Мисирда тутқун қилинған рәһимҗан азатниң хитайға қайтурулғанлиқи мәлум болмақта

Мухбиримиз гүлчеһрә
2018-04-13
Share
misirda-uyghur-rehimjan-azad.jpg Мисирда ғайиб болған 16 уйғурниң бири, әзһәр университетиниң оқуғучиси рәһимҗан азад.
RFA/Gülchéhre

Бултур яздики тутқунда мисирдин қечип явропаға келип панаһланған рәйһангүл ханим йеқинда зияритимизни қобул қилғанда өзиниң мисирдики тонушлиридин "16 балини хитайға елип кетипту," дегән гәпләрни аңлиғанлиқини, бу хил хәвәрләрниң уйғурларда бәлгилик әндишиләрни пәйда қилғанлиқни баян қилған иди.

Тура түрмисидин ғайиб болған елясҗанниң аяли өзигә охшаш ери тутқунға учрап ғайиб болғанларниң аяллиридин бәзи хәвәрләрни аңлиғанлиқини, йәни хитай сақчилириниң мисирдин қайтуруп кәткәнлики илгири сүрүлүватқан 16 уйғурдин бириниң ғулҗидики өйигә бастуруп кирип, униң қишлиқ кийимлирини елип кәткәнликини баян қилди. Елясҗанниң аяли һазирғичә еридин ениқ хәвәр алалмиғачқа, ериниң хитайға өткүзүп берилгәнликини җәзмләштүрәлмәй үмид күтүп туруватқанлиқиниму баян қилған иди.

Биз бу учурларға асасән мисирдин сүрүштә қилип ахири "16 балини хитайға өткүзүп берипту," дегән бу ениқсиз учурниң мәнбәсигә улаштуқ.

Нам-шәрипини ашкарилашни халимайдиған бир яш аялниң ейтишичә, тура түрмисидин йөткәлгәндин кейин ғайиб қиливетилгән 16 уйғурниң бири рәһимҗан азад болуп, бу киши дәл униң ери икән. 2017-Йили 4-июл күни мисир сақчилири уни өйидин елиш чиқип кәткәндә уларниң йеңи туғулған пәрзәнти аран 50 күнлүк болған икән.

Рәһимҗан азад 2013-йили мисирға кәлгән болуп, у 1988-йили 29-феврал күни ғулҗа наһийәсидә туғулған икән.

Рәһимҗанниң аялиниң ейтишичә, униң ери сәвәбсиз тутқун қилинип тура түрмисигә соланғандин кейинму улар арилап телефонда параңлишип турған вә бәзидә еригә тамақ етипму киргүзгән. Өткән йили сентәбир күнидики телефон сөһбити уларниң ахирқи қетимлиқ алақилишиши болуп қалған. У еридин һечқандақ хәвәр алалмай турған пәйттә, йәни 2017-йили 11-айниң 18-күни ғулҗидики туғқанлиридин реһимҗанниң ғулҗа наһийәсидики аписиниң өйигә сақчилар келип, "оғлуңларни елип кәлдуқ, қишлиқ кийимлири болса бериңлар" дәп елип кәткининиң хәвирини алған.

У рәһимҗанниң ақивитини сүрүштә қилип қаһирәдики хитай әлчиханисиға барған болсиму, лекин улар мәсулийәтни мисир тәрәпкә артип башқа һечқандақ җаваб бәрмигән. Һазирғичә у реһимҗанниң қайтуруп кетилгәндин кейинки әһвалидин хәвәр алалмай кәлмәктә икән.

У тутқундики әрлириниң нәдилики яки өлүк тирикидин хәвәр алалмайватқан һәдә-сиңилларға қариғанда, өзиниң ериниң һаят икәнликидин хәвәр тапқандин кейин көңли бир аз арамиға чүшкәнликини билдүрди.

Әмди бир яшқа киргән оғлини бағриға бесип, турмуш қийинчилиқи вә роһий бесимларға бәрдашлиқ берип яшаватқан бу яш аял қийналғанлирида қанчә қетимлап "немә көрсәм көрдүм," дәп юртиға қайтип кәтмәкчи болған болсиму, лекин кейинчә нарәсидә балисини ойлап бу ойдин ваз кәчкәнликини билдүрди.

Униң ейтишичә, мисирда уйғур оқуғучиларни тутуш башлиништин бурун уйғурлар асаслиқ өй иҗарә елип олтурған 7-район интайин қайнам ташқин, қәдәмдә бир уйғурлар учрап туридиған бир көңүллүк мәһәллә икән. Өткән йили яздики тутқундин кейин тутулғанлар тутулуп, кәткини кәткән болуп, бу районда дукан вә ашхана ачқан уйғурларму дуканлирини тақап нәләргидур ғайиб болған. Қаһирәдики уйғурлар мәһәллиси дәп аталған-7 районниң һазирқи һалитини у "бу йәрдә уйғурларниң дәври түгиди," дегән сөз билән ипадә қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт