Misirdin qaytqan oqughuchi 12 yashliq hezriti'éli memetning dadisi 7 yilliq késilgen

Muxbirimiz shöhret hoshur
2017-07-31
Share
urumchi-sheherlik-1-turme-305.jpg Uyghur akadémik ilham toxti ömürlük qamaq jazasigha höküm qilin'ghandin kéyin qamalghan ürümchi sheherlik 1-türme. 2014-Yili 24-séntebir, ürümchi.
Photo: RFA

Biz ötken heptilerde misirdin qaytqan 12 yashliq oqughuchi hezriti'éli memetning bir mehel tutup tekshürülgendin kéyin kentte nezerbent qilin'ghanliqi, emma uni misirdin élip qaytqan ata-anisining aqiwiti melum emeslikini xewer qilghan iduq, muxbrimizning ilgirilep ehwal éniqlishi dawamida hezriti'élining dadisi memet abletning  yopurgha nahiyilik sot mehkimisi teripidin bu yil23 ‏-may küni 7 yilliq késilgenliki ashkarilandi.  Melum bolushiche sot hökümide uning topliship jem'iyet tertipini buzush jinayiti bilen eyiblen'gen. Emma kent amanliq mudiri memet abletning késilishide balisini misirgha ewetishning muhim sewep bolghanliqini tilgha aldi. Töwende muxbrimiz shöhret hoshurning bu heqte teyyarlighan programmisi diqqitinglarda bolidu.

Hörmetlik radi'o anglighuchilar, 12 yashliq hezriti'éli memetning chet'eldiki uruq-tughqanliridin birining ashkarilishiche, uning esli ismi emrulla bolup, yéqinqi isim özgertishte, hezriti'éli memetke özgertilgen.  Yopurgha nahiye yekshenbe bazar3 ‏-kent sékritarining bayan qilishiche, emrullaning dadisi memet ablet  15 yil burun ürümchige köchüp barghan. Ilgiri  islam institutini püttürgen memet ablet, tutqun qilinishtin burun ürümchi beytulla meschitining yardemchi imamliq wezpisini ötewatqan iken.

Biz memet abletning késilgenlik  xewirini anglighandin kéyin, uning késilish sewebi heqqide, alaqidar kent mudirini ziyaret qilduq. Amanliq mudiri,  memet abletning 7 yil késilgenliki heqqidiki sot hökümini özining tapshurup alghanliqi we a'ilisige yetküzgenlikini bildürdi we qolida bar bolghan sot hökümini oqup berdi. Hökümde memet abletning toplishp jem'iyet tertipini buzghanliqi tilgha élin'ghan, emma konkrét, qeyerde, qandaq bir heriket bilen jem'iyet tertipini buzghanliqi tilgha élinmighan.

Hörmetlik radi'o anglighuchilar  özi islam institutini oqughan, ürümchide ikki meschitte 3 yilgha yéqin imamliq qilghan we perzentini ezher uniwérsitida oqutushni arzu qilghan bir diniy zatning topliship jem'iyet tertipini buzush bilen shughullinishi mümkinmu? biz bu so'algha  mezkur kent amanliq mudirining éghizidin jawap élishqa tirshtuq: déloning tepsilatidin xewersizlikini bildürgen mezkur amanliq mudiri uning késilishi sewebige ikki xil éhtimalliqni körsetti: birsi  dostlirining perzentlirige diniy ders bergenliki, yeni birsi öz oghlini misirgha oqushqa ewetkenliki.

Hörmetlik radi'o anglighuchilar, yuqirida misirdin qaytip kelgen 12 yashliq oqughuchi hezriti'éli )emrullaning(  dadisi memet abletning 7 yilliq késilgenliki heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet