"Terbiyilesh lagéri" din qachqanliqi ilgiri sürülüwatqan peyzulla utuqning jiddiy izdiliwatqanliqi ashkarilandi

Muxbirimiz shöhret hoshur
2018-03-30
Élxet
Pikir
Share
Print
Ghuljidiki "Terbiyelesh merkizi" din qachqan gumandar peyzulla utuq heqqide xitay saqchiliri chiqarghan tutush buyruqi.
Ghuljidiki "Terbiyelesh merkizi" din qachqan gumandar peyzulla utuq heqqide xitay saqchiliri chiqarghan tutush buyruqi.
RFA/Shohret Hoshur

Tünügün bir anglighuchimiz radi'omizgha uchur yollap, ghuljida bireylenning "Terbiyilesh lagéri" din qachqanliqi we bu seweblik ghulja teweside saqchilarning keng-kölemlik axturushi dawam qiliwatqanliqini melum qilghan idi. Muxbirimizning téléfon ziyaritige jawab bergen ghuljining bayanday, süydüngning küre tewelikidiki yerlik ahaliler saqchilarning 3 kündin béri yol tosup we öy axturup türmidin qachqan bir gumandarni izdewatqanliqini bayan qildi. Bu heqte uchur yollighan anglighuchimiz bügün yene mezkur gumandar heqqide chiqirilghan bir tutush buyruqini radi'omizgha yetküzdi. Tutush buyruqida gumandar peyzulla utuqning ijtima'iy jinayetchi ikenliki tilgha élin'ghan bolsimu, emma weqedin xewerdar kishiler, peyzullaning milliy kimliki seweblik "Terbiyilesh lagéri" gha apirilghan siyasiy tutqun ikenlikini ilgiri sürmekte.

Tünügün radi'omizgha yetküzülgen mezkur uchurda gumandarning kimliki tilgha élinmighan, emma öy axturushning ghulja shehirining toghraq yézisidin taki qorghasning kökdala tewesigiche keng-kölemde dawam qiliwatqanliqi bayan qilin'ghan idi. Biz aldi bilen ghuljidiki saqchi organlirigha téléfon qilduq. Téléfonimiz téxnikiliq tosalghugha uchrighandin kéyin, bayanday we süydüngning küre tewelikidiki ahalilerdin melumat soriduq. Ahaliler birdek 3 kündin béri weziyetning yene bir baldaq jiddiyleshkenliki, öy axturush élip bériliwatqanliqini bayan qildi. Ahalilerdin birining déyishiche, saqchilar öy axturush dawamida özlirining türmidin qachqan birsini izdewatqanliqini bayan qilghan. Aldinqi küni süydüngdin ghulja shehirige qarap yolgha chiqqan bir kishi yoldiki qatmu-qat tosaqlardin we yol tosqan xadimlarning chüshendürüshidin, qamaqtin qachqan bir kishining izdiliwatqanliqini uqqan.

Téléfonimizni qobul qilghan bayanday yézisidiki bir amanliq mudiri, "Terbiyilesh" tin qachqan gumandar heqqidiki so'alimizgha jawaben gumandarning 30 yash etrapida ikenliki we hélihem tutulmighanliqini bildürdi.
Bu heqte bizge eng deslepte uchur yollighan anglighuchimiz bügün yene mezkur gumandar heqqide chiqirilghan bir tutush buyruqini radi'omizgha yetküzdi. Tutush buyruqida, gumandarning bu yil 30 yashqa kirgen peyzulla utuq ikenliki, 27‏-mart küni 66‏-tüen doxturxanisidin qachqanliqi bayan qilin'ghan. Tutush buyruqida yene peyzulla utuqning yéza igilik 64‏-polk 14 ‏-etretning ahalisi ikenliki eskertilgen. Tutush buyruqida téléfon nomurliri qaldurulghan ikki xadimgha téléfon qilghan bolsaqmu, emma ularning téléfonlirining izchil halda aldirashliqi sewebidin alaqileshkili bolmidi. Tutush buyruqidiki téléfon nomuri qaldurulghan saqchi idarisining xadimi peyzulla utuqning ta bügün'giche téxi tutulmighanliqini delillidi. Emma u peyzulla utuqning "Terbiyilesh lagéri" din qachqanliqi heqqidiki so'alimizgha éniq we keskin jawab bérelmidi.

Tutush buyruqida peyzulla utuqning qéchishtin 10 kün awwal at oghrilap tutulghanliqi yézilghan. Emma weqe heqqide radi'omizgha eng deslepte uchur yetküzgüchi tutush buyruqidiki "At oghrilidi" dégen izahatning saxta ikenliki, da'irilerning ammiwi teshwiqat matériyallirida "Yépiq terbiye lagérliri" ni tilgha almasliq üchünla bu bu jinayetni toqup chiqqanliqini ilgiri sürmekte. Tutush buyruqida peyzulla utuq heqqide uchur yetküzgüchige 100ming yüen mukapat bérilidighanliqi uqturulghan. Mukapat sommisining chongluqi we gumandarni tutush dolqunining kenglikimu uchur yetküzgüchining bayanining asassiz emeslikini isharetlimekte.

Toluq bet