Сенатор марко рубийо "фокус" хәвәрләр қанилида уйғурларниң вәзийитини тонуштурди

Мухбиримиз ирадә
2018-08-24
Share
Marco-Rubio-FoxNewsda-Uyghurlar-Heqqide.jpg Сенатор марко рубийо "фокус" хәвәрләр қанилида уйғурларниң вәзийитини тонуштурмақта. 2018-Йили, 23-авғуст. Америка.
foxnews.com

Һөрмәтлик радио аңлиғучилар, "фокус" хәвәр қанилиниң тонулған программа риясәтчиси таккер карлсон 23-авғуст күнидики ахшамлиқ сөһбәт программисида уйғурларниң вәзийитигә мәхсус орун бәрди. У "хитай тәһдити" дәп мавзу қоюлған бу программисиға америка кеңәш палата әзаси марко рубийони тәклип қилип, униңдин уйғурлар вә хитай һөкүмити һәққидә соалларни сориди.

Риясәтчи таккер карлсон программисиниң кириш қисмида америкида бир қисим кишиләр өзиниң диктаторилиққа қарши икәнликини илгири сүрсиму, әмма хитайға охшаш һәқиқий бир диктаторға кәлгәндә җимип қалидиғанлиқини, кишилик һоқуқ хатириси интайин начар болған хитай һөкүмитиниң һазир өзиниң ғәрбий қисмидики шинҗаң уйғур аптоном районида бир милйондин ошуқ мусулманни йеғивелиш лагерлириға солаш билән биргә йәнә районға зор көләмдә хитай көчмәнлирини йөткәш арқилиқ уларниң мәдәнийитини йоқ қилишқа урунуватқанлиқини баян қилип өтти. Андин у кеңәш палата әзаси марко рубийониң бу мәсилигә көңүл бөлүватқан санақлиқ сенаторларниң бири икәнликини ейтип, уни сөзгә тәклип қилди. Таккер карлсон марко рубийодин: "бир милйондин ибарәт бундақ зор сандики адәмниң лагерда йетиватқанлиқи растму, бу раст болса немишқа бу һәқтә көпләп әкс сада йоқ" дәп сориди. 

Сенатор рубийо буниңға җаваб берип: "бу раст. Гугулниң йәршари епидә бу лагерлар наһайити ениқ көрүниду. Әмма биз хәвәрләргә қарайдиған болсақ, өзиниң епидә бу лагерлар ениқ көрүнидиған гугул ширкити һазир хитай базириға қайтип кириш үчүн хитай билән һәмкарлишиватиду. Хитай һөкүмити ‹қайта тәрбийә мәркизи' дәп аталған бу орунларда кишиләрни өз исмини өзгәртиш қатарлиқ һәр түрлүк ишларға мәҗбурлаватиду. Бу йәрдә диққәт тартишқа тегишлик бир нуқта шуки, уйғурлар ашқун кишиләр әмәс," дәйду. 

Сенатор марко рубийо сөзи давамида йәнә хитайға техникилирини сетип бериватқан америка техника ширкәтлири билән бирликтә йәнә ислам дунясини тәнқид қилиду: "бу йәрдә адәмни ғәзәпләндүридиған бир қанчә мәсилә бар. Биринчидин, америкиниң вә явропаниң бир қисим ширкәтлири өзиниң назарәт техникилирини хитайға сетип берип, ашу инсанларниң қейин әһвалға қелишиға йол ечип бериватиду. Мәсилән, хитай һөкүмити америкиниң д н а техникисини ишлитип туруп, у инсанларниң д н а учурини мәҗбурий йиғиватиду. Бу еһтималлиқ интайин юқири. Иккинчидин, дунядики әрәб дөләтлири, мусулман дөләтлиригә қарап бақайли. Адәттә башқа бир иш болса оттуриға сәкрәп чүшидиған оттура шәрқтики мусулман дөләтләр бу мәсилигә кәлгәндә пүтүнләй сүкүт ичидә туруватиду. Әлвәттә буниң җаваби пул. Хитайниң пули пүтүн дуняни айлинип, һөкүмәтләргә пара бериш арқилиқ уларни бу мәсилидә еғиз ачалмайдиған қилип қойди. Хитай бу дөләтләрни өзлириниң қәбиһ вә вәһший сиясәтлирини көрүп турупму гәп қилмай сүкүттә туруши үчүн пара бәрди. Әслидә булар дәл ши җинпиң һакимийитиниң һәқиқий йүзини көрситип беридиған сиясәтләр иди." 

Риясәтчи таккер карлсон марко рубийониң җавабидин һәйран қелип, "бу һәқиқәтәнму һәйран қаларлиқ ишкән. Сәуди әрәбистан вә мисир һөкүмәтлири дунядики чоң мусулман һакимийәтләрдур. Улар хитайға мусулманларға қиливатқан зулумини тохтитиш һәққидә бир бесим ишләтмидиму?" дәп сориди. 

Марко рубийо буниңға җаваб берип: "шундақ, улар тилға елипму бақмиди. Хәлқаралиқ органлардиму шундақ. Ахири өткән һәптә бир хәлқаралиқ орган бу мәсилидә хитай һөкүмитини җаваб беришкә қистиди. Әмма ислам дөләтләрниң өзи чиқип бирнәрсә дәп бақмиди. Дегәнлири болған тәқдирдиму улар наһайити юмшақ сөзләр. Әгәр бир ғәрб дөлити һәрқандақ бир динға тәвә болған бир милйон кишини ашундақ соливалған болсиди, у һалда биз наһайити зор чуқанларни аңлиған болаттуқ. Әмма уйғурлар мәсилисигә кәлгәндә бу дөләтләрниң һөкүмәтлири көпинчиси хитай һөкүмитидин пара алған яки хитай һөкүмитиниң мәбләғ селиш һәққидики вәдилирини алған болғачқа көзини юмувалди. Мәнчә, бу кишиниң ғәзипини қозғайдиған вә қобул қилғили болмайдиған бир ясалмилиқ. Һазир трамп һөкүмити бу мәсилигә диққәт қилип, бир иш қилишқа тиришиватиду. Мән буниңдин интайин хурсән болуватимән," деди. 

Сенатор марко рубийо сөһбәт программидики сөзидә йәнә америкилиқларниңму хитай һәққидики тонушиниң йетәрлик әмәсликиниму әскәртип өтти вә "нурғун америкилиқлар 1991-йилидин бери һәқиқәтни чүшәнмәй кәлгән иди. Улар техи әмди ойғиниватиду. Хитай бизниң һәқиқий мәнидики риқабәтчимиз әмәс, улар дурус нийәт билән һәқиқий риқабәтлишишни әмәс, бәлки түрлүк оюнлар билән бизниң орнимизни игиләшниң койида болуватиду," деди. 

Марко рубийо сөзини давам қилип "әпсуски, бир қисим америка ширкәтлири хитай билән тиҗарәт қилишқа шунчилик һәвәс қилиду. Улар америка мудапиә министирлиқи вә бәш бурҗәклик бина билән мудапиә пиланлирида һәмкарлишишни халимайду-ю, әмма хитайниң армийиси үчүн хизмәт қилидиған университетлири билән һәмкарлишиду. Мән президент трамп билән һәптидә аз дегәндә бир қетим телефонда көрүшүп, уни риғбәтләндүрүп туруватимән. Чүнки бу һөкүмәт узун йиллар бойичә давам қилған сүйистемалдин кейин ахири хитайға қарши орнидин дәс турған бирдин-бир һөкүмәттур," деди. Марко рубийо сөһбәт программисиниң ахирида программа риясәтчиси таккер карлсонниң бу мәсилигә орун бәргәнликигә хурсәнликини ипадиләп сөзини аяғлаштурди. 

Һөрмәтлик радио аңлиғучилар, йеқиндин буян уйғурлар мәсилиси америкидики мана мушундақ нурғунлиған муһим хәвәр вә сөһбәт программилирида орун елип, америка җамаитиниң уйғур мәсилисигә болған чүшәнчисини вә еңини ашурушта муһим рол ойнимақта. Таккер карлсонниң ахшамлиқ программисиму һәр күни кәч саәт 8' дә фокус қанилида тарқитилидиған вә нурғун кишиләр, болупму америкидики оң қанат сиясәтни яқилайдиған кишиләр көпләп көридиған программилардин бири.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт