Da'iriler patigül ghulamning par pulini tölep berdi, emma muxbir bilen sözleshmeslikni telep qildi

Ghayib oghlini izdesh bilen iqtisadiy jehettin qiyinchiliqqa duch kélip par pulini töliyelmigen patigül ghulam ötken hepte sotqa chaqirtilghan idi. Da'iriler bu qétim patigülning par pulini töliwetken hem uning bankidin alalmaywatqan 5000 som pulini élip bergen.

Emma buning bedilige patigüldin muxbirning ziyaritini qobul qilmasliqni telep qilghan. Patigül bolsa, yürikidiki jarahetning iqtisadiy yardem bilen shipa tapmaydighanliqini bildürüp, ghayib oghlining uchurini bérishni telep qilghan we oghlining iz-dériki tépilmighiche muxbir bilen alaqisini üzmeydighanliqini éytqan.

Alaqidar ahaliler komitéti mes'ulliri ikki heptining aldida patigül bilen körüshüp ketkendin kéyin, uning töliyelmey qalghan 9000 som par pulini toliwetken we u bankidin alalmaywatqan 5000 som amanet pulini élip bergen. Aridin birqanche kün ötkende ürümchining tengritagh rayonluq dölet amanliq saqchiliri patigülning öyige kélip, buningdin kéyin muxbirning ziyaritini qobul qilmasliqni, undaq bolmighanda, patigülge qiliniwatqan “ Yaxshiliqlar ” ning toxtap qalidighanliqini éytqan. Patigül hökümettin héchqandaq yardem kütmeydighanliqini, peqet ghayib oghlining uchuri bérilishini, oghlining uchuri bérilmigen ehwalda herqandaq “ Yaxshiliq ”ning uning qelbidiki jarahetke shipa bolalmaydighanliqini éytqan. Arqidin saqchilar, eger muxbirning ziyaritini qobul qilsa buningdin kéyin özige ziyan yétidighanliqini eskertip tehdit salghan.

Bu toghrida saqchilar bilen patigül arisida töwendikiche di'alog dawam qilghan:
Saqchilar: yéqindin buyan sizning mesilingiz xelq'arada bek ghulghula peyda qiliwétiptu, emdi diqqet qiling. Biz bu gepni yetküzüp qoyghili kelduq.
Patigül: ejeb yaxshi boptu, qéni qaysi gépim qeyerde, qandaq otturigha chiqiptu?

Saqchilar: siz héliqi muxbir bilen yene sözlishiwatamsiz?
Patigül: shundaq sözlishiwatimen. Emise balamning uchurini ber, men u kishi bilen körüshmeymen.

Saqchilar: u dégen bir térrorchi, uning bilen körüshsingiz bolmaydu, körüshmeslikingiz kérek.
Patigül: térrorchi bolsa némishqa tutmidinglar, qudretlik dölettinglarghu?

Saqchilar: dölet bilen dölet arisida kélishimler bar, chékidin ashsa unimu tutimiz.
Patigül: emise sen dep baq, men néme dep jawab bérey? imammemet dégen balang ghayib bolup kétiptu, uchuri barmu dése, yaq, men undaq balini tughmighan, undaq bala mewjut emes deymenmu? néme deymen?

Saqchilar: qandaq jawab bérishni biz bilmeymiz.
Patigül: undaq bolsa, u kishining kimliki, nediliki bilen chatiqim yoq, balamning iz-dériki chiqquche sözlishimen. Dep qoyush sen xeqni ewetkenlerge: méni étiwetsun, balisini izdigen anini atimiz dep ürümchide sazayi qilip étiwetsun, shu chaghda Uyghurlar yoqap ketken balisini izdimeydu? sen xeqmu Uyghurkensen, sen xeqningmu balisini yeydu bu yirtquchlar, sen xeqmu izdimeydighan bolushisen.

Patigül yuqiriqi sözliridin kéyin, öyige kelgen 4 saqchini öyidin qoghlap chiqarghan we balisining uchuri bolmighan ehwalda qayta kelmeslikini éytqan.

Patigül yuqiriqi ehwallarni muxbirgha bayan qilghandin kéyin, özining axbarat bilen alaqilishishtin burun héchkimning diqqitini tartalmighanliqini, hetta erz-shikayetlirige héchkimning perwa qilmighanliqini؛ shunga balisining iz-dérikini élishni axirqi tiniqighiche dawamlashturidighanliqini, hökümet tereptin balisining uchuri bérilmigüche, herqandaq axbarat orgini we herqandaq qiziqquchigha balisining paji'esi we özining ehwali heqqide melumat bérishni dawamlashturidighanliqini éytti.