Қарамай шәһиридә мәктәп пүттуруп кәлгән уйғурларниң ишқа орунлишиш ниспити төвән болмақта

Қарамай шәһиридә һәр йили мәктәп пүттуруп келидиған уйғур оқуғучиларни нефитлик орунлириға хизмәткә елиш үчүн, йәрлик даириләр 7 - 8 - айларни емтиһан елиш вақти қилип бәлгиләп 29 яштин төвән болған мәктәп путтуруп келип хизмәт сақлаватқан қарамай нопусидики яшларни емтиһанға қатнаштуруп, буларниң ичидин лаяқәтлик болғанлардин 8% яшларни хизмәткә орунлаштуридикән.

Қарамайда һәр йили мәктәп путтуруп келидиған оқуғучилар сани 1200нәпәр әтрапида болуп, уйғурларму мушу емтиһанда лаяқәтлик болса, андин һөкүмәт кархансидики хизмәт орунлириға игә болалайдикән.

Нефитлик емтиһаниға уйғурлардин мәктәп путтуруп кәлгән вә хизмәт сақлаватқан болуп, оттура һесаб билән 1500 нәпәр әтрапида уйғур яшлар қатнишидикән.

Қарамай шәһиридики уйғурлардин иш кутуп турған уйғур яшлар сани ениқсиз мәлуматта 5000 дин ашидиғанлиқи тәхмин қилинмақта.

Бу һәқтә йәрлик һөкүмәт орунлиридин әһвал игиләшкә тиришқан болсақму, улар иш кутуп турған уйғур яшларниң санини ашкарилаштин өзлирини қачурди.

Нефитлик емтиһанида чиқидиған соаллар көп даирини өз ичигә алған болуп, қарамай тарихи, кархана мәдәнийити, милләтләр иттипақлиқи, қанун, кәспи әхлақ,әдәп - әхлақ, сағламлиқ, бихәтәрлик қатарлиқ мәзмунларни асас қилидикән. Бәлгиләнгән емтиһан вақти икки саәт болуп, 125номурлуқ таллаш шәклидә соал чиқирилидикән. Бу емтиһанниң салмиқи бир қәдәр еғир һәмдә хизмәт орун чәклик болғачқа, уйғур яшларниң хизмәткә орунлишиш ниспити 1500 нәпәр емтиһан бәргучидин тәхминән 50 нәпири өтәләйдикән.

Қарамай шәһиридики хитай көчмәнлириниң ниспити толуқсиз мәлуматта 98%дин артуқ болуп, қарамай нефитликини дәсләпки қәдәмдә ачқан уйғурларниң нәврилириниң һазир ишсизлиқ ниспити әң юқири орунда турмақта.

Қарамай шәһиридики карханиларни башқурғучи вә хизмәткә алғучи орунларниң мәсуллири хитайлар болғачқа, уйғурларни миллий кәмситиш билән биллә, йүзидин - йүзигә уйғурларни алмаймиз дәп рәт қилидикән.

Биз бу тоғрисда әһвал игиләш үчүн қарамай шәһиридики иш кутуп турған яшларни зиярәт қилдуқ. Зияритимизни қобул қилған, әмма исмни ашкарилашни халимиған бир яш вә бу емтиһанға қатнишип өтәлмәй, емтиһан бериш яш чәклимиси ешип кәткән, иш кутуп турған яш бу һәқтә сориған соаллиримизға җаваб бәрди.

Бу пираграммини шивитсийәдин иһсан тәйярлиди.