Серикҗан билашоғли “қазақистан хитай достлуқиға бузғунчилиқ қилған” дәп әйибләшкә учриған

Уйғур елидики лагерларға қамалған қазақларниң мәсилини йорутушта бәлгилик рол ойнап келиватқан “ата юрт пидаийлири” ниң башламчиси серикҗан билашоғли-12 вә 13-феврал күнлири қазақистандики алмута шәһәрлик сотта “қазақистан хитай достлуқиға бузғунчилиқ қилиш”, “миллий өчмәнлик пәйда қилиш”, “қанунсиз тәшкилат қуруш” дегәндәк әйибләшләргә учриған. Бу, оттура асия мәтбуатлири һәмдә җамаити арисидиму зор ғулғула қозғиған. Серк әпәнди мәхсус зияритимиз қобул қилип сот җәряни вә нәтиҗилири һәққидә тәпсилий мәлумат бәрди.

Алмутадин мәхсус телефон зияритимизни қобул қилған қазақларниң кишилик һоқуқ паалийәтчиси, ата юрт пидаийлириниң башламчиси серикҗан билашоғлиниң 12-вә 13-феврал күнлири алмутада ечилған сот җәряни һәққидә бәргән мәлуматиға қариғанда, серикҗан, қазақистандики бир қисим қазақ җәмийәтлириниң уни “қанунсиз тәшкилат қуруп, ялған учур тарқатқан”, “ата юрт пидаийлири намида униң тарқатқан лагерларға аит учурлири ялған, булар хитай-қазақистан достлуқиға вә қазақистанниң бихәтәрликигә зиянлиқ”, “қазақ зиялийлар үстидин һақарәт қилған” “миллий зиддийәт пәйда қилған” дәп әйибләп, униң үстидин алмута медио наһийиси сақчиханисиға шикайәт қилғанлиқи сәвәблик сотқа чақирилған. Бу нөвәт мәмурий җәһәттин сотланған серикҗан билашоғли 700 доллар җәриманә төләшкә мәҗбур болған.

Серикҗан бу сотни қазақистандики өзини хитай муһаҗирлири дәп атайдиған 30 әтрапида “қазақниң имзалиқ шикайити сәвәблик оттуриға чиққан бир мәйдан суйиқәст” дәп қарайдиғанлиқини оттуриға қойди. “бу оюнниң арқисида хитай һөкүмити бар” дәп қарайдиғанлиқини илгири сүргән серикҗанниң ейтишичә, гәрчә бу сотта уларниң әйибләшлири ақмиған болсиму, бирақ бу бир түркүм шикайәтчиләр униң үстидин йәнә уни өзлириниң “иззәт-абруйиға дәхли-тәрз қилиш” билән әрз қилип, җинайи ишлар даваси ачқан икән. Әмма иккинчи қетимлиқ сот вақти техи бекитилмигән.

Серикҗанниң илгири сүрүшичә, өзи үстидин сотқа әрзи сунған бу бир түркүм қазақлар униң аммиви нутуқлирида, лагер мәсилисигә сүкүт қиливатқанларни тәнқид қилип ейтқан: “милләтниң тәқдири қил үстидә туруватқан вәзийәттә пәқәтла икки хил адәмләр бар, бири милләт үчүн күрәш қилғанла, йәнә бири сатқунлар. 3-Хил адәмләр йоқ, сүкүттә туруватқанлар болса хаинлар” дегән мәнидики сөзлирини тутувелип: униң үстидин “қазақ зиялийлирини һақарәт қилди, йүз абруйиға дәхли-тәрз қилди” дәп опчә шикайәт қилған. 

Серикҗан өзигә қарши шикайәттә болунған бу кишиләрниң, “ата юрт пидаийлири” тәрипидин тарқитилған лагерлар һәққидики барлиқ гуваһлиқ учур вә испатларни ялғанға чиқириш үчүн, мәтбуатларда ашкара һалда лагерға аит дәлилләрни инкар қилип келиватқанлиқини билдүрди. Униң ейтишичә, бу кишиләр хитай пәқәт диний радикал вә террорлуқ гуруппилири билән алақиси бар кишиләрни қайта тәрбийәләватиду, қазақларни қалаймиқан тутқун қилди дегини ялған дәп көрситип, хитайниң қазақ, уйғур вә башқа милләтләргә йүргүзүватқан сиясәтлирини ақлиған. 

У, әнә шу сәвәблик, “ата юрт пидаийлири” ниң лагерлардики қазақларни қутқузуш үчүн елип бериватқан дәва паалийәтлириниңму бәлгилик тосқунлуққа учрап келиватқанлиқи вә буларниң тосқунлуқ һәрикәтлириниң барғанчә ашкарилиниватқанлиқини билдүрди.

Серикҗанниң баян қилишичә, өзиниң “хитай муһаҗирлири қазақлар тәрипидин сотқа берилиши нөвәттә қазақистандила әмәс бәлки оттура асиядики қирғизистан, өзбекистан, һәтта русийә мәтбуатлиридиму ғулғула қозғаватқан болуп, бу, лагер мәсилисиниң мәтбуатқа қайтидин долқун көтүрүшигә түрткә болған”. 

Серикҗан билашоғлиниң ейтишичә, у: өзи вә ата юрт пидаийлириға артилған әйибләшләргә қарши дәва ачқан болуп, алдимиздики дүшәнбә, йәни 18-феврал күни юқири сотқа чиқишқа тәйярланмақта икән.