Ойманбайтоқайдики 41 нәпәр сиясий тутқундин 18 нәпири қоюп берилгән

Мухбиримиз шөһрәт һошур
2016-04-01
Share
xoten-tutqun-partlash-qarshiliq.jpg Үрүмчи, йәкән қатарлиқ җайларда партлаш йүз бәргәндин кейин, хитай сақчилириниң уйғурларни тутқун қиливатқан көрүнүши. 2014-Йили 27-май, хотән.
Oqurmen teminligen

Ғулҗа наһийисиниң ойманбайтоқай кәнтидә 41 нәпәр кишиниң компартийә әзасиниң нәзиригә бармиғанлиқи үчүн тутқун қилинғанлиқи өткән һәптә дуняға ашкариланған иди. Мәлум болушичә, булардин салаһидин заман қатарлиқ 18 нәпири мушу һәптиниң чаршәнбә күни қоюп берилгән.

Мухбиримиз қоюп берилгәнләр һәққидә мәлумат игиләш давамида әйни чағда йәни икки айниң алдида мәзкур 41 тутқунниң башланғуч мәктәптә оқуватқан балилириниңму сақчихана апирип сорақ қилинғанлиқи вә диний паалийәтләргә қетилмаслиқ һәққидә агаһландурулғанлиқи ашкариланди.

Әһвалдин хәвәрдар кишиләр рдийомизға мәктуп йоллап ойманбайтоқайда тутқун қилинған 41 сиясий мәһбустин 18 нәпириниң қоюп берилгәнликини мәлум қилди. Биз бу учурниң тоғрилиқини ениқлаш үчүн әң аввал араөстәң йезилиқ сақчиханиға телефон қилдуқ. Сақчи хадими 18 нәпәр тутқунниң қоюп берилгәнликини дәлиллигән болсиму, уларниң немә үчүн қоюп берилгәнлики, қалғанлириниң немә үчүн тутуп турулуватқанлиқи һәққидә мәлумат беришни рәт қилди.

Ойманбайтоқайдики бир мәһәллә башлиқиму салаһидин заман қатарлиқ 18 нәпәр тутқунниң қоюп берилгәнликини ашкарилиди, әмма уму буларниң қоюп берилиш сәвәбидин хәвәрсиз икәнликини ейтти.

Йәнә бу мәһәллә башлиқиниң ашкарилишичә, буниңдин икки ай аввал мәзкур 41 мәһбус тутқун қилинғанда уларниң башланғуч мәктәптә оқуватқан балилириму сақчиханиға апирип сораққа тартилған вә улар диний паалийәткә қетилмаслиқ һәққидә агаһландурулған. Нарәсидә балиларға қарита елип берилған бу сорақ уларниң роһий кәйпиятиға қаттиқ тәсир қилған.

Йәнә бир сақчи хадиминиң баянлиридин мәлум болушичә, имам әнвәр һәсән, мәзин әкбәр нәсирдин қатарлиқ 23 тутқун давамлиқ һалда тутуп турулмақта. Улар компартийә әзаси һарун дегән кишиниң нәзиригә бармиғанлиқидин ибарәт аталмиш җинайити үчүн уларға қандақ җаза берилидиғанлиқи һазирчә мәлум әмәс.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт