Rabiye qadir xanim yene bir xelq'araliq kishilik hoquq mukapatining sahibi boldi

Muxbirimiz gülchéhre
2015.10.29
rabiye-Lantos-kishilik-hoquq-mukapat.jpg Uyghur milliy herikiti rehbiri rabiye qadir xanim bu yilliq lantos xelq'araliq kishilik hoquq mukapat sahibliqigha érishken 3 shexsning biridur. 2015-Yili 27-öktebir.
lantosfoundation.org

Amérikidiki tom lantos kishilik hoquq we adalet fondi 27-öktebir küni, mezkur organ teripidin tesis qilin'ghan 2015-yilliq xelq'araliq lentos kishilik hoquq mukapat sahiblirini élan qildi.

Lantos kishilik hoquq mukapati xelq'aradiki nopuzluq kishilik hoquq mukapatlirining biri bolup, Uyghur milliy herikiti rehbiri rabiye qadir xanim bu yilliq mezkur mukapat sahibliqigha érishken 3 shexsning biridur. Mezkur xewer Uyghur pa'aliyetchiliri we Uyghurlarning kishilik hoquqigha köngül bölüp kéliwatqan xelq'araliq kishilik hoquq teshkilatlirini söyündürdi. Ular “Bu mukapatning rabiye qadir xanimgha bérilishi uning Uyghur kishilik hoquqi üchün élip barghan küreshliri we töligen bedellirining étirap qilinishi bolupla qalmay, Uyghur dawasining we Uyghur kishilik hoquq mesililirining tonulushidimu zor ehmiyetke ige” dep baha bermekte.

Merkizi washin'gtondiki tom lentos kishilik hoquq we adalet fondi élan qilghan 2015-yilliq xelq'araliq lentos kishilik hoquq mukapatigha érishken 3 qehriman ayal shexs, Uyghurlarning erkinliki, kishilik hoquqi üchün tehdit we zor bedellerge qarimay küresh qilip kéliwatqan lidéri, dunya Uyghur qurultiyi re'isi rabiye qadir, ayallarning étiqad erkinliki, musulman ayallarning barawerlik hoquqi üchün xelq'ara miqyasida pa'aliyetliri we qelem küreshlirini dawam qiliwatqan dangliq aptor irshad manji, qiz, ayallarning a'ile zorawanliqigha uchrishi we mejburiy nikahlandurulushigha qarshi dunya miqyasida janliq pa'aliyetler élip bériwatqan aya'an xirsi aliy bolup, lantos kishilik hoquq we adalet fondi bu heqte élan qilghan bayanatida, bu 3 neper mukapat sahiblirining mislisiz rohiy bésim we xeterlerge qarimay kishilik hoquqni qoghdash küreshlirini dawam qilip kéliwatqanliqini alahide yorutup, tom lentos kishilik hoquq we adalet fondi jem'iyitining re'isi katrina séwet lentos xanimning munu sözlirini neqil alghan:
“Fondimiz pexirlinish we hörmet tuyghusi ichide, bu 3 neper kishilik hoquq ayal lidérlarning lantos kishilik hoquq mukapati sahibi bolghanliqini tebrikleydu. Bu mukapat sahibliri hayatining tehditke uchrishigha qarimay, ajiz we ziyankeshlikke uchrighuchilar üchün özini atighanlar, ular pütkül insaniy heqlerning kapaletchisi bolmish négizlik erkinlikni qayil qilarliq shekilde terghib qilip keldi.”

Tom lentos fondining re'isi katrina séwet lentos xanimning yardemchisi katipliridin denniés xanim, lentos kishilik hoquq mukapatini chüshendürüp:
“Bu mukapat yilliq mukapat, birinchi qétim 2009 yili tarqitildi. Bu mukapat sahibliri xelq'aradiki tonulghan kishilik hoquq lidérliri ichidin insan heqlirini ilgiri sürüshte élip barghan xizmetliri we netijilirini asas qilip tallinidu. Ilgiri hemmige tonushluq lidérlardin sabiq amérika dölet ishliri ministiri hillariy klinton, isra'iliye sabiq prézidénti shimon pérés, diniy dahi dalay lama, ema kishilik hoquq adwokati chéng gu'angchénglarmu bu mukapat sahibliri bolghan. ”

Uyghur milliy herikiti rehbiri rabiye qadir xanimning mezkur mukapat sahibi bolghanliqi Uyghurlarning kishilik hoquqigha köngül bölüp kéliwatqan xelq'araliq kishilik hoquq teshkilatlirinimu söyündürdi. Ishxanisida ziyaritimizni qobul qilghan xelq'ara kechürüm teshkilatining asiya ishliri mudiri, Uyghurlarning yéqin dosti t. Kumar ependi, rabiye qadir xanimni alahide tebrikleydighanliqini bildürüp mundaq dédi “Lantos kishilik hoquq mukapati xelq'aradiki nopuzluq kishilik hoquq mukapatlirining biri, bu mukapatning rabiye qadir xanimdek özi we a'ilisining menpe'etlirining hetta hayatining ziyan'gha uchrishidin qorqmay barliqini Uyghurlarning heqliq küreshlirige, kishilik hoquq kürishige atap her jehettin tesewwur qilghusiz zor bedellerni tölewatqan, mushu küreshliri seweblik oghulliri türmige élin'ghan bir ayal lidérgha bérilgenlikidin memnun boldum, rabiye qadir xanim bu mukapat sahibi bolushqa tamamen layiq. Bu rabiye qadir xanimning élip barghan küreshlirining étirap qilinishi shundaqla Uyghur kishilik hoquq dewasining nezerge élinishigha we bashqilarningmu ziyankeshliklerge uchrawatqan Uyghurlarning heq-hoquqlirini qoghdash üchün heriketke kélishige türtke bolidighan zor ehmiyetke ige mukapat.”

Rabiye qadir xanim seperde bolup qalghanliqi üchün, rabiye qadir xanimning hawalisi bilen ziyaritimizni qobul qilghan amérika Uyghur birleshmisining re'isi alim séyitof ependi bilen lentos kishilik hoquq mukapatining ehmiyiti heqqide söhbette bolduq, alim séyitof ependi xelq'ara nopuzgha ige bu kishilik hoquq mukapatigha rabiye qadir xanimning layiq körülgenliki, Uyghurlar we Uyghur dewasi üchünmu intayin xushallinarliq bir xewer ikenlikini bildürüp “Rabiye qadir xanimning lantos kishilik hoquq mukapati sahibi bolushi, kelgüside nobél tinchliq mukapatigha yéqinlashturidighan ehmiyetlik bir qedem, Uyghur dewasi üchünmu bir ilgirilesh” dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.