Қәшқәрдики лагерлардин бир түркүм тутқунларниң хитай өлкилиригә йөткәлгәнлики дәлилләнди

Йеқинқи һәптиләрдин бери җәмийәт хәвәрлиридә уйғур дияридики йиғивелиш лагерлирида тутуп турулуватқанларниң бир қисми үстидин сот ечиливатқанлиқи вә булардин бир түркүминиң хитай өлкилиригә йөткиливатқанлиқи һәққидә гәп-сөзләр тарқалған иди. Мухбиримизниң бу һәқтики ениқлиши давамида ғулҗидики лагердикиләрдин бир түркүминиң сотлиниватқанлиқи айдиңлашқан иди. Мухбиримизниң бу һәптидики ениқлиши давамида қәшқәрдики лагердикиләр үстидинму сот ечиливатқанлиқи вә бир түркүминиң хитай өлкилиригә мәхпий һалда йөткиливатқанлиқи бир сақчи хадими тәрипидин дәлилләнди.

Һөрмәтлик радио аңлиғучилар, алдинқи һәптиләрдә иҗтимаий таратқуларда уйғур аптоном районидики бәзи җайларда лагердикиләрниң түркүм-түркүмләп сотлиниватқанлиқи һәққидә учурлар тарқалған иди. Бу учурларда сотланғанларниң аз дегәндә 3 йилдин бәш йилғичә, йәнә бәзилириниң болса 10 йилдин 15 йилғичә кесилгәнлики тилға елинған.

Бүгүн қәшқәргә қарита елип барған телефон зияритимиз давамида қәшқәр тоққузақ наһийисидә лагердикиләр үстидин сот арқа-арқидин сот ечиливатқанлиқи, күнигә 50 чә киши үстидин һөкүм чиқириливатқанлиқи, булардин җазасиниң еғир йеникликигә қарап, қәшқәр, үрүмчи вә хитайниң ички өлкилиригә йөткиливатқанлиқи ашкариланди.

Әһвалдин мәлумат бәргән сақчи хадиминиң баян қилишичә, булақсу сақчиханисиниң сиясий йетәкчиси нәҗмидин бәдәлһаҗи 20 күнниң алдида бир түркүм тутқунларни хитай өлкилиригә йөткәш хизмити бойичә вәзипә өтигән. Бу хадим йәнә хитай өлкилиригә мәһбус йөткәш ишиниң бу йил башланғанлиқи, буниңға қәшқәр түрмилиридики орун йетишмәсликиниң муһим сәвәб болғанлиқини тилға алди.

Җазаси нисбәтән еғир болғанларниң хитай өлкилиригә йөткиливатқанлиқини әскәрткән бу хадим йәнә бир тәрәптин хитай өлкилиридә “тәрбийилиниш” ниң бираз юқири “сәвийилик” болидиғанлиқини илгири сүрди. У йәнә хитай өлкилиригә мәһбус йөткәш ишиға тоққузақ наһийилик сақчи идарисиниң муавин башлиқи ясин абланиңму йетәкчилик қиливатқанлиқини тилға алди. 
Һөрмәтлик радио аңлиғучилар, “үрүмчи кәчлик гезити” ниң 26‏-сентәбир күнидики бир хәвиридә үрүмчидә 10‏-айниң 22‏-күнидин башлап хитай өлкилиригә қатнайдиған пойиз белитиниң сетилмайдиғанлиқи уқтурулған. Хәвәрдә буниң пәқәт линийә тәңшәш үчүн икәнлики әскәртилгән, әмма қатнашниң қачан әслигә келидиғанлиқи билдүрүлмигән. Бу хәвәрму уйғур дияриниң вәзийитини көзәткүчиләрниң, болупму лагердики уйғурларниң хитай өлкилиригә йөткилиш еһтималлиқидин әндишә қиливатқан паалийәтчиләрниң күчлүк диққитини тартмақта.