Nurimanxan anining oghli töt kün saqchixanida tutup turulghandin kéyin qoyup bérilgen

Ixtiyariy muxbirimiz haji qutluq qadiri
2016-06-29
Élxet
Pikir
Share
Print
Nurimanxan ana qeshqer awat yézisi yalang kentidiki öz öyi aldida. 2015-Yili mart.
Nurimanxan ana qeshqer awat yézisi yalang kentidiki öz öyi aldida. 2015-Yili mart.
RFA/Qutluq

Biz ötken qétim yéqindin buyan bizning ziyaritimizni köp qétim qobul qilghan qeshqer awat yézisi yalang kentidiki 72 yashliq nurimanxan anining oghli memet ezizning 23-iyun saqchilar teripidin öz öyide tutup kétilgenliki toghrisida xewer bergen iduq.

Memet eziz tutup kétilip bir qanche kündin buyan biz nurimanxan anigha izchil téléfon qilip bu heqte uchur igilimekchi bolghan bolsaqmu, biraq nurimanxan anining téléfoni da'iriler teripidin toxtitiwétilgenliki üchün uning bilen alaqilishish imkaniyiti bolmighan idi.

Bügün norwégiye oslo Uyghur islam medeniyet merkizidin igilishimizche, saqchilar teripidin tutup kétilgen memet eziz yéziliq saqchixanida töt kün tutup turulghandin kéyin so'al-soraq qilinip 26-iyun kechte qoyup bérilgen.

Weqedin xewerdar bolghan norwégiye oslo Uyghur islam medeniyet merkizidiki ustaz turghunjan emet ziyaritimizni qobul qilip, bu heqte özining qeshqerdiki uruq ‏- tughqanliridin igiligen uchurlar heqqide toxtaldi we akisi memet ezizning soraq jeryanida saqchi da'irilirining tehditige uchrighanliqini bayan qilip ötti.

Biz turghunjan emetning teminligen uchurigha asasen, qeshqer awat yézisidiki nurimanxan anining yéngi téléfon nomurigha téléfon qilip bu heqte uchur igiliduq.

Biz weqe heqqide yenimu ilgiriligen halda bezi bir uchurgha ige bolush üchün, yéza sékrétari we yalang kentidiki saqchi alimjan'gha téléfon qilghan bolsaqmu,biraq téléfonimiz jawabsiz qaldi.

Yuqiriqi awaz ulinishidin tepsilatini anglang.

Toluq bet