Гума наһийисидә йәнә бир уйғур аилисиниң өй вә мал-мүлки бастуруветилгән

Мухбиримиз қутлан
2014-05-29
Share
mejburiy-cheqiliwatqan-Uyghur-qoro-jay-oy-1.jpg Мәҗбурий чеқиливатқан уйғур аһалилириниң олтурақ ой-җайлири. 2008-Йил, үрүмчи.
RFA/Qutlan

Игилишимизчә, гума наһийә базирида олтурушлуқ йәнә бир уйғур аилисиниң өй вә мал-мүлки қурулуш ширкити тәрипидин мәҗбурий чеқилип, трактор билән бастуруветилгән.

Вәқә гума наһийә базириниң гүлқазма мәһәллисидә, йәни наһийәлик қатнаш бекитиниң удулида йүз бәргән болуп, һазирғичә җәмий 3 уйғур аилисиниң өй-җайлири чеқилип түзливетилгән.

Бүгүн радиомиз зияритини қобул қилған өй игиси қурулуш ширкитиниң бу зораванлиқи вә аилисиниң бешиға кәлгән еғир қисмәтләр һәққидә тохталди:
"өй-җайим гума наһийә базириниң әң ават кочиси болған гүлқазма мәһәллисидә иди. Бу наһийәлик қатнаш бекитиниң удулидики коча болуп, қайнақ базар болидиған җай иди. Алдинқи йилидин башлап қурулуш ширкитиниң мениң вә башқа бирқанчә қошнилиримизниң өй-җайлириға көзи чүшүшкә башлиди. Уларниң қойған баһаси бәк төвән болғачқа биз өй-җайимизниң чеқилишиға қошулмидуқ."

Яшинип қалған бу киши йәнә мунуларни билдүрди:
"мениң өй-җайимниң теги җәмий 280 квадратметир болуп, униң 200 квадрат метирида дукан, завут вә башқа әслиһәләр орунлашқан, қалған 80 квадрат метири олтурақ өй иди. Қоруда биз билән башқа йәнә 2 аилә, җәмий 12 җан биллә яшайттуқ. Биз қурулуш ширкитиниң йолсиз тәлипигә қошулмиғачқа, улар өткән йили 8-айда шәһәр қурулуш идариси билән бирликтә қоруйимизниң коча тәрипидики темини йолға тоғра кәлди дәп мәҗбурий чеқивәтти. Биз улар билән ахириғичә тиркәштуқ, ахирида улар бизгә зорлуқ ишләтти. Мән икки қетим таяқ йедим. Йеқинда улар топа иттириш машиниси, йәр ғаҗилайдиған тракторлар билән кечидә келип өй-җайлиримизни түртүп өрүгили турди. Мән сақчиға мәлум қилдим. Һелиму сақчилар келип уларни тосуп бираз тохтатти. Шу арида өйдики 12 җан аран җанлирини елип сиртқа чиқивалди. Сақчилар кәткәндин кейин, қурулуш ширкити давамлиқ түртүп, пүтүн мал-мүлкимиз билән өйлиримизни бастурувәтти."

У топа астида қалған мал-мүлки вә тартқан иқтисадий зийини һәққидә тохтилип мунуларни билдүрди:
"биз наһийәлик сақчи идариси вә әрзийәт ишханилириға әһвални мәлум қилғандин кейин, улар мал-мүлкимизни баһалиди. Қоруда бизниң пахта айриш завутимиз, ишик-деризә ясайдиған завутимиз вә йилларчә йиғқан мал-мүлкимиз бар иди. Мал баһа идариси һәммә нәрсиләрниң қиммитини бир милйон 400 миң сомдин көпрәк баһалиди. Әпсуски, һазирға қәдәр қурулуш ширкити бу зиянни бизгә төләп бәрмиди."

"бизниң әрз қилип бармиған йеримиз қалмиди. Һечбир орун бизниң дәвайимизға игә чиқмиди. Һәммиси мәслиһәтлишивалғандәк охшаш гәпни қилиду. Һәтта наһийәниң һакимиму бизгә бесим ишлитип мурәссәгә келиңлар, болмиса башқа амал йоқ дәп гәпни үзди. Мурәссә йиғиниға барсақ, йәнә шу бурунқи кона гәпни тәкрарлиди. Улар бизниң қору-җайлиримизни кона өй һесаблап төвән баһада еливалидикән. Әгәр биз қурулуш ширкити бизниң өйимизниң орниға салидиған бинадин өй алимиз десәк, улар бәргән пулға бир йүрүшму өй кәлмәйдикән. Йеңи өй вә дукан елиш үчүн юқири баһада пул төләп сетивелишимиз керәккән. Шундақ қилип, өй-макансиз һәм дәсмайисиз һаләттә бичарә болуп қалдуқ."

У ахирида йәнә мунуларни билдүрди:
"гума тәвәсидә әрзимизгә қулақ салидиған һечким чиқмиғачқа, аптоном районға әрз сунмақчи болуватимиз, лекин буниң қанчилик үнүми болидиғанлиқини билмәймиз. Қурулуш ширкитиниң хоҗайини наһийәдики һәммә башлиқни өзигә қаритивалған, интайин муттәһәм бәрсикән. Униң шайкилири бизни көрсила уруп, сүр-тоқай қилиду. Мениму икки қетим урди. У бизгә тәһдит селип, ‹бәк баралисаңлар аптоном районға барарсиләр, лекин һечким гепиңларни аңлимайду. Аптоном районниң тамғиси мениң янчуқумда, гуманиң һакимиму мениң гепимни аңлайду!' дәп қорқутмақта. Деһқанниң гепи һечйәрдә ақмайдикән!..."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт