Uyghurlar qurban héytni qattiq bixeterlik tedbirliri ichide kütiwaldi

Muxbirimiz méhriban
2016-09-09
Élxet
Pikir
Share
Print
Ürümchi sheherlik islam jem'iytining 2016 - yilliq qurban héyt namizi toghrisidiki uqturushi
Ürümchi sheherlik islam jem'iytining 2016 - yilliq qurban héyt namizi toghrisidiki uqturushi
Photo: RFA


Uyghur rayon da'iriliri bu yilliq qurban héytning xitaylarning tawuz chaghini bilen bir waqitqa toghra kelgini üchün hökümet kadirliri we mekteplerni 7 künlük dem élishqa qoyup béridighanliqini élan qildi. Da'irilerning hökümet xewerliride yene, Uyghur diyarida ikki bayramdin ilgiri qattiq bixeterlik tedbirliri élin'ghandin bashqa, qurban héyt namizining oqulush waqtining 40 minut etrapida dep belgilen'genliki élan qilindi. Uyghur diyaridin ziyaritimizni qobul qilghan Uyghurlarning bildürüshiche, da'iriler ammiwi sorunlarda bixeterlik tedbirlirini kücheytkendin bashqa yene, idare - jem'iyetlerde nöwetchi bolushi kéreklikini uqturghan.

Uyghur diyaridin igiligen ehwallardin, 2016 - yilliq qurban héyt mezgilide her qétimliq bayram mezgillirige oxshashla bixeterlik tedbirliri kücheytilgendin bashqa, héyt namizining oqulush waqti qatarliqlargha qarita mexsus uqturush chiqirilip, her xil belgilime, cheklimilerning yolgha qoyulghanliqi melum boldi.

7 - Séntebir küni ijtima'iy taratqulardin ündidar qatarliqlarda, ürümchi sheherlik islam jem'iyiti namida chiqirilghan qurban héyt namizi heqqidiki uqturushning foto resimlik nusxisi tarqalghan. Uqturushta Uyghur aptonom rayoni tewesidiki herqaysi jaylarda bu yilliq qurban héyt namizining 12 - séntebir düshenbe küni etigen sa'et 6:45 tin 7:15 kiche oqup bolush kérekliki tilgha élin'ghan.

Xitay hökümitining kontrolluqi astidiki Uyghurlarning bu yilliq qurban héytni qandaq keypiyatta kütiwatqanliqini bilish üchün Uyghur élining jenub - shimalidiki Uyghurlargha téléfon qilip ehwal igiliduq.

Öz kimlikini ashkarilimasliq sherti bilen radiyomizgha ehwallarni bildürgen ürümchidiki melum ahale komitét xizmetchisining bildürüshiche, idarining orunlashturushi bilen, u bu yilliq qurban héyt namizi mezgilide namaz ehwalini nazaret qilish wezipisini alghanliqi üchün, Uyghurlarning en'eniwi aditi boyiche, héyt namizidin kéyin qebristanliqqa bérip, ölüp ketken uruq - tughqanlirini yoqlash ishini chüshtin kéyin'ge orunlashturushqa mejbur bolghan. Uning bildürüshiche, uning ürümchidiki hökümet organlirida ishleydighan bir qisim dostliri we tonushlirimu qurban héyt mezgilide öz idariliride nöwetchilikke orunlashturulghandin bashqa yene, ürümchi shehiridiki herqaysi meschitlerdiki héyt namizini nazaret qilishqa orunlashturulghan.

Ghulja sheherlik diniy ishlar idarisi tarqatqan uqturushqa asasen, bu yil idare we mekteplerning 7 künlük dem élishqa qoyup bergenlikini, bu yilliq qurban héyt namiziningmu hökümet belgilep bergen waqitta oqulidighanliqini bildürgen bir Uyghur, 9 - séntebir jüme namizidin kéyin meschit imamining qutbida qilghan sözide, jama'etke 12 - séntebir düshenbe küni etigen héyt namizi oqulidighan waqitni uqturush bilen bille, jama'etni héyt mezgilidiki bixeterlikke we milletler ittipaqliqi mesililirige diqqet qilishqa chaqirghanliqini bildürdi.

Ziyaritimizni qobul qilghan bu Uyghur yene, hökümet da'irilirining bu yilliq qurban héyt mezgilide qattiq bixeterlik tedbiri élishigha nispeten öz qarishini bildürüp,"Hazir bizge köngül azadiliki we xatirjemlik muhim bolup qaldi. Shunga hazir bu xil qattiq bixeterlik tedbirlirigimu könüp qalduq" dédi.

Uyghur élida oqutquchiliq qilidighan bir xanim ziyaritimizni qobul qilip, hökümetning belgilimisi boyiche, idare, mektepler 7 künlük dem élishqa qoyup bérilgen bolsimu, emma idare,mekteplerdiki yashlar we er xizmetchilerning héyt mezgilidiki nöwetchilikke orunlashturulghanliqini bildürdi.

Bu xanimdin adette hökümet xadimliri we oqughuchilarning jüme namizigha bérishini ashkara cheklep kéliwatqan hökümet da'irilirining, xizmetchiler we oqughuchilarning qurban héyt namizigha qatnishishigha qarita cheklime,belgilimilerni yolgha qoyghan yaki qoymighanliqini sorighinimizda, u oqutquchi éhtiyatchanliq bilen jawab bérip, "Hazirghiche hökümetning xizmetchilerning héyt namizigha bérishini chekleydighan ashkara uqturushlirini téxi körmiduq. Emma bilishimche, hökümet organlirida ishleydighanlar héyt namizigha bérish mesiliside yenila diqqet qilidu" dédi.

Xitay hökümet da'irilirining Uyghurlarning diniy étiqadi we diniy étiqadqa munasiwetlik bayram - pa'aliyetlirini her xil belgilimiler arqiliq cheklep kéliwatqanliqi chet'ellerdiki Uyghur teshkilatliri we xelq'ara diniy jem'iyetler, kishilik hoquq teshkilatliri we démokratik dölet hökümetliri teripidin tenqidlinip kéliwatqan mesililerning biri bolup, Uyghurlarning 2016 - yilliq qurban héyt bayriminimu her xil cheklime, belgilimiler we qattiq bixeterlik tedbirliri ichide ötküzüwatqanliqi xelq'ara taratqularning diqqitini qozghimaqta.

Toluq bet