Qaghiliqta Uyghur yashlirining qol téléfon arqiliq torgha kirishi ashkara halda cheklenmekte

Xitay da'iriliri 5 - iyul weqesidin kéyin Uyghur rayonidiki weziyetning muqimsizliq sewebliri qatarida tor alaqisini yeni Uyghurlarning torgha chiqishinimu muhim dep bilip kelgen, shunga torni kontrol qilishni hessilep küchetken bolsimu, emma Uyghurlarni torgha chiqishtin chekleshni qanun - tüzüm süpitide ashkara élan qilishqa pétinalmay kelgen. Yéqinqi bezi uchurlardin, xitayning bu jehette qanun we exlaq chégrisidin ashkara halda halqip ötüshke urunuwatqanliqi melum. Gheyriy resmiy bir uchurda ashkarilinishiche, xitayning tingshün shirkiti Uyghurche uchurni chekligen؛ yerlik da'irilerning ashkarilishiche qaghiliq nahiyiside 17 yash bilen 30 yash arisidiki yashlar eqliy iqtidargha ige qol téléfon ishlitishtin tosulghan.

Bügün ijtima'iy taratqularda tarqalghan bir uchurda bayan qilinishiche, xitayning eng meshhur tor shirketliridin biri bolghan tingshün shirkiti ündidarda Uyghurche yéziqta uchur yollashni chekligen, gerche bu uchurning toghriliqi téxi resmiy axbaratlarda delillenmigen bolsimu, qaghiliqta yolgha qoyuluwatqan Uyghur yashlirini eqliy iqtidargha ige téléfonlarni ishlitishtin tosush tedbirliri, mezkur uchurning asassiz emeslikidin bisharet bermekte.

Féysboktiki mezkur uchurda bildürüshiche, tingshün tor shirkiti ündidarda Uyghurche mezmun yollashni chekligen. Mezkur shirket, xitaydiki eng chong tor shirketliridin biri, u 1998 - yili xitayning shénjin shehiride qurulghan. Bolupmu, uning bashqurushidiki QQ tor chembiriki Uyghurlar teripidin keng kölemde qollinilghan. Melum bolushiche, 5 - iyul namayishigha chiqqan Uyghur yashliri QQ arqiliq alaqiliship toplan'ghan, 5 - iyul weqesidin kéyin Uyghur rayonida arqa - arqidin yüz bergen, xitay bar küchi bilen dunyadin yoshurushqa urunup kelgen qanliq weqelerning yip uchliri ündidar arqiliq sirtqa ashkarilan'ghan. Xitay da'iriliri bir yil dawam qilghan qattiq zerbe bérish dolqunidimu tor qollan'ghuchilirini asasliq nazaret obyékti qilghan we torda cheklen'gen uchurlarni körgüchilerni keng kölemde jazalighan. Qaghiliqta yolgha qoyuluwatqan Uyghur yashlirini torgha chiqishtin tosush tedbirimu tingshün torining Uyghurchini chekligenlik uchurining asassiz emeslikini yene bir nuqtidin delillimekte.