17 Yashliq abdulbasitning naheq ölümi heqqide ündidargha uchur yollighan bir Uyghur 17 yilliq qamaqqa höküm qilin'ghan

Muxbirimiz qutlan
2014-12-31
Share
kelpin-abdulbasit-uchur-wechat.jpg 17 Yashliq abdulbasit qizil chiraghdin bösüp ötkenliki seweblik étip tashlan'ghandin kéyin ündidarning dostlar chembirikide tarqalghan uchurlar. (2014-Yil aprél)
RFA/Qutlan


Igilishimizche, da'iriler üchturpan nahiyeside olturushluq bir Uyghur yashni kelpinde naheq étiwétilgen 17 yashliq abdulbasitning ölüm xewirini ündidargha yollighanliqi seweblik 17 yilliq qamaq jazasigha höküm qilghan.

Merhum abdulbasitning anisi bügün radiyomiz ziyaritini qobul qilip, bu yil aprélda oghli étiwétilgendin kéyin kelpin nahiyesi bilen bashqa jaylarda nurghun kishilerning tutqun qilin'ghanliqini we türlük jazalargha uchrighanliqini bayan qildi.

Ündidarda abdulbasitning naheq ölümi heqqide yollan'ghan kinayilik resim (2014-yil aprél)
Ündidarda abdulbasitning naheq ölümi heqqide yollan'ghan kinayilik resim (2014-yil aprél)

Uning bildürüshiche, eyni waqitta kelpin xelqidin bashqa aqsu, üchturpan we bashqa qoshna nahiyelerdiki Uyghur yashlirimu abdulbasitning naheq ölümige küchlük inkas qayturghan.

Melum bolushiche, üchturpan nahiyeside olturushluq bir Uyghur bu heqte ündidargha uchur yollighan. U bu uchurida: "Qérindishimiz qizil chiraghdin motosiklit bilen bösüp ötkenliki üchün étiwétildi. U bizning shundaqla sizningmu qérindishingiz. Uyghur bolsanglar, bundaq naheqchilikke süküt qilmanglar!" dep yazghan.

Aridin uzun ötmey bu kishi üchturpanda tutqun qilin'ghan we 17 yilliq muddetlik qamaq jazasigha höküm qilin'ghan. Uning 3 balining atisi ikenliki melum.

Merhum abdulbasitning anisi ziyaritimiz jeryanida yene munularni bildürdi:
Ündidarda abdulbasitning naheq ölümi heqqide yollan'ghan kinayilik yumur (2014-yil aprél)
Ündidarda abdulbasitning naheq ölümi heqqide yollan'ghan kinayilik yumur (2014-yil aprél)

- Men hazirghiche oghlumning qeyerge kömüwétilgenlikinimu bilmeymen. Öz waqtida bir erz yézip kelpin nahiyesining hakimigha bérish üchün hökümet binasigha barghan idim, lékin méni hakim bilen körüshkili qoymidi. Hetta erz yézipsen dep solap qoydi. Bu erzni yézishta yéziqchiliq we qanundin xewiri bar bir tonushimizdin meslihet alghan idim. U manga bu erzni yézipmu bermigen, peqetla meslihet bergen idi. Kéyin uni""Erz yézip qutratquluq qipsen" dep bir hepte solidi, andin 1500 som jerimane qoyup, ma'ashidin tutup qaldi. Bu xétimni kompyotérda bésip bergen bir ayalni 5 kün solap qoyup berdi. Ishqilip, bizge hésdashliq qilghan yaki bir qacha tamaq sun'ghan kishilerning hemmisi soraqqa tartildi. Méni töwen ijarilik öyümdin qoghlap chiqardi, hazir yürchi yézisidiki öyimizde 5 pung kélidighan yérimizge tayinip kün ötküzüwatimen. Kichik oghlumdin da'im ensirepla yürimen, goya unimu tuyuqsiz étip tashlaydighandek bir qorqunch ichide uxliyalmaymen. Uruq - tughqanlirimning köp qismi namayishqa qatnashqanliqi üchün késilip ketti. Kelpin jama'itidin nechche onlighan kishiler téxiche tutqunda yaki qamaqta yétip éghir bedel tölewatidu. Bir allahdin bashqa héchbir yölenchükimiz qalmidi…

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet