Osloda xitaygha qarshi birleshme namayish ötküzüldi

Ixtiyariy muxbirimiz aygül yüsüp
2014.12.08
Share on WhatsApp
Share on WhatsApp
norwegiye-birleshme-namayish.jpg Uyghur, tibet, wiyétnam we filippinliqlar ötküzgen xitaygha qarshi birleshme namayishtin körünüsh. 2014-Yili dékabir, norwégiye.
RFA/Aygul

7-Dékabir yekshenbe küni osloda xitaygha qarshi birleshme namayish ötküzüldi. Yéqinda norwégiyede, norwégiye wiyétnam jem'iyiti, norwégiye Uyghur komitéti, norwégiye tibet komitéti we norwégiyediki filippinliqlar birliship “Sherqiy we jenubiy asiya üchün tinchliq munbiri” namliq hemkarliq munbiri teshkil qilghan idi. Bügünki bu namayishni mushu hemkarliq munbiri orunlashturghan.

Namayishning asasi meqsiti, xitayning sherqiy türkistanda we tibette yürgüzüwatqan basturush we zulum siyasitini pash qilish, xitayning térritoriyisi ichidila emes, belki qoshna döletler, jümlidin, wiyétnam we filippin'gha qarita yürgüzüwatqan yolsiz chégra mudaxilisi qilmishlirini eyiblesh, xitayning sherqiy we jenubiy asiya rayonining siyasiy, iqtisadi, ijtima'iy tereqqiyatigha tehdit bolupla qalmastin, bu rayonda démokratiye we kishilik hoquqning emelge éshishi üchünmu chong tehdit ep kéliwatqanliqini norwégiye hökümiti we xelqige chüshendürüsh we xitaygha qarshi küreshte ularning qollishini qolgha keltürüshtin ibaret.

Ziyaretni qobul qilghan wiyétnamliq namayishchilardin biri “Siz néme üchün bügünki namayishqa qatnashtingiz” dégen so'algha jawab bérip mundaq dédi:
‏- Chünki biz, ehwali bizge oxshaydighan bashqa milletler bilen hemkarlishishini we birlikte xitaygha qarshi küresh qilishni arzu qilimiz. Xitaylar bizning déngiz tewelikimizge paraxotliri bilen kélip bizning béliqchilirimizni étip öltürüwatidu, bixeterlikimizge, hayatimizgha we iqtisadimizgha tehdit séliwatidu.

Namayishqa qatnashqan her millet kishiliri özliri ekelgen bayraq, lozunkilarni we mesh'ellerni kötürüp mangdi. Ikki tibet ayal yuqiri awazliq ibadet qongghuriqini chalghach namayishni dawamlashturdi.

Namayishqa Uyghur, tibet, wiyétnamliqlar, filippinliqlar we yerlik norwéglardin bolup 200 din artuq adem qatnashti.

Namayish chüshtin kéyin sa'et 15:00 de merkizi poyiz wogzalining aldidin bashlinip, oslo sheher merkizidiki parlamént binasining aldida her millet wekilliri nutuq we muraji'etname sözlesh we tinchliq naxshisi éytish bilen sa'et 17:00 de axirlashti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.