Ilham toxtining qizi jewher: "Dadam ilham toxti üchün adalet telep qilimen"

Muxbirimiz méhriban
2014-09-25
Share
jewher-ilham-toxti-guwahliq.jpg Jewher dadisi ilham toxti üchün amérika dölet mejliside erkinlik telep qildi. 2014-Yili 8-aprél, washin'gton.
cecc.gov

Tinch yol bilen Uyghurlarning qanuniy heq-hoquqlirini telep qilghini üchün, 23-séntebir küni xitayning ürümchide achqan sotida "Döletni parchilash" jinayiti bilen eyiblinip, muddetsiz qamaq jazasigha höküm qilin'ghan Uyghur öktichi ziyaliysi ilham toxtining qizi jewher radi'omiz ziyaritini qobul qilip, dadisining gunahsizliqini tekitlep, xitay hökümitidin dadisi üchün adalet telep qilidighanliqini bildürdi. U 25-séntebir peyshenbe küni etigen radi'omiz ziyaritini qobul qildi.

Jewher sözide dadisining muddetsiz qamaq jazasigha höküm qilin'ghanliq xewirini anglighandin kéyinki rohi halitini bayan qilip mundaq dédi:
"Dadam heqqidiki xewerni anglighinimda könglüm yérim boldi, yighlidim, hetta shu küni tuyuqsiz qizip kettim. Qizitmam 39 gradusqa chiqti. Ögey apam guzelnurningmu ehwali yaxshi emeslikini xewerlerdin anglidim. Emma uninggha téléfonum ulanmidi. Ularning dadamni muddetsiz qamaq jazasigha höküm qilghanliqi güzelnur hedemnimu aghritip qoydi. Emma dadam dégendek men qeyser bolushum kérek. Chünki, hazir yighlaydighan waqtimiz emes, belki dadamning gunahsizliqini dunyagha ispatlaydighan waqtimiz. Shunga sizning ziyaritingizni qobul qiliwatimen. Tünügün indi'ana téléwiziyisining ziyaritini qobul qilip, dadamning gunahsiz ikenlikini dédim we junggo hökümitidin dadamni gunahsiz dep qoyup bérishni telep qildim."

Téléfon ziyaritimiz dawamida, köp qétim yötelgenliki sewebidin gepliri üzülüp chiqiwatqan bolsimu, emma jewherning rohi haliti yenila kötürenggü idi. U bu rohni dadisi ilham toxtidin alghanliqini, özining bundaq shara'itta gheyretlik bolushi kéreklikini, tünügün kechtin bashlap metbu'atlarning ziyaritini qobul qilishni bashlighanliqini we dadisining tézrek erkinlikke chiqishi üchün özi körsiteligüdek tirishchanliqlarni körsitidighanliqini bildürüp mundaq dédi:
"Men yenila ümidwar bolushqa, gheyretlik bolushqa tirishiwatimen, bundin kéyinmu elwette qeyser bolushqa tirishimen. Men bu rohni dadamdin aldim. Yéqinqi yillarda dadam da'im tutqun qilinip soraq qilinip turdi. Her qétim ular uni soraq qilip öyge qayturghinida dadam bizge gheyretlik bolushni, yighlimasliqni éytatti. Men bu xil qeyserlikni shu yillarda yétildürdüm. Shunga hazirmu yighlimaymen. Chünki hazir yighlaydighan waqit emes. Junggo hökümiti haman bir küni özining xata qilghanliqini tonuydu. Ular gunahsiz dadamni tutqun qilip, jazalimaqchi boluwatidu. Emma ular haman bir küni bu ishta xata qilghanliqini bilidu. Eger hökümet öz xataliqini tonumisa, biz uninggha xata qilghanliqini tonutimiz. Men ularning xata qilghanliqini tonutushqa tirishimen. Men dadamning erkinlikke chiqishigha ishinimen we dadamning erkinliki üchün özüm qilalighan ishlarning hemmisini qilishqa teyyar. Tiriship oquymen, dadamning ümidini aqlaymen."

Jewherning bildürüshiche, ögey apisi güzelnur dadisi üstidin ürümchide échilghan sotqa qatnishish üchün ürümchige barghandin buyan, jewherning güzelnur xanimgha urghan téléfonliri ulanmighan. U peqet ilham ependining adwokatlirigha téléfon qilish arqiliqla dadisi ilham toxti we apisi güzelnurning ehwalini bilish pursitige érishken. Jewherning bildürüshiche, adwokat uninggha güzelnur xanimning mushu bir nechche künde béyjinggha qaytip kélidighanliqini éytqan.

Jewher bayanida yene, gerche dadisining tutqun qilinip éghir jazagha höküm qilinishi, bu a'ilining barliq mülkining musadire qilinishidek yaman xewer özini qattiq azaplighan bolsimu, emma dunya jama'etchilikining dadisi ilham toxtigha we bu a'ilining ehwaligha yéqindin köngül bölüshi özini tesirlendürgenlikini bildürdi:
"Hazir dadamni yaxshi bilidighan dostlar, chet'ellerdiki Uyghurlar, amérika qatarliq döletler, teshkilatlar hemmisi dadamgha, bizning a'ilige köngül bölüwatidu. Mana bu dadamning xata qilmighanliqini ispatlaydu. Men bu ehwaldin bek tesirlendim. Men dadamdin pexirlinimen. Ilham toxtining qizi bolghanliqimdin pexirlinimen. Dadam Uyghurlarning qanuniy heqliri üchün sözlidi. Shuning üchün türmide yétiwatidu. U pütünley gunahsiz. Men dadamning erkinlikke chiqishi üchün küch chiqarghan, dadam üchün junggo hökümitini adaletke chaqirghan barliq kishilerge, teshkilatlargha, döletlerge rehmet éytimen we xelq'arani junggo hökümitining dadamni gunahsiz dep qoyup bérishi üchün bésim ishlitishke chaqirimen."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet