Мустафа йигит: уйғурлар мусулман вә түркий хәлқ болғачқа зулумға учримақта

Ихтиярий мухбиримиз әркин тарим
2013-07-31
Елхәт
Пикир
Share
Принт
Афйон вилайитидә чақирилған «шәрқий түркистан вә кәркүк мәсилиси» йиғинида сөз қилғанлар. 2013-Йили июл, түркийә.
Афйон вилайитидә чақирилған «шәрқий түркистан вә кәркүк мәсилиси» йиғинида сөз қилғанлар. 2013-Йили июл, түркийә.
RFA/Erkin Tarim

Түркийәниң оттура райониға җайлашқан афйон вилайитидә «шәрқий түркистан вә кәркүк мәсилиси» темисида йиғин чақирилди. Афйонқараһисар яшлар мунбири тәрипидин чақирилған йиғин түркийәниң азадлиқ марши билән башланди.

Афйонқараһисар яшлар мунбириниң мәсули мәмәт өз әпәнди ечилиш нутқида, бу хил йиғинни чақириштики мәқситиниң афйон хәлқигә ата вәтини шәрқий түркистан һәққидә мәлумат бериш вә уларға мәниви җәһәттинму болса ярдәм бериш икәнликини тәкитлигән. Арқидин мутәхәссисләр ирақ түркмәнлири, афғанистандики түркий милләтләр вә уйғурлар тоғрисида доклат бәргән. Афғанистандики өзбекләрниң рәһбири рашит достумниң оғлиму сөз қилған.

Бу йиғинда, мустафа йигит әпәнди «ялғузлуққа ташливетилгән ата вәтинимиз шәрқий түркистан» темисида сөз қилған. У доклатида: түркләрниң ата вәтини вә ислам дининиң бөшүки болған шәрқий түркистандики уйғурларниң зулумға учришиши уларниң мусулман вә түрк болғанлиқидин ибарәт икәнликини илгири сүргән.

4 Йил таҗикистанда оқутқучилиқ қилған, оқуғучилиқ йиллиридин башлап уйғур мәсилисигә қизиқип келиватқан мустафа йигит әпәнди, түркләрниң ата вәтини, түркләрниң тунҗи болуп ислам дини билән нурланған җайи шәрқий түркистанниң һазир хитайниң ишғали астида икәнликини, уйғур түрклириниң еғир бесим астида икәнликини, түрк һөкүмитиниң уйғурларға игә чиқиши керәкликини ейтқан.

Бу йиғинға сабиқ парламент әзаси мәхмут қочақ әпәндиму қатнашқан болуп, у өз сөзидә түрк яшлириниң шәрқий түркистан мәсилисигә көңүл бөлүши керәкликини тәкитлигән.

«Қоҗатәпә.Хәвәр» тор бекитидә елан қилинған хәвәргә асасланғанда 26-июл күни кәч афйонқараһисардики ясәмин залида өткүзүлгән бу йиғинда, түркийә һөкүмитиниң әрәб дөләтлири билән болуп кетип шәрқий түркистан вә кәркүк мәсилилиригә йетәрлик дәриҗидә көңүл бөлмәйватқанлиқини, әслидә мәзкур мәсилиләрниң түркийәниң миллий мәсилиси болуши керәклики тәкитләнгән.

5-Июл үрүмчи вәқәсидин кейин уйғурлар тоғрисида чақирилған бу хил йиғинларниң сани барғансери көпәймәктә. Бу хил доклат бериш йиғинлириниң уйғур дәвасиға қандақ тәсири болар? бу хил йиғинларға түркләрниң көпләп қатнишиши неминиң аламити? дегәнгә охшаш соалларға җаваб тепиш үчүн шәрқий түркистан вәқпиниң сабиқ баш катипи һамут гөктүрк әпәндигә микрофонимизни узаттуқ. У, бу хил доклат бериш йиғининиң шәрқий түркистан дәвасини түркийәниң миллий дәвасиға айландуруш үчүн интайин әһмийәтлик икәнликини баян қилип өтти.

Пикирләр (0)
Share
Толуқ бәт