Qeshqerdiki lagérlardin bir türküm tutqunlarning xitay ölkilirige yötkelgenliki delillendi

Muxbirimiz shöhret hoshur
2018-09-28
Élxet
Pikir
Share
Print
Etrapi sim tor we qoralliq eskerler bilen qorshalghan "Terbiyelesh lagéri".
Etrapi sim tor we qoralliq eskerler bilen qorshalghan "Terbiyelesh lagéri".
Social Media

Yéqinqi heptilerdin béri jem'iyet xewerliride Uyghur diyaridiki yighiwélish lagérlirida tutup turuluwatqanlarning bir qismi üstidin sot échiliwatqanliqi we bulardin bir türkümining xitay ölkilirige yötkiliwatqanliqi heqqide gep-sözler tarqalghan idi. Muxbirimizning bu heqtiki éniqlishi dawamida ghuljidiki lagérdikilerdin bir türkümining sotliniwatqanliqi aydinglashqan idi. Muxbirimizning bu heptidiki éniqlishi dawamida qeshqerdiki lagérdikiler üstidinmu sot échiliwatqanliqi we bir türkümining xitay ölkilirige mexpiy halda yötkiliwatqanliqi bir saqchi xadimi teripidin delillendi.

Hörmetlik radi'o anglighuchilar, aldinqi heptilerde ijtima'iy taratqularda Uyghur aptonom rayonidiki bezi jaylarda lagérdikilerning türküm-türkümlep sotliniwatqanliqi heqqide uchurlar tarqalghan idi. Bu uchurlarda sotlan'ghanlarning az dégende 3 yildin besh yilghiche, yene bezilirining bolsa 10 yildin 15 yilghiche késilgenliki tilgha élin'ghan.

Bügün qeshqerge qarita élip barghan téléfon ziyaritimiz dawamida qeshqer toqquzaq nahiyiside lagérdikiler üstidin sot arqa-arqidin sot échiliwatqanliqi, künige 50 che kishi üstidin höküm chiqiriliwatqanliqi, bulardin jazasining éghir yéniklikige qarap, qeshqer, ürümchi we xitayning ichki ölkilirige yötkiliwatqanliqi ashkarilandi.

Ehwaldin melumat bergen saqchi xadimining bayan qilishiche, bulaqsu saqchixanisining siyasiy yétekchisi nejmidin bedelhaji 20 künning aldida bir türküm tutqunlarni xitay ölkilirige yötkesh xizmiti boyiche wezipe ötigen. Bu xadim yene xitay ölkilirige mehbus yötkesh ishining bu yil bashlan'ghanliqi, buninggha qeshqer türmiliridiki orun yétishmeslikining muhim seweb bolghanliqini tilgha aldi.

Jazasi nisbeten éghir bolghanlarning xitay ölkilirige yötkiliwatqanliqini eskertken bu xadim yene bir tereptin xitay ölkiliride "Terbiyilinish" ning bir'az yuqiri "Sewiyilik" bolidighanliqini ilgiri sürdi. U yene xitay ölkilirige mehbus yötkesh ishigha toqquzaq nahiyilik saqchi idarisining mu'awin bashliqi yasin ablaningmu yétekchilik qiliwatqanliqini tilgha aldi. 
Hörmetlik radi'o anglighuchilar, "Ürümchi kechlik géziti" ning 26‏-séntebir künidiki bir xewiride ürümchide 10‏-ayning 22‏-künidin bashlap xitay ölkilirige qatnaydighan poyiz bélitining sétilmaydighanliqi uqturulghan. Xewerde buning peqet liniye tengshesh üchün ikenliki eskertilgen, emma qatnashning qachan eslige kélidighanliqi bildürülmigen. Bu xewermu Uyghur diyarining weziyitini közetküchilerning, bolupmu lagérdiki Uyghurlarning xitay ölkilirige yötkilish éhtimalliqidin endishe qiliwatqan pa'aliyetchilerning küchlük diqqitini tartmaqta.

Toluq bet