Xitay da'iriliri: bay kömürkan hujumchiliri heqqide uchur bergüchilerge 500 ming som mukapat bérilidu

Muxbirimiz shöhret hoshur
2015.10.14
xitay-saqchi-meschit-charlash.jpg Xitay qoralliq saqchiliri jüme namizidin burun meschit etrapini charlawatqan körünüsh. 2009-Yili 10-iyul, ürümchi.
AFP

Xitayning bay kömürkan hujumchilirini izdesh opiratsiyesi 25-künige qedem qoyghanda, yeni 13-öktebir küni bay nahiyisining kan yéziliq hökümitide yighin échilip, hujum gumandarliridin tursun jüme, musa toxtiniyaz we memet eysa qatarliq kishiler we ularning ghayib a'ile-tawabi'atliri heqqide uchur bergüchilerge, teminligen uchurining qimmitige qarap, 200 ming, 300 ming we 500 ming som mukapat bérilidighanliqi uqturulghan. Yighinda yene mezkur gumandarlarni yoshurghuchilar özini melum qilsa, jinayetchini yoshurush qilmishigha kengchilik bilen mu'amile qilinidighanliqi eskertilgen.

Muxbirimizning bügün hujum gumandarlirining teweliki bolghan kanchi yézisidiki kent mes'ulliri, nöwetchi xadimlirigha qarita élip barghan téléfon ziyaretliri dawamida qarshi terepning ensiz keypiyati we zorlanma jawablirimu xitay terepning gumandarlarni tépishta ammining himayisige érishelmigenlikini ashkarilimaqta.

Melum bolushiche, hujum gumandarliri heqqidiki bezi kocha perezliride hujum gumandarlirining 3 a'ile yeni 3 jemet kishiliri ikenliki ilgiri sürülmekte. Tünügün kanchi yéziliq hökümet yighinda élan qilghan gumandarlar heqqidiki uqturushtimu “3 Jemet” ibarisi tilgha élin'ghan. Bügün yene bay kömürkan hujumini éniqlash üchün aqsugha barghan, emma xitayning tosqunluqi bilen baygha bérishqa muweppeq bolalmighan, bir chet'el muxbirining bizge élxet arqiliq bildürüshiche, aqsuda ötken hepte bir tamgha chaplan'ghan tutush buyruqida bir neper ayal gumandarningmu resimi körsitilgen. Emma tutush buyruqi uzun ötmey tamdin söküwétilgen. Bu uchur kömürkan hujumchiliri arisida ayallarningmu barliqi we hujumni élip barghuchilarning 3 jemet kishiliri ikenliki heqqidiki perezning asassiz emeslikini isharetlimekte.

Yuqiridiki awaz ulinishidin muxbirimizning bu heqte teyyarlighan programmisini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.