Meriyemxan ana: “Tutqundiki oghlum niyaz qahar 40 yéshini türmide kütüwaldi!”

13 Yilliq qamaq jazasigha höküm qilin'ghan wijdan mehbusi niyaz qahar eslide “Ürümchi kechlik géziti” ning yash muxbiri idi.

U 2000-yillarning bashlirida “Altun tarim” tor bétini qurup, uni Uyghur diyaridiki körüsh nisbiti eng yuqiri bolghan ilmiy, edebiy, tarixiy we uniwérsal xaraktérlik Uyghurche tor betlirining birige aylandurghan.

“5-Iyul weqesi” yüz bérip aridin 21 kün ötkende, yeni 2009-yili 7-ayning 26-küni yash muxbir niyaz qahar ürümchidiki öyidin yoshurunche tutup kétilgen.

Shuningdin kéyin a'ilisidikiler uning iz-dérikini bir yilghiche alalmighan, hetta uni “5-Iyul weqesi” jeryanida ölüp ketken bolushi mumkin dep oylighan. Halbuki, aridin bir yildek waqit ötüp, 2010-yilining yaz mezgilige kelgende a'ilisidikiler andin uning “Döletni parchilashqa qutratquluq qilghan” dégen jinayet bilen ürümchi sheherlik ottura sot mehkimisi teripidin 13 yilliq qamaq jazasigha höküm qilin'ghanliqini uqqan.

Uning qan bésimi késilige giriptar bolghan dadisi bu kütülmigen zerbidin yiqilip chüshken hemde méngisige qan chüshüp palech bolup qalghan. Aridin 4 yil ötkende alemdin ötken.

Yalghuz ana meriyemxan türmidiki oghlini kütüp 6 yilni ötküzgen. Yilda bir qétim shixo türmisige bérip oghli bilen aran 15 minuttin körüshüp turghan.

Wijdan mehbusi niyaz qaharning anisi meriyemxan türmidiki oghlining yéqinda top-toghra 40 yashqa kirgenlikini tilgha aldi.

U yéqinda radi'omiz ziyaritini qobul qilip, özining ikki heptining aldida shixu türmisige bérip eynek tosuqning ichidiki oghli bilen aran 15 minutche körüshkenlikini bildürdi.

Niyaz qaharning singlisimu radi'omiz ziyaritini qobul qilghanda, akisi tutulup 6 yildek waqit ötken bügünki künde uning zadi 13 yil türme azabi tartqudek qandaq “Jinayet” ötküzgenliki téxiche özlirige qarangghu ikenlikini bildürdi.

Wijdan mehbusi niyaz qaharning hazir gollandiyede yashawatqan dostliridin abdushükür ependi radi'omiz ziyaritini qobul qilip, öz héssiyati we oylighanlirini anglarmenler bilen ortaqlashti.

Tepsilatini awaz ulinishtin anglighaysiz.