Канадада ечилған "ислам роһини урғутуш" намлиқ хәлқаралиқ йиғинда уйғур мәсилиси аңлитилди

Мухбиримиз меһрибан
2018-12-25
Share
islam-rohini-urghutush-kanada-yighin.jpg Уйғур мәсилиси аңлитилған "ислам роһини урғутуш" намлиқ хәлқаралиқ йиғинға қатнашқан уйғурлар. 2018-Йили 21-декабир, канада.
RFA

Канада шәрқий түркистан җәмийитиниң рәиси туйғун абдувәли әпәндиниң билдүрүшичә, 21-декабир күни канаданиң торонто шәһиридә башланған "RIS", йәни "ислам роһини урғутуш" намлиқ хәлқаралиқ йиғин 3 күн давамлашқан. Мәзкур йиғинға канада шәрқий түркистан җәмийитиниң тәшкиллиши билән канададики уйғурлардин 150 тин 200 гә қәдәр адәм қатнашқан. Йиғинда уйғурларни тонуштуруш вә уларниң нөвәттики вәзийитини аңлитиш паалийәтлири елип берилған.

Туйғун әпәндиниң билдүрүшичә, йиғинда канада шәрқий түркистан җәмийити аяллар бөлүминиң мудири турниса ханимниң хитай һөкүмити тәрипидин җаза лагерлириға қамалған уйғур һәққидики доклати оқуп өтүлгән. Канада шәрқий түркистан җәмийити тәйярлиған уйғурларниң нөвәттики вәзийити тонуштурулған бир синалғу филими чоң екранда көрситилгән. Бу филимни көргән йиғин мәйданида кишиләр көзлиригә яш елип, уйғурлар үчүн немә қилип берәләйдиғанлиқини сорашқан.

Йиғинда 4 минутлуқ сөзләш пурситигә еришкән турниса ханим радийомиз зияритини қобул қилип, "RIS", йәни "ислам роһини урғутуш" йиғинниң канадада 18 йилдин буян давамлишип келиватқанлиқини, бундақ чоң хәлқаралиқ йиғилишта өзиниң уйғурлар һәққидә сөзләш пурситигә еришишиниң асанға тохтимиғанлиқини билдүрди.

Униң ейтишичә, мәзкур йиғин башлиништин икки ай илгирила у бу йиғинни орунлаштурғучи орун канада ислам җәмийити һәмдә бу қетимқи йиғинда доклат беришкә орунлаштурулған 26 нәпәр ислам өлимаси билән алақә орнитишқа тиришқан.

У йиғиндин илгири канада ислам җәмийити вә бу қетимлиқ йиғинда доклат беришкә орунлаштурулған ислам дунясида тонулған шәйхләргә язған елхәтлиридә дуня нопусиниң бир йерим милярд аһалисини тәшкил қилидиған мусулман әллирини уйғур мусулманлириниң бүгүнки қийин әһвалиға көңүл бөлүшкә чақириқ қилған.

Туйғун абдувәли әпәндиниң билдүрүшичә, торонто шәһиридә ечилған бу йиллиқ "RIS" йиғининиң 3 күнлүк паалийитидә йәнә канада, америка қатарлиқ дөләтләрдә яшаватқан мусулман хәлқлириниң өрп-адитигә аит көргәзмиму уюштурулған икән. Көргәзмидә түркийәдә қурулған "нузугум" җәмийитиниң канададики бир қисим әзалири тәйярлиған уйғурларниң өрп-адити вә күндилик турмушиға аит мәдәнийәт буюмлириму қоюлуп, йиғинға кәлгән мусулман хәлқлириниң зор қизиқишини қозғиған.

Мәзкур паалийәткә қатнашқан уйғур паалийәтчилиридин мукәррәм қурбан ханим зияритимизни қобул қилип, бу қетимқи йиғинда "нузугум" җәмийитиниң канада шөбисидики аялларниң зор тиришчанлиқ көрсәткәнликини билдүрди.

Униң билдүрүшичә, 3 күнлүк бу йиғинда уйғур аяллири вә балиларниң тиришчанлиқ көрситиши билән йиғин мәйданиниң өзидила 3000 дин артуқ киши лагерларға қамалған уйғурларни қоюп бериш һәққидики мураҗиәтнамигә имза қойған.

Мукәррәм ханимниң баянлиридин мәлум болушичә, канаданиң торонто шәһиридә ечилған бу йиллиқ "RIS" йиғиниға йәнә дуня уйғур қурултийи муһаҗирлар комитетиниң мудири мәмәт тохти әпәндиму қатнишип, йиғинниң көргәзмә паалийити залида мухбирлар вә йиғин әһлигә мәхсус уйғур мәсилисини аңлатқан.

Дуня уйғур қурултийи муһаҗирлар комитетиниң мудири мәмәт тохти әпәндиму зияритимизни қобул қилип, нөвәттә хитай һөкүмити уйғур қатарлиқ мусулман хәлқләрдин милйонларчә инсанни җаза лагерлириға қамаватқан вәзийәткә нисбәтән ғәрб демократик әллири күчлүк инкас қайтуруватқан болсиму, әмма мусулман әллириниң сүкүттә туруватқанлиқини билдүрди.

Мәмәт тохти әпәндиниң қаришичә, мусулман дөләтлири һөкүмәтлириниң уйғурлар мәсилисигә қарита сүкүттә турувелиштәк бу хил пассип вәзийәтни өзгәртиштә "RIS" йиғиниға охшаш зор көләмлик паалийәтләрдин пайдилинишниң мәлум үнүми болидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт