Қарақаш пурчақчидики аһалиләр тутуш буйруқи чиқирилған пидаийларни қойниға елип икки ай қоғдиған

Мухбиримиз шөһрәт һошур
2014-08-06
Share
xoten-maniwer-xitay-saqchi.jpg Хитай қораллиқ күчлири террорлуққа қарши туруш маневири өткүзди. 2014-Йили 6-июн, хотән.
AFP

Хитай мәтбуатлири 1-авғуст күни қарақашниң пучақчи йезисида етип өлтүрүлгән 9 гумандарни тутуш вә өлтүрүштә, аһалиләрдин 30 миң кишиниң актиплиқ билән һәмкарлашқанлиқини хәвәр қилған иди.

Мухбиримизниң ениқлашлири давамида, мәзкур пидаийлар үстидин тутуш буйруқи чиқирилғандин кейин, хитай сақчилириниң шунчә дағдуғилиқ тәкшүрүшлиригә қаримай, йәрлик аһалиләрниң мәзкур пидаийларни икки айға қәдәр қойниға елип қоғдиғанлиқи ашкариланди. Мәлум болушичә, аһалиләрдин бири бир қетимлиқ өй тәкшүрүш давамида баш гумандар абдурахман абдукеримни тоху катикидә йошуруп қоғдап қалған. Аһалиләр пидаийларни, туралғу, йемәклик вә қатнаш қораллири биләнла тәминләп қалмастин, йәнә уларниң бир қисим партлатқуч материяллириниму сақлап бәргән. Мухбиримизниң бу қетимқи ениқлашлири давамида, мәзкур пидаийларниң ақсуда йәрасти тәлим көргәнлики, қарақашта тәшкилий вә техника җәһәттин тәйярлиқ қиливатқан басқучта паш болуп қелип, муддәттин бурун һәрикәткә өткәнлики ашкариланди.

Хитай мәтбуати, қарақашта 30 миң кишилик амминиң аталмиш террорчиларни паш қилиш вә қоршашта актип рол алғанлиқини хәвәр қилди, әмма биз игилигән учурлар, әһвалниң әксичә икәнликини ашкарилимақта. Мәлум болушичә, баш гумандар абдукерим абдурахман икки нәпәр сақчи хадимиға зәрбә берип қечип кәткәндин кейин, әтраптики аһалиләрдин 30 ға йеқин киши уни туралғу, йемәк-ичмәк вә қатнаш қорали билән тәминлигәнлики үчүн тутқун қилинған. Тутулғанлар абдурахман абдукеримниң нәдиликини йәнә паш қилмиған.

Абдурахман абдукеримни қоғдиған аһалиләрдин бири хитай өлкилиригә вақтинчә кетип туруш һәққидә акиси билән телефонда сөзлишиватқан вақитта, униң телефонини оғрилиқчә аңлиған сақчилар, униң өйидә пидаийлар ясиған бомбиниң йошурун сақлиниватқанлиқини байқивалған. Сақчилар мәзкур өйдә тәкшүрүш елип барғанда аилидики ханим партлатқуч дориниң орнини йөткиветиш арқилиқ хитай сақчилириниң тәкшүрүшини ақсатқан.

Пидаийларға четишлиқ делодин йеқиндин хәвири болған бир кәнт аманлиқ мудириниң баян қилишичә, абдурахман абдукерим қатарлиқ пидаийлар ақсуниң мәлум бир йезисида пахта терип ишләмчилик қиливатқан мәзгилидә бир диний заттин йәр асти тәлим алған. Улар юртиға қайтип кәлгәндин кейин, һөкүмәт контроллуқидики мәсчитләргә бериштин өзини тартқан вә пучақчи йезисида йәрасти тәблиғ вә тәлим тәрбийә билән шуғулланған. Бу җәрянда хитай һакимийитигә қаршилиқи һәссиләп ашқан, хитай һакимийитигә қарши күрәшкә бәл бағлиған бу пидаийлар, тәшкилий вә техника җәһәттин тәйярлиқ басқучида паш болуп қалған. Мәлум болушичә буниңға, уларниң ақсудики устазиниң тутулуши сәвәб болған.

Пурчақчидики пидаийларниң 27‏-майдин 19-июл күнигә қәдәр икки нәпәр сақчи вә бир нәпәр секретарни еғир яриландурғанлиқи, секретарниң аялини өлтүргәнлики мәлум, әмма уларниң 1-авғуст күни етилғанға қәдәр хитай сақчи вә хадимлириға йәнә зәрбә бәргән яки бәрмигәнлики мәлум әмәс. Хитайниң бу һәқтики бир телевизор хәвиридә болса, пидаийларниң қоршавда қалған мәзгилдә қоллиридики партлатқуч бомбини партлатқанлиқи баян қилинған, әмма бу партлитишта адәм өлгән-өлмигәнлики тилға елинмиған.

Юқириқи мәлуматлардин қариғанда, қариқаш пурчақчидики аһалиләрниң 9 нәпәр пидаийни тутуш давамида сақчилар тәрәптә әмәс, бәлки пидаийлар тәрәптә турғанлиқи, уларниң нәқ мәйданға мәҗбурий елип чиқилғанлиқи техиму айдиңлашти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт