Bay kömürkan hujumida ölgen saqchilardin 4 nepirining kimliki éniqlandi

18-Séntebir küni bay nahiyisining térek bazirida yüz bergen soghan kömür kénigha hujum qilish weqeside ölgen saqchilardin 4 nepirining kimliki éniqlandi.

Bulardin saqchixana bashliqi wu féng 45 yash, shyaw xu 28 yash, zayir 28 yash, zakirjan 27 yash bolup, bular weqe yüz bergen teweliktiki térek bazarliq saqchixanining xadimliri iken. Bular, weqe yüz bergen küni weqe meydanigha yéqinlashqan chéghida yol üstide kütüp turghan pida'iylarning hujumigha uchrighan. Da'iriler weqede ölgen saqchilarning kimliki heqqidimu hazirghiche ammigha héchqandaq melumat bermigen. Ashkarilinishiche, saqchixana bashliqi wu féng aptomobiligha térek bazardiki may ponkittin nésige may qachilaydighan bolup, mezkur may ponkitning bashliqi saqchilardin nési hésabni sürüshte qilghan chéghida wu féngning ölgenlikini uqup qalghan. Saqchi zakirjanning ölümimu uning a'ilisige da'irilerning hal sorap kélishi seweblik jem'iyetke ashkarilan'ghan.

Melum bolushiche, weqe yüz bergendin kéyin, yeni charlash opiratsiyesi dawamidimu saqchilardin ölgen we yarilan'ghanlar bolghan, emma ularning sani we kimliki hazirche éniq emes.