Rabiye qadir: “Xitayning bu arzusi ishqa ashidiken, adalet haqaretke uchrighan bolidu....”

B d t kishilik hoquq kéngishi 11-ayning 12-küni saylam ötküzüp, kishilik hoquq kéngishige eza 47 döletni békitip chiqidu. Xitay asiya-ténch okyan rayonidiki 5 namzat döletning biri. Dunya Uyghur qurultiyini öz ichige alghan xitay hökümitige qarshi bir qisim xelq'araliq teshkilat we organlar 5-noyabir nyuyork shehirige yighilip, muhakime we naraziliq namayish pa'aliyetliri arqiliq, birleshken döletler teshkilati bash shtabigha ipade bildürüp, xitaygha oxshash kishilik hoquqni éghir depsende qilip kéliwatqan bir döletning kéngeshke eza bolush salahiyitining yoqluqini jakarlap, dunya jama'etchilikini “Xitayni eza qilip qoyush kishilik hoquq we démokratiyige qilin'ghan haqaret” dep agahlandurmaqta.

Dunya Uyghur qurultiyining bir qisim rehberlirining hemrahliqida nyoyorkta pa'aliyette boluwatqan Uyghur milliy herikiti rehbiri rabiye qadir xanim muxbirimizning ziyaritini qobul qilip “Xitayning kishilik hoquq kéngishige kirish hoquqigha ige bolushi, dunyaning kishilik hoquq qimmet qarishigha uyghun emes, bu peqet, Uyghur we bashqa xitayning kishilik hoquq tehditige duchar boluwatqan xitayning ichi we asiya, hetta pütün dunya xelqi üchün qobul qilghili bolmaydighan bir netije dep qaraymen” dep bildürdi.