Mutellip iminning dawamliq nezerbend qilinishi diqqet qozghidi

Muxbirimiz méhriban
2013-11-07
Share
mutellip-imin-uyghurbiz-bashqurghuchi.jpg Uyghurbiz torining béyjing ayrodromida ghayib bolghan tor bashqurghuchisi mutellip imin. (Yéqinqi süriti)
www.uighurbiz.net

Türkiyede oquwatqan mutellip imin, 7-ayning 15-küni, béyjing paytext ayrodromida xitay saqchiliri teripidin héchqandaq resmiyetsiz tutqun qilin'ghan bolup, u 10-ayning 1-küni öyige qayturuwétilgen. Emma pasporti we kimliki tartiwélinip özi yenila a'ilisige nezerbend qilin'ghan. Mutellip imin yéqinda Uyghurbiz torida ochuq xet élan qilip özining ehwalini bildürgendin kéyin, radi'omiz bashqa yollar arqiliq uning nöwettiki ehwali heqqide yéngi uchurlarni igilidi.

Istanbul uniwérsitétining magistir aspiranti mutellip imin, 5-noyabir küni Uyghur biz torida ochuq xet élan qilip, béyjing ayrodromida saqchilar teripidin tutqun qilinip, ürümchidiki melum méhmanxanida 79 kün soraq qilin'ghandin kéyin, öyige qayturulghan bolsimu,yenila nezerbend astida turuwatqanliqini bildürüp, jem'iyettin yardem telep qilghan idi. Radi'omiz muxbiri chyaw lung mutellipke uchur yollash arqiliq uning nöwettiki ehwalini igilidi.

Mutellip imin radi'omiz muxbirigha yollighan éléktronluq uchurida, saqchilar uning sirt bilen alaqilishishini chekligenliki üchün, yénida hetta téléfonmu yoqluqini bildürgen. Mutellip yene saqchilargha qoyghan telepliri heqqidimu toxtilip "Men ulardin kimlikimni we pasportimni qayturup bérishni telep qildim, emma ular buninggha perwa qilmidi. Men ulargha yene istanbulgha qaytip u yerdiki magistirliq oqushumni dawamlashturushum kéreklikinimu éyttim. Ularning méning qanuniy heq-hoququmgha dexli qilmasliqini telep qildim" dégen.

7-Noyabir peyshenbe küni radi'omiz Uyghur bölümining ziyaritini qobul qilghan ilham toxti ependi mutellip iminning nöwettiki ehwali heqqide toxtaldi.

Ilham toxti ependi charshenbe küni radi'omiz xitay bölümining ziyaritini qobul qilghandimu mutellip iminning ehwali heqqide toxtalghan idi.

Ilham toxti ependi sözide, "Ular( mutellipni soraq qilghan saqchilar) hazir mutelliptin qéchip yürüwétiptu. Men ularning néme üchün bundaq qiliwatqanliqini chüshinelmidim. Hazir mutellipning yénida kimliki yoq, xizmitimu yoq, uning chet'elge chiqip, oqushini dawamlashturush imkaniyitimu yoq. Mutellipning pasporti we kimlikini shinjang da'iriliri tutup qaldi." dégen.

Ilham toxti ependi yene saqchilarning mutellip iminni tutqun qilip, soraq qilishidiki meqsiti heqqide öz qarashlirini otturigha qoyup,"Emeliyette shinjang saqchiliri oqughuchi mutellip arqiliq, méni edeplimekchi. Ular mutellipke mejburiy halda bezi yalghan iqrarnamilerni yazduruptu, andin bularni yadliwélishqa mejburlaptu, uninggha, artislargha oxshash maharet bilen özliri yazghan nersilerni xenzuche we Uyghurche ikki tilda qayta-qayta oqutuptu. Ular mutellipni sin'alghughimu éliptu. Bularni manga mutellip éytqan idi" dégen bayanlarni bergen.

Uyghurbiz torida élan qilin'ghan xewerler we radi'omiz Uyghur bölümi igiligen ehwallardin melum bolushiche, yéqindin buyan da'iriler ilham toxti ependi ishlewatqan merkizi milletler uniwérsitétida oqughan Uyghur oqughuchilardin, ilgiri kéyin bolup, shöhret tursun, mutellip imin, perhat qatarliq oqughuchilargha qarita tutup kétip soraq qilish,söhbet namida chaqirtish qatarliq her xil wasitilerni qollinip, ulardin ilham toxtigha we ilham toxti sahipliqidiki Uyghurbiz torigha munasiwetlik ehwallarni sorighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet