Qaraqashning manglay yézisida 20 pirsent nopusning "Yighiwélish lagéri" we türmide ikenliki ashkarilandi

Muxbirimiz shöhret hoshur
2018-06-19
Élxet
Pikir
Share
Print
Kishilik hoquq weziyiti közetküchisi, jang shaw isimlik aliy mektep oqughuchisi twitérda qeshqer kona sheherdiki yighiwélish lagéri dep körsetken xeritisi.
Kishilik hoquq weziyiti közetküchisi, jang shaw isimlik aliy mektep oqughuchisi twitérda qeshqer kona sheherdiki yighiwélish lagéri dep körsetken xeritisi.
Social Media/Shown Zhang

Muxbirimizning Uyghur diyaridiki "Yighiwélish lagérliri" heqqide élip barghan bügünki éniqlishi dawamida qaraqash nahiyisining 24 ming nopusluq manglay yézisida texminen 20 nopusning "Yighiwélish lagéri" we türmide ikenliki ashkarilandi. Melum bolushiche, manglay yézisidin toplan'ghanlar qaraqash nahiyisining bostanköl we poyiz istansisi terbiyilesh lagérigha ekétilgen.

Hörmetlik radi'o anglighuchilar, xitayche beydu uchur ambirida körsitilishiche, qaraqash nahiyisining manglay yézisi 15 kent, 72 mehelle, 5265 a'ile we 21137 nopustin teshkillen'gen. Manglay yézisidiki xitay ahalisining sani peqet 21 neper bolup, bu qaraqashtiki xitay köchmenliri asasen dégüdek ayaq basalmighan, nopusning 99. 9 Pirsenti Uyghur bolghan yézilardin biridur. Nöwette Uyghur aptonom rayonida dawam qiliwatqan atalmish "Yépiq terbiye" dolqunining mana mushundaq sap Uyghur yézilirida shiddet bilen dawam qiliwatqanliqi melum. Aldinqi künidiki éniqlishimizda qaraqash nahiye baziridiki yéngisheher kentide nopusning 40 pirsentining "Yighiwélish lagéri" da ikenliki ashkarilan'ghan idi. Bügünki éniqlishimiz dawamida qaraqash nahiye baziridin 5 kilométirche uzaqliqta bolghan we bazarning gherbi teripige toghra kelgen manglay yézisida nöwette 2000 din artuq kishining "Yighiwélish lagéri" da ikenliki ashkarilandi. Ilgiriki éniqlashlirimizdin melum bolushiche, "Yighiwélish lagéri" üchün toplan'ghanlarning bezilirining lagérgha apirilishtin burun, bezlirining bolsa lagérgha apirilghandin kéyin, üstidin jinayi höküm chiqirilip késiwétilgenliki ashkarilan'ghan idi. Manglay yézisidimu 1000 din artuq kishining késiwétilgenliki aydinglashti. Manglay yéziliq saqchixanining bashliqi bu yéza boyiche késilgen we tutulghanlarning 20 pirsentni igileydighanliqini tilgha aldi. Emma u arqidin 20 pirsentning qanche pirsentining lagérda, qanche pirsentining türmide ikenliki heqqidiki so'alimizgha jawab bérish niyitidin waz kechti. 

Biz saqchi xadimliri bilen sözlishish dawamida "Yighiwélish lagéri" gha apiriliwatqanlarning qandaq bir seweb we qandaq tertip bilen élip kétiliwatqanliqini soriduq. Seweb heqqide melumat bérelmigen bu saqchi xadimi élip kétilish tertipi heqqide bir qismining yuqiri derijilik j x organliri teripidin chüshken tizimlikke asasen, yene bir qisimning kent mudirlirining körsitishi bilen élip kétiliwatqanliqini bayan qildi. 

Alaqidar saqchi xadimliri yene manglay yézisidin toplan'ghanlarning asasliqi qaraqash nahiye baziridiki "Bostanköl terbiyilesh merkizi" bilen "Poyiz istansisi terbiyilesh merkizi" ge élip kétilgenlikini bayan qildi. U yene "Poyiz istansisi terbiyilesh merkizi" ning bir qewetlik, "Bostanköl terbiyilesh merkizi" ning bolsa 5 qewetlik bir bina ikenlikini bayan qildi.

Toluq bet