Peyzulla utuq “Terbiyelesh lagéri” din qachqanda yaridar ikenliki ashkarilandi

Muxbirimiz shöhret hoshur
2018.04.03
yallanma-saqchi-bazar-tomur-kaltek.jpg Qorallan'ghan yallanma saqchilarning kocha charlap yürgen körünüshi. 2017-Yili 3-noyabir, xoten.
AP Photo/Ng Han Guan

“Terbiyelesh lagéri” din qachqan peyzulla utuq heqqide radiyomizgha uchur yetküzgüchi, ghuljida saqchilar gumanliq kishilerni tekshürgen chaghda yaqisini qayrip boynini tekshürüwatqanliqini melum qilghan idi. Bezi ahalilermu özlirining qachqunning boynida pichaq izi barliqi heqqide xewerlendürülgenlikini éytqan idi. Mezkur tutush opératsiyesige qatnashqan saqchi xadimi peyzulla utuqning doxturxanigha ekélinishtin burun “Terbiyelesh lagéri” da ikenliki, doxturxanidin qachqanda boynidin yaridar ikenlikini ashkarilidi.

27-Mart küni ghuljida “Terbiyelesh lagéri” din qachqan we 1-aprél küni kökdalada bir mazarliqta tutulghan peyzulla utuq heqqidiki bir qatar uchurlar arisida diqqetke eng sazawiri, uning doxturxanidin yaridar halette qachqanliqidur. Gerche xitayning tutush buyruqida bu nuqta tilgha élinmighan bolsimu, weqe heqqide uchur yetküzgüchi, peyzulla utuqning boynida pichaq izi barliqini we saqchilarning yol tekshürgende gumanliq kishilerning boynini alahide tekshürgenlikini melum qilghan idi.

Shunga biz peyzulla utuq tutulghandin kéyinki ehwal éniqlishimiz dawamida, uning salametlik ehwali heqqide alaqidar xadimlardin melumat soriduq. Xadimlar peyzulla utuqning doxturxanidin yaridar halette qachqanliqini yoshurmidi. Radiyomizgha kelgen inkasta, peyzulla utuqning “Terbiyelesh lagéri” da yüz bergen bir qorqunchluq weqedin aman qalghanliqi yaki shundaq bir weqedin özini qutuldurush üchün qachqanliqi perez süpitide otturigha qoyulghan. Biz bu nuqtini aydinglashturush üchün opératsiyege qatnashqan saqchi xadimidin, peyzulla utuqning qéchish sewebi we meqsiti heqqide melumat soriduq. Saqchi xadimi özining tutush buyruqini körgendin kéyin tutush opératsiyesige aktip qatnashqanliqini, emma gumandarning ehwalidin bek tepsiliy melumatini yoqluqini, peqet peyzulla utuqning boynida bir tatuq barliqidin xewerdar ikenlikini éytti.

Nöwette shiwétsiyede yashawatqan sabiq saqchi xadimi, siyasiy közetküchi yolwas ependi, xewer heqqidiki uchurlarning bash axirigha asasen, peyzulla utuqning “Terbiyelesh lagéri” din qéchish üchün tighliq eswab bilen özini jarahetlendürgen we uningdin kéyin doxturxanigha ekélin'gen bolushi mumkinlikini otturigha qoydi. Yolwas ependi yene peyzullaning a'ilisi heqqide alghan bir ensiz uchurning uni mushundaq tewekkülchilik qilishqa mejburluq éhtimalinimu tilgha aldi.

Yolwas ependi sözining axirida nöwettiki weziyette yépiq lagérlarda herxil suyiqest yaki paji'elerning yüz bérish éhtimalinimu chetke qéqishqa bolmaydighanliqini, shunga peyzullaning kaniyini özi zeximligen emes, zeximlendürülgen bolush éhtimalliqi we shu paji'edin qutulush üchün lagér yaki doxturxanidin qachqanliq éhtimalliqinimu tilgha élip ötti.

Yuqirida peyzulla utuqning “Terbiyelesh lagéri” din qachqanda boynidin yaridar ikenliki heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.