Б д т кишилик һоқуқ кеңишидә уйғурлар мәсилиси йәнә оттуриға қоюлди

Б д т кишилик һоқуқ кеңишиниң 30-нөвәтлик йиғини 9-айниң 14-күни җәнвәдә башланған болуп, 10-айниң 2-күни ахирлишидиған бу йиғинға д у қ иҗраийә комитети рәиси долқун әйса вә қурултай программа хадими петир әпәндиләр қатнишип уйғурлар мәсилисини тәкрар оттуриға қойған.

Д у қ рәһбәрлириниң билдүрүшичә, б д т кишилик һоқуқ кеңиши йиғини уйғурларни дуняға тонутушта яхши пурсәтләр билән тәминлимәктә. Д у қ хадимлири уйғурлар мәсилисини б д т да күнтәртипкә әкелиш, хитайниң уйғур илида елип бериватқан җинайәтлирини паш қилиш вә дуня миқясида кәң җамаәт пикри һазирлаш үчүн йиллардин бери теришчанлиқ көрситип кәлмәктә.

Долқун әйса әпәндиниң бүгүн җәнвәдин бәргән мәлуматиға асасланғанда, һәр йилқиға охшаш бу қетимму д у қ зор тәйярлиқлар билән алдинқи һәптә қурултай хадими петирни кишилик һоқуқ кеңишиниң бу нөвәтлик йиғиниға әвәтип, уйғурларниң нөвәттики вәзийити вә хитай зулуми һәққидә йиғин әһлигә доклат тәқдим қилиш пурситигә еришкән. Петирниң болупму тайландтин қайтурулған 109 нәпәр уйғур тоғрисидики доклати һәрқайси әл вәкиллириниң күчлүк диққитигә улашқан.

22-Сентәбирдин буян җәнвәдә паалийәт елип бериватқан долқун әйса әпәнди өзиниң бүгүн б д т кишилик һоқуқ кеңиши залида тибәт, уйғур қатарлиқ йәттидин артуқ милләт тәшкилатлири бирликтә уюштурған “ тән җазаси вә хитай һөкүмити” намлиқ йиғинға қатнашқанлиқини тилға алди. Йиғинда у, хитайниң шәрқий түркистанда елип бериватқан тутқун қилиш вә бастуруш сиясәтлирини паш қилған. Уйғур хәлқиниң ялғуз җисманий зәрбиләргила әмәс, еғир мәниви зәрбиләргиму учраватқанлиқини тәкитлигән. Долқун әйса әпәнди бу қетимқи йиғинда йәнә, илһам тохти мәсилисини оттуриға ташлап, дуня җамаитиниң диққитини чәккән. Долқун әйса уйғур илида тән җазаси билән мәҗбурий иқрар қилдурулған вә түрмидә өлтүрүлгән бир қисим уйғурларни мисалға елип, йиғинда зор ғулғула пәйда қилған.