Norwégiyediki xitay elchixanisining aldida namayish ötküzüldi

Ixtiyariy muxbirimiz aygül yüsüp
2014.08.11
Share on WhatsApp
Share on WhatsApp
norwegiye-xitay-bayraq-koydurush.jpg Uyghurlar xitay hökümitining Uyghurlar ustidin élip barghan qoralliq basturushlirigha naraziliq bildürüp, xitay elchixanisi alida namayish qilip, xitay dölet bayriqini köydürdi. 2014-Yili 8-awghust, norwégiye.
RFA/Aygul

Dunya Uyghur qurultiyining bir tutash orunlashturushigha asasen norwégiye Uyghur komitéti bilen Uyghur islam merkizi waqitning intayin qisqa bolushigha qarimay jiddiy halda teshkillesh élip bérip, 8-awghust jüme küni paytext oslodiki xitay elchixanisining aldida namayish pa'aliyiti ötküzdi.

Dunya Uyghur qurultiyi, erkin asiya radi'osi qatarliq nopuzluq teshwiqat we uchur menbeliride Uyghur élining yeken nahiyiside yüz bergen weqeler toghrisida ishenchlik xewerler tarqalghandin kéyin, norwégiyediki Uyghurlar “Bu qanliq weqelerge bolghan ghezep- nepritini ipadilesh, xitay hökümitining Uyghur élida bu shekilde arqa-arqidin élip bériwatqan qanliq qirghinchiliq heriketlirini dunya jama'etchilikige bildürüsh hem öz heq -hoquqliri üchün qan töküwatqan, ölüwatqan, türmilerde yétiwatqan qérindashlirigha ige chiqish” meqsitide ish küni bolushigha qarimay, xitay elchixanisining aldigha yighilip namayish ötküzdi.

Gerche bu qétimliq namayish 5-iyulni xatirilesh namayishi bolup uzun ötmigen bir ariliqta élip bérilghan bolsimu, wetenning ghémini öz ghémi, weten üchün qilidighan xizmetni özining wijdani burchi dep hésablighan Uyghurlar ariliqni yiraq körmey paytext oslogha jem bolup, ay-yultuzluq kök bayraq we xitaygha qarshi her xil sho'arlar yézilghan lozunkilarni kötürüp, xitay elchixanisining aldida merdane sep tüzüp heywetlik sho'arlarni towlap, xitay elchixanisida ishleydighan xitaylarning yürikige ensizlik sélip dérizilirini étiwélishqa mejbur qildi.

Jama'et wekilliridin ömer haji élip kelgen xitayning qizil bayriqigha gerche saqchilar ruxset qilmighan bolsimu, lékin xitay elchixanisi aldida lenet-nepretler bildürülüp, yirtilip we tükürülüp ot qoyup köydürüldi. Bayraq köydürüsh üchün ruxset élish kéreklikini, bundaq qilishning qanunsizliq ikenlikini bildürgen saqchilargha ömer haji birinchidin, ruxset élishqa waqitning yar bermigenlikini, ikkinchidin, bigunah qérindashlirining xitay hökümiti teripidin naheq öltürülgenlikini, shu sewebtin mushu usul bilen özining ghezep-nepritini bildürüwatqanliqini éytqandin kéyin, saqchilar namayishchilarning nöwettiki héssiyatini chüshinidighanliqini, shunga normalda qoyulidighan jerimanini emeldin qaldurghanliqini bildürdi.

Namayishchilar “Xitaylar wetinimdin chiqip ket”, “Xitay térrorchi”, “Sherqiy türkistan Uyghur wetinidur”, “Xitay bigunah Uyghurlarni öltürüshni toxtat”, “Bizge erkinlik we démokratye kérek” dégendek türlük mezmundiki sho'arlarni towlap özlirining xitay hökümitige bolghan naraziliqini ipadilep namayishni dawamlashturuwatqan peytte, namayishqa qatnishiwatqan ibrahim ependi ziyaritimizni qobul qilip öz qarashlirini ipadilep ötti.

Teshilat re'isi nighmet hajim ziyaritimizni qobul qilip öz héssiyatini ipade qilip ötti.

Bügünki namayishta yene, Uyghur élida yüz bériwatqan qanliq qirghinchiliqlarning arqa körünüshi heqqide chüshendürüshler yézilghan teshwiqat wereqilirimu tarqitildi. Namayishta jama'et wekilliri we diniy zatlar türlük mezmunda nutuqlar sözlep “Taki sherqiy türkistan azad bolghan'gha qeder weten üchün bolidighan küreshte her bir Uyghurning öz zémmisidiki éghir wezipini ada qilishi kérekliki,weten asminida azadliq téngi atmay turup chet'eldiki héchbir Uyghurning qelbide we hayatida tinchliq bolmaydighanliqi” qatarliqlarni siyasiy, diniy we tarixi misallar bilen sherhlep ötti.

8-Awghust küni norwégiyening paytexti oslodiki xitay elchixanisining aldida élip bérilghan naraziliq namayishi saqchilarning tertip saqlishi bilen shu kündiki kün-tertiplerni toluq orundap chüshtin kéyin sa'et tötler bilen axirlashti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.