Фирансийә уйғур җәмийити қәшқәрдики қирғинчилиқ вәқәси һәққидә пәвқуладдә йиғин чақирди

27-Июн фирансийә уйғур җәмийити 22-июн қәшқәрдә йүз бәргән вәқә һәққидә пәвқуладдә йиғин чақирди.

Фирансийә уйғур җәмийитиниң рәиси әркин аблимитниң билдүрүшичә, йиғинда 22-июн қәшқәр тахта көврүктә йүз бәргән сақчиларниң тәкшүрүш понкитиға һуҗум қилиш вәқәсидә өлтүрүлгән уйғурлар вә шундақла уйғур елида йүз бериватқан бу хилдики қирғинчилиқларниң алдини елиш үчүн қандақ тәдбирләрни қоллиниш керәклики тоғрисида музакирә елип берилған.

Йиғинда парижда паалийәт елип бериватқан кишилик һоқуқ тәшкилатлири бирдәк, фирансийә парламентиға қәшқәрдә йүз бәргән вәқә вә шундақла нөвәттики уйғур елида йүргүзүлүватқан хитайниң қирғинчилиқ сиясити һәққидә мәхсус доклат тәйярлап йоллаш қарар қилинған.

Фирансийә уйғур җәмийити чақирған бу қетимқи пәвқуладдә җиддий йиғинға париждики кишилик һоқуқ тәшкилатлиридин хәлқара кәчүрүм тәшкилати, тәйвән, вийетнам, лаос қатарлиқ дөләт, район тәшкилатлириниң вәкиллири қатнашқан.

Йиғин шу күни чүштин кейин саәт бирдин үчкә қәдәр давамлашқан.

Биз йиғин ахирлашқандин кейин, мәзкур йиғин һәққидә тәпсилий учурға игә болуш үчүн фирансийә уйғур җәмийитиниң рәиси әркин аблимит билән телефон сөһбити елип бардуқ.

Юқириқи аваз улинишидин тәпсилатини аңлаң.