Хитайниң бай көмүркан һуҗумчилирини издиши 20 ‏-күнгә қәдәм қойди, һуҗумчилар йәнә тепилмиди

Мухбиримиз шөһрәт һошур
2015.10.07
komurkan-komur-kan.jpg Хитайдики мәлум көмүркан. 2015-Йили 20-авғуст.
AFP

Ақсу байда йүз бәргән көмүрканға һуҗум қилиш вәқәсигә бүгүн йегирмә күн болди. Вәқә йүз бәргәндин кейин хитай қораллиқ қисимлири башлиған тағ опиратсийәсиниң нәтиҗиси вә издиливатқан һуҗумчиларниң ақивити һәққидә мәлумат игиләш үчүн бүгүн мухбиримиз байниң терәк базиридики нөвәтчи хадимлириға қайтидин телефон қилди. Бир көмүр кандики дора искилати нөвәтчи хадиминиң ашкарилишичә, һуҗумчилар та бүгүнгичә йәни издиливатқан 20‏-күнигичә тутулмиған; тик учар айропиланлар чарлаш даирисини тағ бағридин, яйлақларғичә вә дала-етизларғичә кеңәйткән. Һәрқайси йезилардин тағ йолиға пишшиқ чарвичиларни топлап оператсийигә һәмкарлиққа салған.

Вәқәдин кейин иштин тохтитилған кан қудуқлириниң һечқайси техи иш башлимиған, мәктәп қорусини қоманданлиқ мәркизигә өткүзүп бәргән терәк базарлиқ башланғуч мәктәп оқуғучилириму өз мәктипигә техи қайтмиған.

Бу әһвалдин байдики хитай көчмәнлириниң нөвәттә техиму вәһимигә чүшкәнлики вә һәйвәтлик башланған чарлаш опирасийәсиниң әмди җиддий вә әнсизлик ичидә давам қиливатқанлиқи мәлум.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.