Misirdiki oqughuchilar: tutqun qilish dawamlishiwatidu

Ixtiyariy muxbirimiz ihsan
2017-07-28
Share
misir-uyghur-oqughuchi-5.jpg Misirdiki Uyghur oqughuchilar tutqun qilinip saqchi mashinisida élip kétiliwatqan körünüsh. 2017-Yili 6-iyul.
Tutqun qilinghan oqughuchilar özliri teminligen

Misirdiki Uyghur oqughuchilarni tutqun qilish herikitini xitay elchixanisining teshkillishi bilen misir saqchilirining keng-kölemlik élip barghanliqigha bügün 25 kün boldi.Bu tutqun qilish herikitide misirdiki oqughuchilar teminligen tizimlikte 200 ge yéqin oqughuchi misirning her qaysi sheherliride oxshimighan nuqtilarda tutqun qilin'ghan bolsa, az bir qisim oqughuchilar yene misirning her qaysi sheherliride mökünüp turmaqta.

Bizge uchur qilghan, misirning herqaysi sheherliride mökünüp turghan oqughuchilarning bayan qilishiche, misir saqchilirining yene öy axturushni dawam qiliwatqanliqi, Uyghur oqughuchilarning axturulghan öylirige péchet sélin'ghan bolghachqa, kirishke mumkin emesliki, beziler rayonlarda péchet sélin'ghan öylerge nersilirini alghili kélidu dep xitay elchixanisi teripidin paylaqchilar orunlashturghanliqi hemde bezi yerlik misirliqlarning öyide möküp turuwatqan oqughuchilar paylaqchilarning pash qilishi bilen, misir saqchiliri teripidin tutqun qiliniwatqanliqi hemde bezi mökünüp turghan oqughuchilar alaqe wasitiliri uchurlirida yardem sorap, toplargha yollighan uchurliri arqiliqmu öz orunlirini pash qilip qoyuwatqanliqi ilgiri sürülmekte.

Misirning melum shehiride mökünüp turuwatqan Uyghur qizi ziyaritimizni qobul qilip, özi shahit bolghan ishlarni hemde özining hazirqi ehwallirini anglatti.U sözide, misirdiki özige oxshash tutqun qilishqa uchrighan oqughuchilargha yardem qilghan barliq Uyghurlargha rehmitini bildürdi hemde ulardin özliri üchün salih du'alirini ayimasliqini telep qildi.

Misirda yoshurunup turuwatqan, ismini ashkara qilishni xalimighan bir Uyghur yash özining etrapidiki misirliq ölimalardin igiligen uchurliridin, misir bixeterlik idarisi xadimliri ezher uniwérsitétidin iqamet élish üchün tizimgha aldurghan pütün Uyghur oqughuchilarning tizimlikini élip ketkenliki , möküp yürgen oqughuchilarni tutqun qilishta misirdiki xitay elchixanisi teripidin tesis qilin'ghan oqughuchilar uyushmisining mu'awin re'isi ablimit ablikim bashliq bir qisim Uyghurlar aktip rol oynawatqanliqi, xitay da'iriliri bu qétimliq tutqun qilishta, özliri közligen Uyghurlarni tutalmighanliqi qatarliqlar melum bolghanliqini bayan qildi.

Shiwétsiyede pa'aliyet qiliwatqan siyasiy aktiplardin abbas ependi misirda yoshurunup yürgen Uyghur oqughuchilargha misir saqchilirining tutqun qilishidin saqlinishta diqqet qilishqa da'ir ishlar heqqide tewsiyede boldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet