Илһам тохтиниң аяли гүзәлнур ханим мәктәп даирилири тәрипидин агаһландурулди

Илһам тохтиниң аяли гүзәлнур ханим радиомиз зияритини қобул қилип, 28 - феврал җүмә күни мәркизи милләтләр университетида ечилған йиғинда мәктәп даирилири тәрипидин агаһландурулғанлиқини билдүрди.

Гүзәлнур ханимниң билдүрүшичә, мәктәп рәһбәрлики йиғинда гәрчә гүзәлнур ханимниң исмини ашкара тилға алмиған болсиму, лекин чәтәл мәтбуатлириниң зияритини қобул қилғучиларниң келип чиқидиған ақивәткә өзи мәсул болидиғанлиқини алаһидә тәкитлигәнликини билдүрди.

Илһам тохтиниң аяли гүзәлнур ханим даириләрниң ери илһам тохти мәсилисидә униңға һәр хил йоллар арқилиқ бесим қиливатқанлиқини, әмма өзиниң илһам тохтиниң ақлинип чиқиши үчүн қолидин келидиған барлиқ тиришчанлиқларни қилишқа тәйяр икәнликини билдүрди.

Илһам тохтиниң аяли гүзәлнур ханимниң билдүрүшичә, җүмә күни чүштин кейин мәркизи милләтләр университетида ечилған йиғинда, мәктәп рәһбәрлири сөз қилип, оқутқучи - оқуғучиларни илһам тохти мәсилиси тоғрилиқ муназирә қилмаслиққа дәвәт қилған.

Йиғинда мәктәп рәһбәрлири йәнә, мәктәптики һәрқандақ бирәйләнниң чәтәл мәтбуатлириниң зияритини қобул қилса, буниңдин келип чиқидиған ақивәткә өзи мәсул болуши керәкликини алаһидә тәкитлигән.

Гүзәлнур ханим баянида җүмә күни ечилған йиғинда гәрчә униң исми бивастә тилға елинмиған болсиму, әмма мәктәп даирилириниң вастилиқ һалда уни чәтәл мәтбуатлириниң зияритини қобул қилмаслиққа агаһландуруватқанлиқини, лекин ери илһам тохтиниң гунаһсиз икәнликини испатлишиниң бирдин - бир йоли хәлқара мәтбуатларниң зияритини қобул қилиш икәнликини билдүрди.

Гзәлнур ханимниң билдүрүшичә, илһам тохти билән көрүшүш үчүн үрүмчигә барған адвокат ли фаңпиң қатарлиқлар илһам тохти әпәнди билән көрүшәлмигәнлики үчүн түнүгүн бейҗиңға қайтип кәлгән.

Гүзәлнур ханим йәнә, бейҗиңдики дөләт аманлиқини қоғдаш сақчилириниң йәнила униң өйи әтрапида 24 саәтлик назаритини бошаштурмиғанлиқини билдүрүп, ишик алдида гүзәттә турған сақчиларниң униң билән көрүшүш үчүн кәлгән адвокат ли фаңпиң қатарлиқларниң өйгә киришигә йол қоймиғанлиқини билдүрди.

Гүзәлнур ханим йәнә, илһам әпәнди билән бир күндә тутқун қилинған оқуғучилардин абдуқеюм вә пәрһат халмуратларниң ата - анилири билән телифонда көрүшкәнликини билдүрди. Гүзәлнур ханимниң дейишичә, нөвәттә үрүмчидә туруватқан шөһрәт турсун вә пәрһат халмуратниң ата - анилириму үрүмчи сақчи даирилириниң рәт қилиши сәвәблик балилири билән көрүшәлмигән. Әмма сақчилар уларниң балилири үчүн апарған кийим - кечәк қатарлиқ нәрсиләрни қобул қилған.

Бейҗиң мәркизи милләтләр университетиниң уйғур миллитидин болған иқтисад пәнлири дотсенти илһам тохти әпәнди вә униң бирқанчә нәпәр оқуғучиси бу йил 15 - январ күни, бейҗиңда тутқун қилинған. Үрүмчи сақчи идариси илһам әпәнди тутқун қилинип 41 күндин кейин униң “дөләтни парчилаш җинайити” гумани билән 20 - феврал күни рәсмий қолға елинғанлиқини елан қилған. Әмма ғәрб демократик дөләтлири вә хәлқара кишилик һоқуқ тәшкилатлири илһам тохти әпәндиниң “тинчлиқ йоли арқилиқ уйғурларниң қануний һәқ - һоқуқлирини тәләп қилған зиялий” икәнликини тәкитләп, хитай даирилирини хәлқара кишилик һоқуқ әһдинамисигә риайә қилип, илһам тохтини шәртсиз қоюп беришкә, хитай пуқралириниң пикир - әркинликигә капаләтлик қилишқа чақирмақта.