D u q rehberliri: démokratik hökümetler we xelq'ara teshkilatlar bilen alaqilirimizni téximu kücheytimiz

Muxbirimiz irade
2018-03-06
Élxet
Pikir
Share
Print
D u q torbétige chiqirilghan amérika döletlik axbarat kulubida ötküzülmekchi bolghan muxbirlarni kütüwélish yighini toghrisidiki uqturush. 2018-Yili 6-mart.
D u q torbétige chiqirilghan amérika döletlik axbarat kulubida ötküzülmekchi bolghan muxbirlarni kütüwélish yighini toghrisidiki uqturush. 2018-Yili 6-mart.
uyghurcongress.org

7-Mart charshenbe küni, dunya Uyghur qurultiyi we amérika Uyghur kishilik hoquq qurulushi birlikte amérika döletlik axbarat kulubida muxbirlarni kütüwélish yighini uyushturidu. Bu yighin'gha dunya Uyghur qurultiyi re'isi dolqun eysa ependi özi biwasite qatnishidighan bolup, dolqun eysa ependi yighinda xelq'ara saqchi teshkilati(intérpol) teripidin özi üstidin chiqirilghan tutush buyruqining emeldin qaldurulush mesilisini chöridigen asasta Uyghurlarning weziyiti üstide melumat béridiken. Biz bu munasiwet bilen dolqun eysa ependi we ömer qanat ependilerni radiyomizda ziyaret qilip, ular bilen söhbet élip barduq.

Dolqun eysa ependi söhbitimizde, amérika axbarat kulubidiki bu yighinning dunya Uyghur qurultiyining xizmet pilanliridiki muhim bir kün tertip ikenlikini éytti. U, bu yighin arqiliq xelq'ara axbarat sahesige xitay hökümitining qandaq qilip "Xelq'ara saqchi teshkilati" dek organlarni suyi'istémal qilip, uni siyasiy öktichilerni basturush wasitisi qiliwalghanliqi, özi üstidiki bu tutush buyruqini emeldin qaldurush yolida ishlen'gen xizmetlerni, herqaysi xelq'araliq organlarning bu jehettiki tirishchanliqliri qatarliq bir qatar uzun we murekkep jeryanlarni birmu-bir anglitidighanliqini éytti.

Amérika Uyghur kishilik hoquq qurulushi bashliqi ömer qanat ependi sözide, dolqun eysa ependi üstidiki bu tutush buyruqining bikar qilinishi dolqun eysa ependi shundaqla Uyghur dawasi üchün zor bir ghelibe ikenlikini, buning hem dunyada iqtisadiy küchi arqiliq hemmini boyun egdürüshke urunuwatqan xitay üchünmu nahayiti muhim bir signal ikenlikini bildürdi.

Dolqun eysa ependi we ömer qanat ependiler sözide: "Nöwette xitay hökümitining öz iqtisadi tesir küchini qollinip, dunya siyasitini kontrol qilmaqchi boluwatqanliqi, dunyada ortaq shekillen'gen démokratik qimmet-qarashlirini özgertip, uning ornigha özining siyasiy tüzümini dessetmekchi boluwatqanliqi su yüzige chiqiwatidu. Dunyaning xitaygha bolghan tonushi éshiwatidu. Buning bilen birlikte Uyghurlarning béshigha kéliwatqan zulumni biliwatqanlarmu köpiyiwatidu" dédi. Shunga ular bu weziyetning Uyghur milliy dawasini kücheytish üchün belgilik ijabiy rol oynaydighanliqini bildürdi.

Dolqun eysa ependi söhbitimizde, dunya Uyghur qurultiyining bundin kéyin herqaysi démokratik eller hökümetliri we organliri bilen bolghan munasiwetni kücheytishke ehmiyet béridighanliqini hem bu arqiliq xitay hökümiti üstide bésim shekillendürüshke tirishidighanliqini éytti.

Ömer qanat ependi özlirining yene, amérikida we dunyaning bashqa jayliridiki xelqlerning Uyghur mesilisige bolghan tonushini artquzush arqiliq Uyghurlar üchün bir keng kölemlik jama'et pikiri hasil qilish üchün izdinidighanliqini bildürdi.

Toluq bet