Норвегийәдики уйғурлар хитайға қарши намайиш садалирини яңратти

Норвегийәдә өткүзүлгән “5-феврал ғулҗа вәқәси” ни хатириләш намайишидин көрүнүш. 2018-Йили 5-феврал, осло.

Норвегийәдә өткүзүлгән “5-феврал ғулҗа вәқәси” ни хатириләш намайишидин көрүнүш. 2018-Йили 5-феврал, осло.

5-Феврал күни апақ қар либасиға чөмүлгән шималий явропадики норвегийәдә уйғур җамаитиниң хитайға қарши наразилиқ садалири йәнә яңриди.

Шу күни норвегийә пайтәхти ослодики хитай әлчиханиси алдиға йиғилған уйғур намайишчилар қоллирида ай-юлтузлуқ көк байрақни җәвлан қилдуруп, буниңдин 21 йил бурунқи “5-феврал ғулҗа вәқәси” ни хатирилиди шундақла хитай һөкүмитиниң уйғур диярида йүргүзүватқан инсан қелипидин чиққан зулумиға наразилиқ билдүрди.

Бу қетимқи намайиш норвегийә уйғур комитетиниң тәшкиллиши, “норвегийә уйғур ислам мәдәнийәт мәркизи” ниң һәмкарлишиши билән елип берилди. Намайишқа пайтәхт осло вә йеқин әтраптики шәһәрләрдин кәлгән 60 қа йеқин киши қатнашти.

Намайишта норвегийә уйғур комитети ясиған лозунка вә плакатлар намайишчиларниң қоллиридики ай-юлтузлуқ көк байрақлар билән қошулуп намайиш мәйданини аҗайип һәйвәтлик түскә киргүзгән иди.

Дуня уйғур қурултийи иҗраийә комитетиниң муавин рәиси сәмәт абла әпәнди намайиш башлиниши билән сөз қилип, “5-феврал ғулҗа вәқәси” һәққидә тәпсилий мәлумат бәрди һәмдә шу қетимқи вәқәдә һаятидин айрилған шеһитларға матәм билдүрди.

Намайиш давамида норвегийә уйғур комитетиниң рәиси бәхтияр өмәр әпәндиму сөз қилип, намайишқа қатнашқан җамаәткә рәһмитини билдүрди вә муһаҗирәттә яшаватқан уйғурларниң нөвәттики вәзийәттә қолидин немә кәлсә вәтини вә хәлқи үчүн шуни қилиши лазимлиқини алаһидә тәкитлиди.

Намайиш ахирида “норвегийә уйғур ислам мәдәнийәт мәркизи” ниң йетәкчилиридин өмәр һаҗим сөз қилип, норвегийәдики уйғур яшлириниң вәтән үчүн елип берилған намайишларға актиплиқ билән қатнишишиниң мәйли миллий яки диний мәсулийәт җәһәттин бир бурч икәнликини тәкитләп өтти.

Намайиш ахирлашқандин кейин җамаәт ослодики “норвегийә уйғур ислам мәдәнийәт мәркизи” ниң мәсчитидә җәм болуп, мәрһум диний алим муһәммәд салиһ дамолла һаҗим үчүн ғайибанә җиназа намизи оқуди.

Программиниң тәпсилатини юқириқи аваз улиништин аңлиғайсиз.