Shiwétsiyede islam birliki yighinida sherqiy türkistan mesilisi anglitildi

Shimaliy yawropa islam birliki “Rabit el islam” ning her yili dékabir éyida ötküzülüwatqan xelq'araliq islam qurultiyining 34-nöwetlik yighini 25-dékabir küni sitokholmning osa toluq ottura mektipining yighin zalida resmiy bashlandi.

Shimaliy yawropa islam birlikining 25-dékabirdin 27-dékabirghiche ötküzülidighan 34-nöwetlik yighinigha, shiwétsiyede pa'aliyet qiliwatqan Uyghur ma'arip uyushmisi bilen teklimakan islam medeniyet merkizimu teklip bilen qatnashti.

Bu qétimqi qurultayghimu ilgirikige oxshashla dunyada tonulghan islam alimliri teklip qilin'ghan bolup, her yili oxshimighan témida léksiye we munaziriler ötküzülüp kelmekte, bu qétimqi yighin “Musulmanlarning jem'iyettiki roli” dégen témida élip bérilmaqchi.

Yighin körgezme zalida Uyghurlarghimu orun bérilgen bolup, Uyghur ma'arip uyushmisi yighin qatnashquchilirigha teshwiq qilish üchün bu orun'gha dunya Uyghur qurultiyining re'isi rabiye qadir xanim tonushturulghan “Ejdiha bilen élishqan ayal” namliq kitabning shiwétchisi, sherqiy türkistan hazirqi weziyiti tonushturulghan teshwiqat wariqi, sherqiy türkistan bayriqi chüshürülgen sharpa, Uyghurche-shiwétche lughet, 24yildin buyan türmide yétiwatqan diniy ziyaliy abdulkerim abduwelining ehwali qatarliqlarni teyyarlidi.

Bu qétimliq yighinning ehwalidin tepsiliy melumat élish üchün, Uyghur ma'arip uyushmisining mu'awin re'isi nijat turghunni ziyaret qilduq.