Мисирдин қайтқан оқуғучи 12 яшлиқ һәзритиели мәмәтниң дадиси 7 йиллиқ кесилгән

Мухбиримиз шөһрәт һошур
2017-07-31
Share
urumchi-sheherlik-1-turme-305.jpg Уйғур академик илһам тохти өмүрлүк қамақ җазасиға һөкүм қилинғандин кейин қамалған үрүмчи шәһәрлик 1-түрмә. 2014-Йили 24-сентәбир, үрүмчи.
Photo: RFA

Биз өткән һәптиләрдә мисирдин қайтқан 12 яшлиқ оқуғучи һәзритиели мәмәтниң бир мәһәл тутуп тәкшүрүлгәндин кейин кәнттә нәзәрбәнт қилинғанлиқи, әмма уни мисирдин елип қайтқан ата-анисиниң ақивити мәлум әмәсликини хәвәр қилған идуқ, мухбримизниң илгириләп әһвал ениқлиши давамида һәзритиелиниң дадиси мәмәт абләтниң  йопурға наһийилик сот мәһкимиси тәрипидин бу йил23 ‏-май күни 7 йиллиқ кесилгәнлики ашкариланди.  Мәлум болушичә сот һөкүмидә униң топлишип җәмийәт тәртипини бузуш җинайити билән әйибләнгән. Әмма кәнт аманлиқ мудири мәмәт абләтниң кесилишидә балисини мисирға әвәтишниң муһим сәвәп болғанлиқини тилға алди. Төвәндә мухбримиз шөһрәт һошурниң бу һәқтә тәйярлиған программиси диққитиңларда болиду.

Һөрмәтлик радио аңлиғучилар, 12 яшлиқ һәзритиели мәмәтниң чәтәлдики уруқ-туғқанлиридин бириниң ашкарилишичә, униң әсли исми әмрулла болуп, йеқинқи исим өзгәртиштә, һәзритиели мәмәткә өзгәртилгән.  Йопурға наһийә йәкшәнбә базар3 ‏-кәнт секритариниң баян қилишичә, әмрулланиң дадиси мәмәт абләт  15 йил бурун үрүмчигә көчүп барған. Илгири  ислам институтини пүттүргән мәмәт абләт, тутқун қилиништин бурун үрүмчи бәйтулла мәсчитиниң ярдәмчи имамлиқ вәзписини өтәватқан икән.

Биз мәмәт абләтниң кесилгәнлик  хәвирини аңлиғандин кейин, униң кесилиш сәвәби һәққидә, алақидар кәнт мудирини зиярәт қилдуқ. Аманлиқ мудири,  мәмәт абләтниң 7 йил кесилгәнлики һәққидики сот һөкүмини өзиниң тапшуруп алғанлиқи вә аилисигә йәткүзгәнликини билдүрди вә қолида бар болған сот һөкүмини оқуп бәрди. Һөкүмдә мәмәт абләтниң топлишп җәмийәт тәртипини бузғанлиқи тилға елинған, әмма конкрет, қәйәрдә, қандақ бир һәрикәт билән җәмийәт тәртипини бузғанлиқи тилға елинмиған.

Һөрмәтлик радио аңлиғучилар  өзи ислам институтини оқуған, үрүмчидә икки мәсчиттә 3 йилға йеқин имамлиқ қилған вә пәрзәнтини әзһәр университида оқутушни арзу қилған бир диний затниң топлишип җәмийәт тәртипини бузуш билән шуғуллиниши мүмкинму? биз бу соалға  мәзкур кәнт аманлиқ мудириниң еғизидин җавап елишқа тирштуқ: делониң тәпсилатидин хәвәрсизликини билдүргән мәзкур аманлиқ мудири униң кесилиши сәвәбигә икки хил еһтималлиқни көрсәтти: бирси  достлириниң пәрзәнтлиригә диний дәрс бәргәнлики, йәни бирси өз оғлини мисирға оқушқа әвәткәнлики.

Һөрмәтлик радио аңлиғучилар, юқирида мисирдин қайтип кәлгән 12 яшлиқ оқуғучи һәзритиели )әмрулланиң(  дадиси мәмәт абләтниң 7 йиллиқ кесилгәнлики һәққидә аңлитиш бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт