Parizhda ötküzülgen ilmiy muhakime yighini we birleshme namayishqa Uyghurlarmu qatnashti

“Oyghan firansiye” namliq ilmiy muhakime yighinidin kéyin firansiye Uyghur jem'iyitining re'isi erkin ablimit(ongda) firansiyediki nopuzluq uniwérsitétlarning proféssorliri we bir qisim tetqiqatchilar bilen. 2016-Yili 8-öktebir, parizh.

8-Öktebir firansiyening paytexti parizhda ötküzülgen “Oyghan firansiye” namliq ilmiy muhakime yighinigha we shundaqla birleshme kishilik hoquq namayishigha Uyghurlarmu qatnashti.

Firansiye Uyghur jem'iyitidin igilishimizche, firansiyediki nopuzluq uniwérsitétlarning proféssorliri we bir qisim tetqiqatchilarning teshkillishi bilen chaqirilghan “Oyghan firansiye” namliq ilmiy muhakime yighinigha firansiyede pa'aliyet élip bériwatqan kishilik hoquq teshkilatliridin firansiye Uyghur jem'iyitining bir qanche ezaliri alahide teklip bilen qatnashqan.

Téléfon ziyaritimizni qobul qilghan firansiye Uyghur jem'iyitining re'isi erkin ablimitning éytishiche, yighinda asasliqi firansiyening kelgüsi iqtisadi, köchmenler mesilisi toghrisida ilmiy muhakimiler élip bérilghan.

Yighin ariliqida yene yighin teshkilligüchilerdin proféssor angghili tampér bir qisim yighin ehlige we firansiye Uyghur jem'iyitining wekillirige yawropada nöwette ilham toxti mesilisining nahayiti qiziq nuqtilardin biri boluwatqanliqini bildürgen we shundaqla özining ilham toxtini nobél tinchliq mukapatining namzati qilip körsitishke tirishiwatqanliqini ilgiri sürgen.

Mezkur yighin parizh 5-rayonluq hökümet binasida chaqirilghan bolup, yighin etigen sa'et 9:30 din kech sa'et altige qeder dawam qilghan.

Firansiye Uyghur jem'iyitining aktip ezaliridin tursunjanning bildürüshiche, shu küni yene firansiyediki bir qisim Uyghurlar kech sa'et altidin bashlap parizhdiki jumhuriyet meydanida merkizi italiyediki “Sotsiyal libéral xelq'ara kishilik teshkilati”ning teshkillishi bilen chaqirilghan asiya elliridiki azsanliq milletlerning kishilik hoquqini qoghdash birleshme namayishigha qatnashqan.

Parizhda chaqirilghan mezkur namayishta sözge teklip qilin'ghan firansiye Uyghur jem'iyitining re'isi erkin ablimit nöwettiki Uyghur weziyiti toghrisida qisqiche toxtalghan.

Melum bolushiche, parizhda chaqirilghan bu qétimqi namayish merkizi italiyediki “Sotsiyal libéral xelq'ara kishilik hoquq teshkilati” ning her yili öktebir éyida parizhda élip baridighan kishilik hoquq pa'aliyetliridin biri hésablinidiken.

Firansiyediki bir qisim Uyghur kishilik hoquq mesililiri mutexessislirining qarishiche, firansiye Uyghur jem'iyiti we shundaqla ataqliq zhurnalist ursula xanim firansiyede Uyghur mesilisini anglitishta belgilik rol oynighanliqtin, Uyghur öktichi ziyaliysi ilham toxti mesilisi firansiyede keng tonulghan.

Yuqiriqi awaz ulinishidin tepsilatni anglang.