Oslodiki “Nobél erkinlik sariyi” da Uyghurlarning nöwettiki weziyitidin melumat bérildi

Ixtiyariy muxbirimiz ekrem
2018-03-16
Share
sherqiy-türkistanning-nöwettiki-weziyiti-01.JPG Osloda ötküzülgen “Sherqiy türkistanning nöwettiki weziyiti” namliq yighindin körünüsh. 2018-Yili 16-mart. Oslo, norwégiye.
RFA/Ekrem

16-Mart küni amérika démokratiyini ilgiri sürüsh fondi, dunya Uyghur qurultiyi, norwégiye Uyghur komitéti we rafto kishilik hoquq fondi qatarliq organlar birlikte norwégiye paytexti oslodiki “Nobél erkinlik sariyi” da sherqiy türkistanning nöwettiki weziyitidin melumat bérish yighini ötküzdi.

“Sherqiy türkistanning nöwettiki weziyitidin melumat bérish yighini” dep nam qoyulghan bu qétimliq melumat bérish yighini dunyadiki 14 dölette Uyghur ayallirining “Bir qedem, bir awaz” namayishi ötküzülgen jiddiy bir peytke toghra keldi.

Yighin'gha d u q rehberliri, norwégiye parlaméntining bir qisim ezaliri, rafto kishilik hoquq fondining wekilliri, norwégiyediki kishilik hoquq teshkilatlirining xadimliri, norwégiye Uyghur komitétining ezaliri, norwégiyediki Uyghur jama'iti we d u q ning “Kishilik hoquq, démokratiye, qanuniy bilimler boyiche terbiyilesh kursi” gha kelgen Uyghur yashliri bolup köp sanda kishi qatnashti. 

Biz norwégiyediki “Nobél erkinlik sariyi” da ötküzülgen bu yighin'gha ishtirak qilghan bir qisim zatlarni neq meydanda ziyaret qilish pursitige érishtuq.

D u q ning re'isi dolqun eysa ependi yighin neq meydanida ziyaritimizni qobul qilip, bu qétimqi yighin heqqide melumat berdi. 

Yighinda söz alghan kishiler, Uyghur élida höküm sürüwatqan éghir weziyetni, “Yépiq terbiyilesh merkizi” namidiki yighiwélish lagérlirining Uyghurlargha séliwatqan zulumlirini shuningdek xitayning xalighanche tutqun qilish we öltürüsh weqelirini misalliri bilen otturigha qoyup, xitay hökümitining bu wehshiy zulumlirigha norwégiye hökümiti we xelqining süküt qilmasliqini telep qilishti.

D u q ijra'iye komitétining re'isi ömer qanat ependimu ziyaritimizni qobul qilip, yighin heqqide öz tesiratlirini izhar qildi. 
“Sherqiy türkistanning nöwettiki weziyitidin melumat bérish” yighinigha kanadadin kélip qatnashqan d u q muhajirlar bölümining mudiri memet toxti ependimu bu heqte toxtalghanda, “Bu yighin, Uyghurlarning hazirqi échinishliq weziyitini norwégiyening herqaysi qatlamliridiki erbablargha anglitish nuqtisidin köp ehmiyetlik boldi,” dédi.

Yighinda söz qilghan norwégiye parlaméntining ezalirimu Uyghurlar heqqide öz pikirlirini otturigha qoyup, xitay hökümitining Uyghurlargha qarita yürgüzüwatqan éghir basturush siyasetlirini eyipleshti.

Yighin'gha ishtirak qilghan d u q ijra'iye komitétining mu'awin re'isi semet abla ependimu bu yighin heqqide qarashlirini bayan qilip ötti. 
“Nobél erkinlik sariyi” da ötküzülgen “Sherqiy türkistanning nöwettiki weziyitidin melumat bérish” yighini 4 sa'et dawam qildi. Yighin xatimiside qatnashquchilar opche süretlerge chüshüp, xatire qaldurushti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet