Ақсу қарталда бир уйғур яш сақчилар тәрипидин өйидә етиветилгән

Мухбиримиз шөһрәт һошур
2014-02-03
Елхәт
Пикир
Share
Принт
Әтигән саәт 8 әтрапида, ақсу шәһири егәрчи йезилиқ сақчиханиниң коча чарлаш әтрити партлитиш һуҗумиға учриған орун көрситилгән хәритә. 2010-Йили 19-авғуст.
Әтигән саәт 8 әтрапида, ақсу шәһири егәрчи йезилиқ сақчиханиниң коча чарлаш әтрити партлитиш һуҗумиға учриған орун көрситилгән хәритә. 2010-Йили 19-авғуст.
AFP Photo


Аңлиғучилиримиздин бири өткән пәйшәнбә күни радиомизға инкас йоллап ақсу шәһириниң қартал базирида вәқә чиққанлиқи һәққидә мәлумат бәрди; әмма инкаста вәқәниң немә икәнлики конкрет баян қилинмиған иди.

Мухбиримизниң бу йип учиға асасән әһвал игиләшлири давамида, чаршәнбә күни қарталниң долан кәнтидә бир сиясий мәһбус уйғур яшниң сақчилар тәрипидин өйидә етиветилгәнлики ашкариланди. Өгән йезилиқ сақчиханиниң башлиқи әсқәр давут вә қартал базариниң сиясий қанунға мәсул секритари адилҗан турғунниң баян қилишичә, хитайниң қартал сақчилири өй тәкшүрүш давамида бир уйғур пуқрани пичақ көтүрүп қаршлиқ көрсәтти дегән баһанә билән етип ташлиған.

Төвәндә мухбиримиз шөһрәт һошурниң бу һәқтә тәйярлиған программисини аңлайсиләр:

Зияритимизни қобул қилған тоқсу наһийә өгән йезилиқ сақчихана башлиқи әсқәр давут, ақсу шәһәр қартал базирида йүз бәргән вәқәдин җүмә күни хәвәр тапқанлиқини вә бу хәвәрни наһийилик сақчи идарисида ечилған йиғинда уққанлиқини ейтти. Йиғинда гәрчә вәқәниң тәпсилати билдүрүлмисиму, чаршәнбә күни йәни 29 - январ күни қартал базарлиқ сақчихана хадимлири өй тәкшүрүш елип бериватқанда, бир нәпәр гумандарниң тәкшүрүшкә бойсунмиғанлиқи вә қолиға пичақ елип сақчиларға қаршлиқ көрсәткәнлики, нәтиҗидә гумандарниң етиветилгәнлики баян қилинған вә пүтүн сақчилар һушяр болушқа чақирилған.

Биз йәнә қартал базарлиқ парткомниң сиясий қанунға мәсул секритари адилҗан турғунниму зиярәт қилди. У, вәқәниң қарталниң 19 - кәнти йәни долан кәнтидә йүз бәргәнликини, вәқәдә өлгүчиниң әслидә сабиқ бир сиясий мәһбус икәнликини баян қилди. Адилҗан турғунму гумандарниң сақчиларни өйигә киргүзмигәнлики вә сақчилар бесип киргәндә пичақ көтүрүп қаршлиқ көрсәткәнлики, сақчиларниң дәсләптә агаһландуруш оқи чиқарғанлиқи, әмма гумандар қаршлиқ көрситиштин ваз кәчмигәнлики үчүн етип ташлиғанлиқи қатарлиқларни баян қилди.

Базардики аһалиләр сақчиларниң нәқ мәйданда гумандарни бойсундуруш имкани тамамән барлиқини, әмма өзлиригә берилгән нәқ мәйданда етиветиш һоқуқиға асасән гумандарға һәддидин зиядә күч қолланғанлиқини баян қилди.

Пикирләр (0)
Share
Толуқ бәт