Qariqashta östengge chüshüp kétip qaza qilghan balining ata-anisining lagérda ikenliki ashkarilandi

Muxbirimiz shöhret hoshur
2018-12-28
Élxet
Pikir
Share
Print
Qariqashta östengge chüshüp kétip qaza qilghan bala.
Qariqashta östengge chüshüp kétip qaza qilghan bala.
Social Media

Birqanche kündin béri ijtima'iy taratqularda tarqalghan bir resimlik uchurda, bir kichik balining östengge chüshüp kétip muzlap ölgenliki bayan qilin'ghan idi. Muxbirimizning alaqidar orun we shexslerge qarita élip barghan téléfon ziyaretliri dawamida, mezkur weqening qaraqash nahiyisining zawa yéza chokanjilgha kentide yüz bergenliki, ölgüchining ata-anisi yighiwélish lagérigha ekétilgen ikki yashliq bir oghul ikenliki delillendi. Melum bolushiche, 78 yashliq bowisi teripidin qariliwatqan bu bala ishik aldidiki östengde muz téyilip oynawétip sugha chüshüp ketken we muzlap jan üzgen.

Hörmetlik radi'o anglighuchilar, taratqulardiki bu heqtiki resimlik uchurda, östengge chüshüp kétip ölgen balining ismining rexmutulla shirbaqi ikenliki we zawa yézisining chokanjilgha kentidin ikenliki bayan qilin'ghan. Matériyallarda körsitilishiche, zawa yézisi qaraqash nahiyisige tewe bolup, biz bu uchurning toghra-xataliqini aydinglashturush üchün, xoten wilayetlik j x qomandanliq merkizige téléfon qilduq. Téléfonimizni qobul qilghan xadimlar, weqege alaqidar melumat bermigen bolsimu, emma weqening yüz bergenlikini inkar qilmidi. Ular ochuq halda bu weqe heqqide melumat bérelmeydighanliqini éytti. Zawa yéza we uning etrapidiki bezi idare-jem'iyetlerdiki xadimlar weqe heqqide bir qisim melumatlarni ashkarilidi. Melum bir xadim weqening zawa yézisining chokanjilgha yézisida yüz bergenlikini tilgha aldi. Qariqashtiki ahalilerdin birining bayan qilishiche, u mezkur weqeni kentte échilghan yighinda kent sékrétaridin anglighan. Sékrétar kenttiki ahalilerni balilirigha yaxshi qarash heqqide agahlandurghan. Qariqashtiki bir saqchixana xadimining bayan qilishiche, östengge chüshüp ölgen balining zawa yéza 2 ‏-ottura mektepning 7 ‏-yilliq 6 ‏-sinipida oquydighan bir hedisi bar bolup, hedisi birqanche künning aldida sinip terbiyechisige inisining yoqap ketkenlikini éytqan we etisi östengdin jesiti tépilghanliqini melum qilghan saqchi xadimi bu ehwalni mekteptiki ene shu sinip mes'ulidin uqqan. Melum bolushiche, xotende yéqinqi 3 heptidin béri qattiq soghuq bolghan, östenglerdiki sular muz tutqan.

Ismining rexmutulla shirbaqi ikenliki ilgiri sürülüwatqan bu bala turuwatqan hoylining aldida bir östeng bar bolup, rexmutulla östengde muz téyilip oynawétip sugha chüshüp ketken we etisi östengdin jesiti tépilghan. Bu xadimning yene rexmutulla shirbaqining hedisining sinip mudiridin uqushiche, rexmutullaning ata-anisi yénida yoq bolup, u chong öyde yeni bowisi we momisi teripidin qariliwatqan iken. Ahalilerning yene özliri qatnashqan kent yighinliridin uqushiche, rexmutulla shirbaqining ata-anisi yighiwélish lagérida iken. Xadimlardin biri gep arisida rexmutullaning ata-anisining qariqashtiki bostanköl yighiwélish lagérida ikenlikini ashkarilidi. 

Hörmetlik radi'o anglighuchilar, yuqirida, ötken hepte axiri qariqashta ata-anisi lagérgha ekétilgen ikki yashliq bir balining östengge chüshüp kétip muzlap jan üzgenliki heqqide anglitish berduq.

Toluq bet