«Лагер» дин қачқан пәйзулла утуқниң тутулған әмәс, етиветилгәнлик хәвири чиқти

Мухбиримиз шөһрәт һошур
2018-08-03
Елхәт
Пикир
Share
Принт
Ғулҗидики «тәрбийәләш мәркизи» дин қачқан гумандар пәйзулла утуқ һәққидә хитай сақчилири чиқарған тутуш буйруқи.
Ғулҗидики «тәрбийәләш мәркизи» дин қачқан гумандар пәйзулла утуқ һәққидә хитай сақчилири чиқарған тутуш буйруқи.
RFA/Shohret Hoshur

Биз 4 айниң алдида хитай даирилири тәрипидин дохтурханидин қачқанлиқи илгири сүрүлгән, аһалиләр болса лагердин қачқанлиқини мәлум қилған қорғас көкдалалиқ пәйзулла утуқниң бир һәптилик ахтуруш оператсийәсидин кейин тутқун қилинғанлиқи һәққидә хәвәр бәргән идуқ. Түнүгүн йәни 2-авғуст күни «биттәр винтер» йәни «зимистан» намлиқ хәлқаралиқ ахбарат журнили, пәйзулла утуқниң оператсийәниң ахирқи күни нәқ мәйданда етиветилгәнликини хәвәр қилди. Бу хәвәрдики бәзи тәпсилатлар, пәйзулла утуқ делосидики бир қисим ениқсиз нуқтиларни айдиңлаштурди. Төвәндә мухбиримиз шөһрәт һошурниң бу һәқтә тәйярланған программиси диққитиңларда болиду.

Хитай сақчилири чиқарған тутуш буйруқида, пәйзулла утуқниң уйғур районидики ишләпчиқириш қурулуш армийисиниң 66-полк дохтурханисидин қачқанлиқи, униң дохтурханиға кириштин бурун ат оғрилап тутулғанлиқи баян қилинған иди; «зимистан» журнилиниң 2-авғусттики бу һәқтики хәвиридә баян қилинишичә, пәйзулла утуқ 2017 ‏-йили 5 ‏-айда аталмиш тәрбийәләшкә әкитилип 3 айдин кейин қоюп берилгән; у бу йил 4-айда тәрбийәләшкә йәнә бир қетим чақиртилған. Пәйзулла лагерға бериштин өзини қачуруп, өзи туруватқан 64-полктин 63‏-полк тәвәликигә йошурун өткән шу йәрдики бир кичик аралда мөкүнүп турушни пиланлиған вә шу аралға өтүвелиш үчүн дәря бойидики бир чарвичидин етини сорап турған. Чарвичи разимәнлик билән етини пәйзуллаға бәргән вә арқидин етиниң қайтурулмаслиқидин әндишә қилип әһвални үндидар арқилиқ аилиси вә достлириға билдүргән. Үндидардики бу учур арқилиқ пәйзулланиң лагерға бериштин қечишни пиланлаватқанлиқини байқиған хитай сақчилири дәрһал нәқ мәйданға йетип берип, пәйзуллани тутқан; бу чағда пәйзулла өзини тиғ билән канийидин зәхимләндүрүвалған. Хәвәрдә йәнә баян қилинишичә, сақчилар яридар пәйзуллани дохтурханиға елип берип давалиған. Мәлум болушичә, 16‏-апрел күни дохтурханиға апирилған пәйзулла, 27-апрел күнигә кәлгәндә саламәтликидә әслигә келиш болған вә өзигә қараватқан сақчи ухлап қалған пәйттә йәни әтигән саәт 5 тә дохтурханидин қечип кәткән. 

Хитайниң пәйзулла һәққидики тутуш буйруқида, униң дохтурханидин бимар кийими вә тәрлик билән чиқип кәткәнлики йезилған болсиму, әмма униң илгири лагерға елип берилғанлиқи вә тәкрар лагерға апирилишқа уқтуруш барғанда лагерға апирилиштин өзини қачурғанлиқи қатарлиқ муһим пакитлар тилға елинмиған. Тутуш буйруқида, у бир ат оғриси дәп тонуштурулған болсиму, әмма уни тутуп бәргүчиләргә 100 миң йүән мукапат берилидиғанлиқи әскәртилгән вә пүтүн амма сәпәрвәрликкә чақирилған; йип учини йошурғанларниң җазалинидиғанлиқи уқтурулған. «Зимистан» журнилиниң 2-авғусттики хәвиридә пәйзулла утуқни издәш үчүн 70 миң кишиниң сәпәрвәр қилинғанлиқи, тәвәликтики дохтурхана вә мәктәпләрниң тақалғанлиқи баян қилинған. Журнал бу тәпсилатлар арқилиқ хитайниң тутушқа буйруқида дейилгән пәйзуллани ат оғрилиди дегән пакитниң ясалма икәнлики илгири сүрүлгән. Радийомиз игилигән әйни чағдики учурлардиму, пәйзулла утуқни издәш үчүн или тәвәсидики асаслиқ йолларниң, болупму қорғас тәвәсидики дәря, етиз вә дөңләрниң ахтурулғанлиқи, ахтурушқа қораллиқ күчләрдин башқа тәвәликтики амминиңму сәпәрвәр қилинғанлиқи дәлилләнгән иди. 

«Зимистан» журнилиниң хәвиридә, пәйзулланиң илгири қайси лагерға апирилғанлиқи вә бу қетимму қайси лагерға апирилмақчи икәнлики баян қилинмиған. Бизниң илгирики ениқлашлиримиз давамида, аһалиләр, пәйзулла тәвә болған 64-полк, 14-рота тәвәсидики кишиләрниң 66 ‏-полктики лагер орнида ишлитилгән бир дохтурханиға апириливатқанлиқини мәлум қилған иди. Хитайниң пәйзулла һәққидики тутуш буйруқида, униң 66 ‏-полктики бир дохтурханиға апирилғанлиқи тилға елинған болсиму, у дохтурханиниң лагер орнида ишлитиливатқанлиқи баян қилинмиған. «Зимистан» журнилида йәнә дейилишичә, пәйзулла утуқ дохтурханидин қачқандин кейин, уйғур райониниң партком секретари чен чүәнго пәйзулла утуқниң я өлүки я тирикини дәрһал тепишни буйруған. Радиойимизниң әйни чағдики ениқлашлири давамида, йәрлик вәзипидарлар, пәйзулла утуқниң 1‏-апрел күни қорғас наһийисиниң «ляңфанчаң», йәни уруқчилиқ мәйданида тутулғанлиқини баян қилған иди. 

«Зимистан» журнилиниң хәвиридә, униң мәзкур уруқчилиқ мәйданидики бир көврүкниң астидин тепилғанлиқи вә уни қоршавға алған сақчиларниң пәйзуллани нәқ мәйданда етивәткәнлики баян қилинған. Мәзкур журналниң хәвиридә, вәқәдин кейин тәвәликтә вәзипә өтәватқан бир түркүм сақчи, кадир вә әмәлдарларниң вәзиписидин елип ташланғанлиқи баян қилинған ; әмма буларға берилгән бу җазаниң пәйзулла утуққа һәддидин артуқ күч қолланғанлиқи, йәни нәқ мәйданда етивәткәнлики үчүн берилгән вә яки пәйзулла утуқни дохтурханидин қачуруп қойғанлиқи вә 5 күнгичә туталмиғанлиқи үчүн бәргәнлики хәвәрдә әскәртилмигән. 

Һөрмәтлик радио аңлиғучилар, хәвәрдики әң муһим бир нуқта, пәйзулла утуқниң илгири лагердики мәзгилдә немиләрни баштин кәчүргәнлики, район вәзийитидә қечип қутулушниң мүшкүллүкини билип туруп йәнә немә үчүн қечишқа урунғанлиқи, тиғ билән өзини зәхимләндүргән чеғида растинила өлүвелишни ойлиған вә яки дохтурханиға апирилиш пурситини күткәнлики вә униң қечиш пиланида өзи туруватқан тәвәликкә қошна болған қазақистан қечип чиқиш нийити болуп-болмиғанлиқи мәлум әмәс.

Пикирләр (1)
Share

Исимсиз оқурмән

Бу хәвәрдә:

‹‹Мәзкур журналниң хәвиридә, вәқәдин кейин тәвәликтә вәзипә өтәватқан бир түркүм сақчи, кадир вә әмәлдарларниң вәзиписидин елип ташланғанлиқи баян қилинған ; әмма буларға берилгән бу җазаниң пәйзулла утуққа һәддидин артуқ күч қолланғанлиқи, йәни нәқ мәйданда етивәткәнлики үчүн берилгән вә яки пәйзулла утуқни дохтурханидин қачуруп қойғанлиқи вә 5 күнгичә туталмиғанлиқи үчүн бәргәнлики хәвәрдә әскәртилмигән. »

Әсли хәвәрдә:
We also learned that the Chinese Communist Party was not happy that it took so long to find and kill Pazil Utuk, and punishments were applied. Thirty-two people in the 64th Regiment were penalized to varying degrees, from the leading cadres down to the company leaders. Police force cadres were stripped of their positions and Party memberships, and the Special Police Regiment leaders were all fired. The Political and Legal Committee secretary and the bureau director were also let go. All were given disciplinary punishments, and some were even detained.

HTTPS://BITTERWINTER.ORG/UYGHUR-MUSLIM-SHOT-DEAD-AFTER-MASSIVE-MANHUNT/

==================
Иланға пут сизиш зүрүр әмәс.

==================

Aug 04, 2018 01:15 PM

Толуқ бәт