Рабийә қадир ханим йәнә бир хәлқаралиқ кишилик һоқуқ мукапатиниң саһиби болди

Мухбиримиз гүлчеһрә
2015-10-29
Share
rabiye-Lantos-kishilik-hoquq-mukapat.jpg Уйғур миллий һәрикити рәһбири рабийә қадир ханим бу йиллиқ лантос хәлқаралиқ кишилик һоқуқ мукапат саһиблиқиға еришкән 3 шәхсниң биридур. 2015-Йили 27-өктәбир.
lantosfoundation.org

Америкидики том лантос кишилик һоқуқ вә адаләт фонди 27-өктәбир күни, мәзкур орган тәрипидин тәсис қилинған 2015-йиллиқ хәлқаралиқ ләнтос кишилик һоқуқ мукапат саһиблирини елан қилди.

Лантос кишилик һоқуқ мукапати хәлқарадики нопузлуқ кишилик һоқуқ мукапатлириниң бири болуп, уйғур миллий һәрикити рәһбири рабийә қадир ханим бу йиллиқ мәзкур мукапат саһиблиқиға еришкән 3 шәхсниң биридур. Мәзкур хәвәр уйғур паалийәтчилири вә уйғурларниң кишилик һоқуқиға көңүл бөлүп келиватқан хәлқаралиқ кишилик һоқуқ тәшкилатлирини сөйүндүрди. Улар "бу мукапатниң рабийә қадир ханимға берилиши униң уйғур кишилик һоқуқи үчүн елип барған күрәшлири вә төлигән бәдәллириниң етирап қилиниши болупла қалмай, уйғур давасиниң вә уйғур кишилик һоқуқ мәсилилириниң тонулушидиму зор әһмийәткә игә" дәп баһа бәрмәктә.

Мәркизи вашингтондики том ләнтос кишилик һоқуқ вә адаләт фонди елан қилған 2015-йиллиқ хәлқаралиқ ләнтос кишилик һоқуқ мукапатиға еришкән 3 қәһриман аял шәхс, уйғурларниң әркинлики, кишилик һоқуқи үчүн тәһдит вә зор бәдәлләргә қаримай күрәш қилип келиватқан лидери, дуня уйғур қурултийи рәиси рабийә қадир, аялларниң етиқад әркинлики, мусулман аялларниң баравәрлик һоқуқи үчүн хәлқара миқясида паалийәтлири вә қәләм күрәшлирини давам қиливатқан даңлиқ аптор иршад манҗи, қиз, аялларниң аилә зораванлиқиға учриши вә мәҗбурий никаһландурулушиға қарши дуня миқясида җанлиқ паалийәтләр елип бериватқан аяан хирси алий болуп, лантос кишилик һоқуқ вә адаләт фонди бу һәқтә елан қилған баянатида, бу 3 нәпәр мукапат саһиблириниң мислисиз роһий бесим вә хәтәрләргә қаримай кишилик һоқуқни қоғдаш күрәшлирини давам қилип келиватқанлиқини алаһидә йорутуп, том ләнтос кишилик һоқуқ вә адаләт фонди җәмийитиниң рәиси катрина севәт ләнтос ханимниң муну сөзлирини нәқил алған:
"фондимиз пәхирлиниш вә һөрмәт туйғуси ичидә, бу 3 нәпәр кишилик һоқуқ аял лидерларниң лантос кишилик һоқуқ мукапати саһиби болғанлиқини тәбрикләйду. Бу мукапат саһиблири һаятиниң тәһдиткә учришиға қаримай, аҗиз вә зиянкәшликкә учриғучилар үчүн өзини атиғанлар, улар пүткүл инсаний һәқләрниң капаләтчиси болмиш негизлик әркинликни қайил қиларлиқ шәкилдә тәрғиб қилип кәлди."

Том ләнтос фондиниң рәиси катрина севәт ләнтос ханимниң ярдәмчиси катиплиридин дәнниес ханим, ләнтос кишилик һоқуқ мукапатини чүшәндүрүп:
"бу мукапат йиллиқ мукапат, биринчи қетим 2009 йили тарқитилди. Бу мукапат саһиблири хәлқарадики тонулған кишилик һоқуқ лидерлири ичидин инсан һәқлирини илгири сүрүштә елип барған хизмәтлири вә нәтиҗилирини асас қилип таллиниду. Илгири һәммигә тонушлуқ лидерлардин сабиқ америка дөләт ишлири министири һилларий клинтон, исраилийә сабиқ президенти шимон перес, диний даһи далай лама, әма кишилик һоқуқ адвокати чең гуаңчеңларму бу мукапат саһиблири болған. "

Уйғур миллий һәрикити рәһбири рабийә қадир ханимниң мәзкур мукапат саһиби болғанлиқи уйғурларниң кишилик һоқуқиға көңүл бөлүп келиватқан хәлқаралиқ кишилик һоқуқ тәшкилатлириниму сөйүндүрди. Ишханисида зияритимизни қобул қилған хәлқара кәчүрүм тәшкилатиниң асия ишлири мудири, уйғурларниң йеқин дости т. Кумар әпәнди, рабийә қадир ханимни алаһидә тәбрикләйдиғанлиқини билдүрүп мундақ деди "лантос кишилик һоқуқ мукапати хәлқарадики нопузлуқ кишилик һоқуқ мукапатлириниң бири, бу мукапатниң рабийә қадир ханимдәк өзи вә аилисиниң мәнпәәтлириниң һәтта һаятиниң зиянға учришидин қорқмай барлиқини уйғурларниң һәқлиқ күрәшлиригә, кишилик һоқуқ күришигә атап һәр җәһәттин тәсәввур қилғусиз зор бәдәлләрни төләватқан, мушу күрәшлири сәвәблик оғуллири түрмигә елинған бир аял лидерға берилгәнликидин мәмнун болдум, рабийә қадир ханим бу мукапат саһиби болушқа тамамән лайиқ. Бу рабийә қадир ханимниң елип барған күрәшлириниң етирап қилиниши шундақла уйғур кишилик һоқуқ дәвасиниң нәзәргә елинишиға вә башқиларниңму зиянкәшликләргә учраватқан уйғурларниң һәқ-һоқуқлирини қоғдаш үчүн һәрикәткә келишигә түрткә болидиған зор әһмийәткә игә мукапат."

Рабийә қадир ханим сәпәрдә болуп қалғанлиқи үчүн, рабийә қадир ханимниң һавалиси билән зияритимизни қобул қилған америка уйғур бирләшмисиниң рәиси алим сейитоф әпәнди билән ләнтос кишилик һоқуқ мукапатиниң әһмийити һәққидә сөһбәттә болдуқ, алим сейитоф әпәнди хәлқара нопузға игә бу кишилик һоқуқ мукапатиға рабийә қадир ханимниң лайиқ көрүлгәнлики, уйғурлар вә уйғур дәваси үчүнму интайин хушаллинарлиқ бир хәвәр икәнликини билдүрүп "рабийә қадир ханимниң лантос кишилик һоқуқ мукапати саһиби болуши, кәлгүсидә нобел тинчлиқ мукапатиға йеқинлаштуридиған әһмийәтлик бир қәдәм, уйғур дәваси үчүнму бир илгириләш" деди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт