Ghuljidiki “Terbiyelesh merkizi” din qachqan peyzulla utuq yekshenbe küni tutulghan

Muxbirimiz shöhret hoshur
2018.04.02
Peyzulla-Utuq.JPG Ghuljidiki “Terbiyelesh merkizi” din qachqan gumandar peyzulla utuq heqqide xitay saqchiliri chiqarghan tutush buyruqi.
RFA/Shohret Hoshur

27‏-Mart küni ghuljidiki bir “Terbiyelesh merkizi” din qachqan we xitay saqchiliri arisida éghir patiparaqchiliq peyda qilghan peyzulla utuq, ötken yekshenbe küni, yeni qéchip 6‏-küni chüshte kökdaladiki bir mazarliqta tutulghan.

Radiyomizgha yetküzülgen xitay saqchilirining peyzulla utuq heqqide chiqarghan tutush buyruqida uning doxturxanidin qachqanliqi tilgha élin'ghan idi. Bügün muxbirimizning del shu tutush opératsiyesige qatnashqan bixeterlik xadimliridin igilishiche, peyzulla utuq doxturxanidin qéchishtin awwal “Terbiyelesh merkizi” da 8 ay tutup turulghan iken.

Ili wilayitining gherbidiki nahiyeler, sheherler we ishlepchiqirish-qurulush bingtu'enining herqaysi polk meydanlirida keng kölemde dawam qiliwatqan mehkum peyzulla utuqni tutush opératsiyesining netijisi heqqide melumat élish üchün biz mezkur jaylardiki saqchi organliri we bixeterlik xadimlirigha téléfon qilduq. Ziyaretlirimiz dawamida tutush opératsiyesining peyzulla utuqning yurti bolghan kökdalada eng jiddiy élip bérilghanliqi aydinglashti.

Melum bolushiche, peyzulla utuqni qoghlap tutush opératsiyesige kökdala we uning etrapidiki ishlepchiqirish-qurulush polklirining meydanlirida 6 kündin béri xitay saqchiliridin bashqa, ammimu heriketke keltürülgen. Ayallar mehelle-koy we öylerni tekshürgen bolsa, erler xitay saqchilirigha masliship, dönglük, étiz-ériq, derya boyi we zaratgahliqlarda axturush élip barghan.

Kökdaladiki öy axturushta ayallargha yétekchilik qilghan bir mudirning ashkarilishiche, tutush opératsiyesi bashlinip 6‏-küni yeni, aldinqi yekshenbe küni chüshte axirlashqan. Peyzulla utuq 64‏-polkning uruqchiliq meydanidiki bir mazarliqta tutulghan.

Tutush buyruqida “Terbiyelesh lagéri” heqqide héchnéme déyilmigen. Uning peqet 10 künche awwal bir ijtima'iy jinayet sadir qilghanliqi tilgha élin'ghan. Emma weqede radiyomizgha eng deslepte uchur yetküzgüchi peyzulla utuqni qachti déyilgen 66‏-polk doxturxanisining nöwette “Terbiyelesh lagéri” süpitide qolliniliwatqanliqini ilgiri sürgen idi.

Tutush buyruqini körgendin kéyin, tutush opératsiyesige aktipliq bilen qétilghan we ikki kéche bir döngde qarawulluq qilghan bir saqchi xadimining bayan qilishiche, peyzulla utuq, 66‏-polktiki doxturxanidin qéchishtin awwal bir mehel “Terbiyelesh” te tutup turulghan. Bir kompartiye ezasi bolghan ayal mudirining bayan qilishiche, peyzulla utuq doxturxanidin qéchishtin awwal “Terbiyelesh merkizi” de 8 ay “Terbiye” de bolghan.

Peyzulla utuqning qorghas nahiyesige qarashliq leysen'gung uruqchiliq meydanida bir nawayxanida nan sétiwéliwatqanda tutulghanliqi heqqide uchurlarmu bar. Emma tutush opératsiyeside 6 kün wezipe orundighan saqchi xadimining bayan qilishiche, peyzulla kökdaladiki bir mazarliqta tutulghan. Weziyettin xewerdar kishiler, peyzulla utuq tutulghan mazarliqning chilpenmazar dep atilidighanliqi, bu mazarliqning peyzulla tughulup ösken 64‏-polk 14‏- rotidin 4 kilométirche uzaqliqta ikenlikini ilgiri sürüshmekte.

Melum bolushiche, peyzulla utuqni tutush opératsiyesi dawamida 61‏-polkning 4‏-rotisidinla 11 kishi tutqun qilin'ghan. Peyzulla utuqning a'ile-tawabi'ati, dost-buraderliri we qolum-qoshnilirining qanche kishining tutulghanliqi éniq emes. Peyzulla utuq heqqidiki tutush buyruqida uning 64-polk doxturxanisidin sapmakesh bilen qachqanliqi we üstide bimar kiyimi barliqi tilgha élin'ghan idi. Emma uning ene shu kökdaladiki mazarliqqiche bolghan 60-70 kilométir musapini qandaq basqanliqi, 6 kéchini qeyerlerde ötküzgenlikimu hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.