Qaynaqsuda köyüp ketken esma exmet 3 kün'giche jiddiy qutquzushqa apirilmighan

Muxbirimiz shöhret hoshur
2018-03-01
Élxet
Pikir
Share
Print
Ijtima'iy taratqularda tarqalghan köktérek yéza qagha kent ahaliler komitéti namidiki bir muraji'etname.
Ijtima'iy taratqularda tarqalghan köktérek yéza qagha kent ahaliler komitéti namidiki bir muraji'etname.
Social Media

Bügün ijtima'iy taratqularda köktérek yéza qagha kent ahaliler komitéti namida bir muraji'etname tarqaldi.

Muraji'etnamide "Terbiyelesh" ke ekétilgen exmet ablizning qizi esma exmetning üstige qaynaqsu tökülüp köyüp ketkenliki bildürülgen we ürümchide dawalitish üchün kenttiki ahaliler iqtisadiy jehettin yardemge chaqirilghan. Muxbirimizning mezkur weqeni éniqlishi dawamida muraji'etnamide tilgha élin'ghan köktérek yézisining guma nahiyesige tewe ikenliki delillendi. Weqe yüz bérip 3 kün'ge qeder tégishlik dawalash ornigha apirilmighan esma exmetning nöwettiki ehwali téxi aydinglashmidi.

Mezkur muraji'etnamide "Terbiyelesh" tiki exmet ablizning qizi esma exmetke öyidiki mesh örülüp kétip üstige qaynaqsu tökülüp ketkenliki, esmaning bedinining 60 pirsentining köyüp ketkenliki bayan qilin'ghan. Muraji'etnamide yene esma exmetning ürümchige dawalashqa apirilishi üchün 300 ming yüen kétidighanliqi tilgha élin'ghan we kent ahaliliri iqtisadiy jehettin yardemge chaqirilghan.

Alaqidar matériyallarda köktérek yézisining guma nahiyesige tewe ikenliki bayan qilin'ghan. Shunga biz aldi bilen köktérek yéziliq saqchixanigha téléfon qilduq. Saqchixana xadimi üstige qaynaqsu tökülgen esma exmetning 20-kent, yeni qagha kentke tewe alidin ikenliki we weqedin özining xewerdar ikenlikini éytti. Emma u esma exmetning nöwettiki ehwali heqqide melumat bérilmidi.

Muraji'etnamide yézilishiche, weqe 17‏-féwral küni yüz bergen, muraji'etname 21-féwral küni chiqirilghan. Melumki, 3 kün'ge qeder esma exmet ürümchige élip bérilmighan. Biz uning yéziliq we wilayetlik doxturxanigha apirilghan yaki apirilmighanliqini éniqlash üchün alaqidar sehiye tarmaqlirighimu téléfon qilduq. Wilayetlik jiddiy qutquzush orni weqedin xewersizlikini éytti. Yéziliq saqchixana xadimliri yéziliq doxturxanining téléfon nomurini bérishnimu ret qildi.

Mezkur muraji'etnamide exmet abliz a'ilisining 7 janliq bir a'ile ikenliki, iqtisadiy jehettin qiyinchiliqi barliqi eskertilgen. Biz exmet abliz a'ilisining qalghan ezalirining ehwalini, jümlidin esma exmet üstige qaynaqsu töküwalghanda a'ilide chonglarning bar-yoqluqini bilip béqish üchün köktérek saqchixanisigha qayta téléfon qilduq. Saqchi xadimliri bu heqtiki uchurlarning dölet mexpiyetliki ikenliki we ashkariliyalmaydighanliqini éytti.

Nöwette Uyghur rayonining köpinche jaylirida bir a'ilidin az dégende bir kishining "Yépiq terbiyelesh lagéri" da ikenliki melum bolmaqta. Biz exmet abliz a'ilisidin qanche kishining lagérda ikenliki heqqide ahalilerdin melumat soriduq. Ahaliler mesh örülüp üstige qaynaqsu tökülgen we bedinining 60 pirsenti köyüp ketken esma exmetning qanche yash ikenliki heqqidimu melumat bérishke jür'et qilalmidi.

Toluq bet