktipliri we shundaqla amérika hökümiti, en'gliye we yawropa ittipaqi we shundaqla kishilik hoquq organliri teripidin birdek eyiblendi. Ular, ilham toxtigha bérilgen bu jazaning qanuniy emeslikini bildürdi. Amérika dölet ishliri ministiri jon kérriy bolsa öz bayanatida, ilham toxtidek tinch yol bilen özining köz qarishini ipade qilghan, mesililerni qelem bilen otturigha qoyuwatqan bir ziyaliyni bundaq éghir jaza bilen jimiqturush xitayda muqimliq yaratmaydu, eksiche weziyetni téximu ötkürleshtürüwétidu, dep agahlandurghan idi. Dunya Uyghur qurultiyining ijra'iye re'isi dolqun eysa ependimu namayishta qilghan sözide, ilham toxti sotining xitayning Uyghurlargha qaratqan bésim siyasitining ochuq-ashkara bir örniki ikenlikini éytti.

Namayishning teshkilligüchi organliridin biri bolghan yawropa sherqiy türkistan birlikining re'isi enwerjan ependi söz qilip, özlirining bu namayish arqiliq chet'ellerdiki Uyghurlarning ilham toxti we uning a'ilisige bolghan qollishini namayan qilish ikenlikini bildürdi. Enwerjan ependi yene Uyghurlarning héchqachan zulumgha bash egmeydighanliqini eskertti.

Toluq bet