Рабийә қадир ханим: мән тәйвәнгә һәр заман беришкә тәйяр

Йеқинда тәйвән парламентида чақирилған тибәт, уйғур, моңғулларниң кишилик һоқуқ мәсилиси йиғинида парламент әзаси фредй лим дуня уйғур қурултийи рәиси рабийә қадир ханим һәққидә тохтилип, тәйвәнниң рабийә қадир ханимни һәр заман қарши алидиғанлиқини билдүргән иди.

Бүгүн шу мунасивәт билән радийомизниң зияритини қобул қилған рабийә қадир ханим тәйвән парламент әзасиниң сөзидин өзиниң толиму мәмнун болғанлиқини қилидиғанлиқини ейтти.

Мәлум болушичә, 2009-йили 10-айниң 16-күнидин, 29-күнигичә тәйвәнниң гавшюң шәһиридә өткүзүлгән гавшюң кино фестивалида уйғур миллий һәрикитиниң рәһбири рабийә қадир ханимниң һаят паалийити тема қилинған һөҗҗәтлик филим “муһәббәтниң он шәрти” ни қоюш қарар қилинип, гавшюң шәһәрлик һөкүмәт рабийә қадир ханимни кино фестивалиға тәклип қилғанда, тәйвән рабийә қадир ханимға виза беришни рәт қилип, фестивалда мәзкур филимниң қоюлушини чәклигән.

Шундақла тәйвән ички ишлар министири “рабийә қадирға тәйвәнниң бихәтәрлики үчүн виза берилмәйду. Униң тәшкилатиниң ‛шәрқий түркистан ислам һәрикити‚ дегән террорчи тәшкилат билән билән мунасивити бар” дәп җакарлиған иди.
Әйни вақитта рабийә қадир ханим кино фестивалиға қатнишалмиған болсиму, бирақ көплигән тосалғулардин кейин фестивалда “муһәббәтниң он шәрти” қоюлуп, тәйвәнни ләрзигә салған вә рабийә қадир ханим һәққидә тәйвән мәтбуатлирида көп бәс-муназириләр болушқан иди.

Аридин бир қанчә йиллар өтүп, йәни йеқинда “хәлқара инсан һәқлири күни” мунасивити билән тәйвән парламентида тибәт, уйғур, моңғул вә хоңкоңлуқларниң кишилик һоқуқ мәсилиси бойичә чақирилған йиғинда тәйвәнлик атақлиқ нахшичи, тәйвән парламент әзаси, тәйвән парламенти тибәт мәсилисини қоллаш гурупписиниң мәсули фредй лим бизниң зияритимизни қобул қилғанда “тәйвән рабийә қадир ханимни һәр заман қарши алиду. Мениң әзалирим рабийә қадир ханимни тәйвәнгә тәклип қилиш үчүн униң ишханиси билән алақә қиливатиду” дегән иди.

Шу мунасивәт билән бүгүн зияритимизни қобул қилған дуня уйғур қурултийиниң рәиси рабийә қадир ханим парламент әзаси фредй лимниң мәзкур тәклипидин өзиниң толиму мәмнун болғанлиқини илгири сүрүп, һәр заман тәйвәнгә беришкә тәйяр икәнликини билдүрди.

Рабийә қадир ханим йеқин кәлгүсидә тәйвәндә елип баридиған иш-паалийәтлириниң күн тәртипидә уйғур мусапирлар мәсилисиниң асаслиқ орунда туридиғанлиқини, болупму тәйвән һөкүмитиниң тибәт мусапирлириға тутқан сияситини уйғур мусапирлириғиму тәтбиқлиши керәкликини, шундақла тибәт, уйғур, моңғул вә тәйвәнликләрниң ортақ иттипақлишип өз-ара чүшиниш һасил қилишниң зөрүрлүкини тәкитләйдиғанлиқини билдүрди.

Рабийә қадир ханим зияритимиз җәрянида йәнә тәйвәндә уйғур мәсилисини аңлитишта өзи һәққидә ишлигән “муһәббәтниң он шәрти” намлиқ филимниң муһим рол ойниғанлиқини илгири сүрди.

Рабийә қадир ханим ахирида тәйвәндә елип берилидиған паалийәтлириниң уйғур давасиға болған иҗабий роли һәққидиму қисқичә тохталди.

Юқириқи аваз улинишидин тәпсилатини аңлаң.