Dertmen ana patigül ghulamning musteqil tetqiqatchi ilham toxtigha amanet sözliri

Muxbirimiz shöhret hoshur
2013-09-27
Élxet
Pikir
Share
Print
Imammemet a'ilisidikilerning 15-yili burun chüshken xatire süriti. Anisi patigül ghulam arqidiki retning ongdin birinchisi. Otturidikisi ghayib bolghan oghli imammemet éli (12 yash mezgili)
Imammemet a'ilisidikilerning 15-yili burun chüshken xatire süriti. Anisi patigül ghulam arqidiki retning ongdin birinchisi. Otturidikisi ghayib bolghan oghli imammemet éli (12 yash mezgili)
RFA/Shohret Hoshur


Ghayip oghlining iz - dérikini élish üchün, Uyghur jem'iyiti we xelq'ara jama'ettin izchil halda yardem telep qilip kéliwatqan dertmen ana patigül ghulam, bügün muxbirimiz bilen ötküzgen söhbitide nöwette béyjingda nezerbent astida tutup turuluwatqan musteqil tetqiqatchi ilham toxtigha minnetdarliq bildürdi.

U minnetdarliq bayanida, ilham toxtining bu yil 7 - ayda ghayiplar heqqide xitay hökümitige sun'ghan teklipnamisidin kéchikip bolsimu xewer tapqanliqini eskertip, uning mezlumning ahu - zarini xitay we dunya jama'itige yetküzgenlikige teshekkür éytti. Patigul ghulam ilham toxtigha yetküzmekchi bolghan yürek sözlirini muxbirimizgha "Bu méning amanet sözum" dep tapilidi. Töwende muxbirimiz shöhret hoshurning bu heqte teyyarlan'ghan programisini anglaysiler:

Muxbir: démek, ilham toxtining bayanatidin xewiringiz boptu - de wastilik halda?

Patigül: boldi, birsi dédi, imammemetni torgha chiqiriwétiptu dep, kim chiqiriptu désem, milletler uniwérsitétining bir proféssori dédi. Shundaq, chiqirishqa tégishlikti, xudayim chiqiriwatqandu, méning balam heq ish qilghan, heq gep qilidighanlar uni sürüshte qilidu dédim.

Muxbir: shundaq, bayanatta ghayiplardin 30 nechche kishining bir - birlep isimliri tilgha élinip hökümetke bularning aqiwiti heqqide jawab bérish heqqide telep sundi.

Patigül: tizimlikning eng béshida imam balamni bar dep anglidim. Biraq, shu bayanatning özini oquyalmidim, tepsiliy némiler déyilgenlikini men uqmidim.

Muxbir: ilham toxtining u bayanatida "Men Uyghur millitining qénidin törelgen bir ziyaliy, bu dölet yétishtürgen bir tetqiqatchi, men bügün 5 - iyuldin qépqalghan eng chong bir mesile heqqide teklipimni sunimen, bu mesile hel bolmay turup, shinjangda muqimliq bolmaydu, milletler ittipaqliqidin éghiz achqini bolmaydu" dédi.

Patigül: heq gepni deptu, biz déyelmeywatqan gepni deptu, biz bek zulum astida qalduq, 4 yil nazaret astida yashash bir ana üchün asan ish emesken.

Muxbir: bayanatta sizning ismingizmu bar. Misalen "Patigul ghulam, qurban'güller béyjinggha qeder keldi, emma yerliktin adem kélip tutup ketti. Ular deslepki yili yerliktin jawab kütti, ikkinchi yili béyjinggha keldi, béyjingdinmu jawab chiqmighandin kéyin 3 - yili ehwalini axbaratqa ashkarilidi, hazir bu ishni pütün dunya bilidu, bu ish hazir dölet mexpiyetliki emes, putun dunya bilidu, shunga jawab bérish kérek" dédi.

Patigül: toghra deptu, biz 2010 - yilning axirida béyjinggha barduq, gépimizni héchkim anglimidi, eksinche bizni shinjang bensichugha soliwaldi, 5 kün yataqtin sirtqa chiqarmidi, axiri her birimizni 4 tin saqchi yalap élip ketti.

Muxbir: ilham bayanatida yene "Ghayiplardin hazirghiche axbaratqa ashkarilan'ghini 30 nechche, emma jem'iyette bu heqte qorqunchluq sanlar bar, eger shu 30 nechchini hésabqa alghandimu, mushunchilik kishining ghayip bolup kétishi bir dölet üchün kichik ish emes. Shunga hökumet aldi bilen bularning aqiwiti heqqide tézdin bayanat élan qilishi, a'ililerge tölem tölishi we ulardin epu sorishi, andin mes'uliyiti barlarni jawabkarliqqa tartishi kérek" dédi.

Patigül: yürikimizdiki gepni qiptu, alla salametlik ata qilghay, téximu küchlük iman - jasaret ata qilghay.

Muxbir: bayanatning axirida "Burun bergen tekliplirim seweblik, köp qétim dölet amanliq saqchiliri teripidin "Chay ichish"ke teklip qilindim, bu qétim ichidighan chéyim téximu achchiq bolushi mumkin؛ emma mushu charisizlarning awazini yetküzüsh üchün néme körsem meyli" dédi.

Patigül: alla öz panahida saqla, ilham toxtigha yetküzüp qoyung,"Ah - zarimizni yene yetküzsun, putun dunyagha yetküzsun, putun dunya bilsun yighimizni, bizge bek heqsizliq boliwatidu, biz bek zulum chékip kétip barimiz."

Muxbir: ilham toxti dégen isimni anglap baqqanmidingiz?

Patigul: men ilham toxtini burunla bilimen, chünki men a'ile ayali bolsammu kitab oquymen, gézit körimen, radi'o anglaymen. U ademge nahayiti köp hörmitim bar. Béyjinggha barghan waqtimizda, milletler uniwirsitétigha bérip körüshmekchi idim, oqughuchilardin sürüshte qilip tapmaqchitim, saqchilar bizni soliwélip körüshtürmidi.

Muxbir: démek purset bolmidi?

Patigül: shundaq. Emise tapilaymen: yuqiriqi sözlirimni ilham toxtigha yetküzüp qoyung, bu méning amanet süzüm."

Hörmetlik radi'o anglighuchilar, yuqirida dertmen ana patigül ghulamning béyjingdiki musteqil tetqiqatchi ilham toxtigha yetküzmekchi bolghan amanet sözlirini anglidinglar.

Toluq bet