Xotendiki yardemchi saqchilar 48 sa'etlik uda nöwetchilik we éghir charchashtin shikayet qildi

Uyghur diyarining jenub we shimalida, bolupmu siyasiy jehettin eng sezgür rayonlarning biri bolghan xoten wilayitide bu yil féwraldin bashlap türkümlep yardemchi saqchilarning qobul qilin'ghanliqi melum.

Radiyomizning xotenning kériye nahiyesidiki saqchixanilardin ehwal igilishiche, “24 Sa'et ishlep 24 sa'et dem élish” tek xizmet belgilimisi bilen qobul qilin'ghan yardemchi saqchilar yéqinqi üch-töt aydin buyan dem alalmighan.

Kériye nahiyesining kökyar yéziliq saqchixanisidin téléfonimizni qobul qilghan bir resmiy saqchi yéngidin qobul qilin'ghan yardemchi saqchilarning uda 48 sa'et yéza-bazarlarni charlaydighanliqini bildürdi.

Kériye nahiyesining siyek yéziliq saqchixanisidiki bir neper Uyghur saqchimu bu heqte melumat berdi. Uning bildürüshiche, yéza-kentlerdiki tekshürüsh tosaqlirida nöwetchilik qiliwatqan yardemchi saqchilarning bir qismi yéqindin buyan istépa bérishke bashlighan.

Siyek saqchixanisidiki yene bir Uyghur yardemchi saqchimu özining yardemchi saqchi bolup ishlewatqili 4 aydin ashqanliqini, bu jeryanda bir künmu dem élip baqmighanliqini éytip, yardemchi saqchilarning nöwettiki qiyin ehwalidin shikayet qildi.

Uning bildürüshiche, nöwette xoten yéziliri xitayche “Gangpéng” déyilidighan, emma Uyghurchigha “Xelqqe qolayliq saqchi mulazimet ponkiti” dep terjime qiliniwatqan tekshürüsh tosaqliri bilen torlashturulghan iken.

Bu yerde kéche-kündüz nöwetchilikte turuwatqan Uyghur yardemchi saqchilar bir tereptin éghir xizmet bésimi we charchash sewebidin halidin ketken bolsa, yene bir tereptin tekshürüsh ponkitidiki xitay bashliqlirining xorlishi we bozek qilishigha uchraydiken.